Yesu Usadin Chilay Chend Cha Kusambish

Diading dichuku dia kasatu kupwa kwa Natanyel kwikal mwin kwilej wa Yesu. Yesu ni in kwilejend amwing aya kwinkaj kwa musumb wa Galalia ngand yau ya chivadik. Ading ayil ku Kana, musumb wavadikinay Natanyel. Kana udi musumb udia kwinkaj kwa Nazaret, ndond yapaminay Yesu. Pakwez, ayitazuka kuya ku musambu wa uruw wasadika mu Kana.

Makwend a Yesu niyend waya ku musambu winou. Mulong Mariy wading murund wa dijuku diatana, chimeken anch pamwing ap Mariy wayikwasha kwak angendj avud eza ku musambu winou. Chawiy, pamanay kapamp kamwing anch maar mapwa kal, waya kumulej Yesu anch: “Maar ma nviny mayipwa kal.”—Yohan 2:3.

Papwa maar minan, Mariy wamulejamu Yesu chakwel asala chom kanang. Yesu wasadina mazu mamwing mulong wa kumekesh chitongijok chend pakulay anch: ‘Mband ey, mulong winou ututadin nchik?’ (Yohan 2:4) Mudi Mwant watondau kudi Nzamb, Yesu wafanyina kusal yom yikumulejau ching kudi Tatukwend wa mwiur, kadiap yikumulejau kudi dijuku diend ap kudi arund nend. Nich manangu Mariy wateka mulong winou mu makas ma mwanend ikundj payilejay atushalapol anch: “Salany yom yawonsu yikukulejanyay.”—Yohan 2:5.

Kwading ansab a mayal musamban ni nsab yimwing yafanyina kwandam malitre 40 ni kusut. Yesu wayileja atushalapol anch: “Izwishany ansab inay nich mem.” Kupwa Yesu wayileja kand anch: “Tubulanyamu mem, umutwadilany mukurump wa musambu.”—Yohan 2:7, 8.

Mukurump wa musambu washimwoka piur pa kutaal kwa maar ma nviny pakwez, kijikap anch maar minam madiokala ku chilay. Wamutazuka ngatan ni wamuleja anch: “Akwen awonsu akat kusambel kupan maar mawamp, chad anch antu atazukangau ana kal nakash, ndiy wapan lel maar masaurikina. Pakwez ey wajindjikang maar mawamp nakash kushik ni katat.”—Yohan 2:10.

Chinech chawiy chilay cha kusambish chasalay Yesu. Pamanau in kwilej end asu chilay chinech, ritiy rau mudiay Yesu rakasikana. Kupwa kwa musambu winou, Yesu, makwend nau anamakwend aya ku musumb wa Kapernaum kwinkaj kwa ushad wa Karung wa Galalia.