Yesu Amubatish kal

Angond musamban kupwa kwa Yohan Mubatish kusambish mudimu wa kulejan, Yesu wading ni mivu 30, waya ku Wit wa Yordan kwadingay Yohan. Mulong wak waya kwinikwa? Kayap kusu mulong wa kumutal Yohan mudi murund nend. Ap kand kayap mulong wa kutal mutapu wadinga uyila mudimu wa Yohan kurutu. Pakwez, Yesu waya kumulej Yohan chakwel amubatisha.

Chimeken patok kamu anch, Yohan kitiyap mulong walonda anch: “Am yam nifanyidina kwimbatish kudi ey, ov, ey weza kand kudi am?” (Mateu 3:14) Yohan wading wij patok anch Yesu udi Mwan wa pakampwil wa Nzamb. Vurik anch padingay Yohan mwivum mwa makwend, winyikesha nich musangar nakash payay Mariy wadinga ni madikaj ma kumuval Yesu kumutal Elizabet. Chimeken patok anch, makwend a Yohan wamulejamu mwanend rusangu riner. Yohan amuleja kand kudi makwend rusangu ra angel alejana rusangu ra kuvadik kwa Yesu ni mutapu wamekanau angel inay kudi atufung uchuku wavadikay Yesu.

Yohan wading wij anch kubatish kwabatishinay kwading mulong wa antu akarumuka ku yitil. Pakwez, Yesu kadingap ni chitil. Ap anch Yohan kitiyap, pakwez, Yesu wadandamena kumulej anch: “Itiyij kwey katat; mulong chinech chikat kwez kudi etu mulong wa kuwanyish nich kutentam kwawonsu.”—Mateu 3:15.

Mulong wak chading cha usey kumubatish Yesu? Yesu kamubatishap mulong wa kumekesh anch wakarumuka ku yitil bwat. Dibatish diend diamekesha patok anch wipan kal amwinend mulong wa kusal rusot ra Tatukwend. (Hebereu 10:5-7) Yesu wading nsongamabay, pakwez chisu chawanyina kudi ndiy cha kusambish mudimu wend wamutuminau pa divu kudi Tatukwend wa mwiur. Ov, utongin anch Yohan wading uchingedin kuman chom chimwing chishimokishena pamubatishay Yesu?

Inge, Yohan walonda anch: “Ndiy wantuma am kubatish antu nich mem wanleja anch: ‘Ey ukez kuman [spiritu utumbila] wamuwil muntu umwing, washakam nend. Muntu winou ndiy ukeza kubatish antu nich [spiritu utumbila].’” (Yohan 1:33) Chawiy, Yohan wamana spiritu wa Nzamb washirika padi muntu wabatishay. Chimeken kamu anch, patuntukay Yesu kapamp kamwing mu mem, Yohan kakashimukap pamanay “[spiritu] wa Nzamb wading mudi iyemb wamushirikina [Yesu].”—Mateu 3:16.

Pakwez, kudi yom yikwau yasadika pamubatishau Yesu. ‘Diur diamwanzurikina.’ Chinech charumburika ik? Pamwing ap charumburika anch chisu chamubatishau Yesu, ndiy wavurika mwom wadingay nich mwiur kurutu avadika pansh. Chawiy, chisu chavurikay Yesu mwom wadingay nich mudi mwan wa muspiritu wa Yehova, wavurika kand uyakin wamufundishau kudi Nzamb padingay mwiur kurutu avadika panap pansh.

Chikwau kand pamubatishau Yesu, dizu diadiokala mwiur dialonda anch: “Ey udi Mwanam unikatila nakash. Am nikat kusangar mulong weyey.” (Mateu 3:17) Nany walonda dizu dined? Diadingap dizu dia Yesu ap dia Yohan bwat. Dizu dined diading dia Nzamb. Chimeken patok anch Yesu udi Mwan a Nzamb. Kadiap Nzamb amwinend.

Chidi cha usey kwijik anch Yesu udi mwan wa Nzamb, mudi mwadingay kand Adam. Pisambinay mwin kwilej Luka piur pa dibatish dia Yesu, ndiy wafunda anch: “Pasambishay Yesu mudimu, wading ukwet mivu ya kuvadik makum masatu. Antu atongang anch, Yesu wading mwan wa Josef, Josef wading mwan wa Heli, . . . mwan wa David, . . . mwan wa Aburaham, . . . mwan wa Nowa, . . . mwan wa Adam, mwan a Nzamb.”—Luka 3:23-38.

Mudi mwadingay Adam “mwan wa Nzamb,” mwawiy kamu mwadingay Yesu. Pamubatishau, Yesu wikala mu urund wa piswimp ni Nzamb, wikala kamu mwan wa muspiritu wa Nzamb. Chawiy komb, Yesu ndiy uwanyidina kulejan uyakin piur pa Nzamb ni kulejan njil ya mwom. Yesu wasambisha kusal mudimu wamushikija ku rufu papanay mwom wend mudi chakupesh mulong wa kutaninamu kwa antu akayitil.