Wapamina Mu Nazaret

Yesu wapamina mu Nazaret, ka musumb kakemp kakad ntumb. Ka musumb kinak kading kwinkaj kwa ngand ya mikandu ya Yudeya mu Galalia, kwingangel kwa Karung Mujim wa Galalia.

Pawanyishay pamwing ap mivu yaad, Josef ni Mariy amusenda Yesu kudiokal mu Idjibit mulong wa kushakam mu Nazaret. Chimeken anch, pa chisu chinicha ndiy kwend wading mwanau. Pakwez, kupwa kwa machuku anamakwend avadika—Jakobu, Josef, Simon ni Yudas. Josef ni Mariy avala kand an akwau amband, ading ampanyend a Yesu. Chakin kamu, Yesu wading ni anamakwend amakundj nau amband musamban.

Chikwau kand, Yesu wading ni anamakwend akwau. Twilejin kal rusangu ra Elizabet ni mwanend ikundj Yohan. Ndiy wading ushich kulemp kwindum kwa Yudeya. Washakama piswimp ni Galalia kwadingay Salome mwanamakwend a Mariy pakwez, wading mpanyend a tatukwend a Yesu. Salome wading mukajend wa Zebede. Anau amakundj aad ading, Jakobu ni Yohan, chimeken anch awiy adinga asanyend a Yesu a kusambish. Twijap nawamp mivu yinch yasutishay Yesu pamwing ni an inay amakundj papamau pamwing, pakwez, chimeken anch ikala arund nend a piswimp ni asala mudi atwimbuy aad a Yesu.

Josef wasalanga mudimu nakash mulong wa kuwanyish maswir ma dijuku diend dijim. Wading mwin kusong mabay. Josef wamulila Yesu mudi mwanend ikundj, chawiy chamutazukau Yesu anch “mwan ikundj wa nsongamabay.” (Mateu 13:55, TMK) Josef wamufundisha Yesu kwikal niyend mwin kusong mabay ni wileja mudimu winou nawamp. Chawiy, antu ading kulond anch Yesu wading: “nsongamabay.”—Marko 6:3.

Mashakamin ma dijuku dia Josef mading mimedin pa difukwil dia Yehova. Padandamenau kulam Yijil ya Nzamb, Josef ni Mariy ayifundishang anau malejan ma muspiritu ‘pashakamangau ku chikumbu chau ni pendangau mwi njil ni palalangau ni palankangau.’ (Kuvurik Yijil 6:6-9) Mu Nazaret mwading sinagog. Tukutwish kwikal nich kashinsh anch Josef wading ni chaku cha kuyang pamwing ni dijuku diend mwinimwa mulong wa kwifukwil. Asambela kulond anch: ‘kukwatijan ni chaku chend pa dichuku dia Sabat’ Yesu wandama mu sinagog. (Luka 4:16) Dijuku dined diasangarang nakash kuya pakad kujing mu tempel wading mu Yerusalem.