MUTU WA MULONG WA KWILEJ WA 15
Yom Tukutwisha Kwilejin ku Yilay ya Yesu
“Watambitamba mulong wa kusal midimu yiwamp ni kwok ayej.”—MID. 10:38.
MUMINY 13 Kristu Udi Chilakej Chetu
YIDIA MU MUTU WA MULONG WINOUa
1. Rumburil mutapu wading yom chisu chasalay Yesu chilay chend cha kusambish.
TONGIN yom yasadika kwinsambishin kwa mudimu wa Yesu mu muvu wa 29 C.C. Yesu, makwend Mariy, ni in kwilejend amwing ayitazuka ku musambu wa uruw mu Kanan, ul wading kwiyand kwa Nazaret, musumb wavadikinay Yesu. Mariy wading wijikijadin ni dijuku dinidia ni chimeken anch wading uyikwashin kwak angendj. Pakwez mukach mwa musambu, kwasadika chom chafanyina kuyikwatish ambay a uruw asu inay usany ni dijuku diau—maar mapwa.b Pamwing ap kweza antu avud nakash kusutamu uvud wading utongidinau. Pakad kulab Mariy waya kumuman mwanend, wamwel anch: “Maar ma nviny mayipwa kal.” (Yoh. 2:1-3) Yom ik yasalay Yesu? Wasala chom chishimokishena nakash—wakarumuna mem mu chilay mikal “maar mawamp.”—Yoh. 2:9, 10.
2-3. (a) Mutapu ik wasadinangay Yesu usu wend wa kusal nich yilay? (b) Kushinshikin yilay ya Yesu kukutwish kutukwash mutapu ik?
2 Yesu wasala kand yilay yikwau yivud pa chirung cha mudimu wend.c Wasadina usu wend wa kusal nich yilay mulong wa kuyikwash antu avud nakash. Chilakej anch twasend kusu kwau yilay yaad yasalay—padishay amakundj 5 000 ni kupwa kand padishay amakundj 4 000—chimeken anch wadisha antu 27 000 ni kusut anch twawejaku amband ni an adingap niyau. (Mat. 14:15-21; 15:32-38) Pasalay yilay yiney yaad, Yesu woka kand ayej avud. (Mat. 14:14; 15:30, 31) Tongin mutapu washimokau antu payokau ni kuyidish mu chilay kud Yesu!
3 Yilay ya Yesu yikutwish kutufundish yom yivud nakash. Mu mutu wa mulong winou, tukwisambin yom tukutwisha kwilejin ku yilay yasalay Yesu yikutwisha kukasikesh ritiy retu. Kupwa tukuman mutapu tukutwisha kwimburij kwikepish ni ranaken ramekeshay Yesu pasalangay yilay.
YOM TWILEJINA PIUR PA YEHOVA NI YESU
4. Yom twilejidina ku yilay yasalay Yesu yikasikeshin ritiy retu mudiay nany?
4 Yilay ya Yesu yitufundishin malejan makasikeshina ritiy retu kadiap kwau ching mwi ndiy pakwez kand mudiay Tatukwend. Mulong Yehova ndiy wamwinkishang usu wa kusal yilay yiney yawonsu. Midimu 10:38 utulejin anch: “[amwikisha] Yesu wa ku Nazaret ukash wa [spiritu] utumbila kudi Nzamb. Yesu watambitamba mulong wa kusal midimu yiwamp ni kwok ayej awonsu adinga mu ukash wa Sakudimban, mulong Nzamb wading nend Yesu pamwing.” Vurik kand anch Yesu wimburija chitongijok ni yovil ya Tatukwend mu yom yawonsu yalonday ni yasalay—kuwejaku ni yilay yasalay. (Yoh. 14:9) Shinshikin yom yisatu tukutwisha kwilejin ku yilay ya Yesu.
5. Yom ik yamubachika Yesu kusal yilay? (Mateu 20:30-34)
5 Chakusambish, Yesu ni Tatukwend atukatining nakash. Padingay pa divu, Yesu wamekesha mutapu wading uyikatinay nakash antu kusutil kusadin usu wend wa kusal nich yilay mulong wa kuyikwash antu ading amena mar. Dichuku dimwing, amputames aad amwilembina chakwel ayikwash. (Tang Mateu 20:30-34.) Umen anch Yesu “wayovila riy” ni kupwa wayoka. Dizu dia Grek dikarumwinau pinap anch “wayovila riy” dimekeshin ranaken ripandakena rovilay muntu mukach mwend. Ranaken ripandakena mud riner, rimekeshina rukat, rawiy kand ramubachika Yesu kuyidish antu ading afila nzal ni kumwok mwin musong wa mak. (Mat. 15:32; Mar. 1:41) Tukutwish kwikal nich kashinsh anch Yehova, Nzamb “mwin riy ni ranaken,” ni Mwanend atukatin nakash ni chikat kuyisal nayimp anch atuman tukat kuman mar. (Luka 1:78; 1 Pita 5:7) Chakin kamu, achingedin nich impu nakash kupwish uyimp wawonsu uyimeshina antu mar!
6. Usu ik wamwinkishinau kal Yesu kud Nzamb?
6 Cha kaad, Nzamb wamwinkin kal Yesu usu wa kupwish milong yawonsu yirishinau nich antu. Kusutil yilay yasalay, Yesu wamekesha anch ukwet usu wa kupwish milong yin yawonsu yatwakad kutwish ap pakemp kupwish etu ayinetu. Chilakej, ukwet usu wa kutukamunin ku musul wa milong yawonsu yirishinau nich antu—chitil twaswana ni yibudikin yau, mayej ni rufu. (Mat. 9:1-6; Rom 5:12, 18, 19) Yilay yasalay yamekesha anch ukutwish kupwish “mitapu yawonsu” ya mayej ni ukutwish kand kuyivumbul afu. (Mat. 4:23; Yoh. 11:43, 44) Chikwau kand, ukwet usu wa kudutish rinkind mukash ni wa kuyikamunin antu ku usu wa ayilembil. (Mar. 4:37-39; Luka 8:2) Chitukasikeshin mud ik pa kwijik anch Yehova wamwinkishin kal Mwenend usu mud winou!
7-8. (a) Yilay ya Yesu yitwinkishin kashinsh ik? (b) Ey chilay ik uchingedina pakampwil kuman mwi ngand yisu?
7 Cha kasatu, tukutwish kwikal nich kashinsh anch yiyukish yitukaninay Nzamb yikuleta Want wend yikuwanyin. Yilay yasalay Yesu padingay pa divu yitufundishin anch ukusal yom yipandakena kujimb mulong ud Mwant wa Want wa Nzamb. Tal yiyukish tukutambula piswimp ap pakuyikelay Kristu pa divu. Tukwikal ni mijimbu yiwanyidina, mulong ukupwish mayej mawonsu ni ulim ukwetau antu. (Isay 33:24; 35:5, 6; Kuj. 21:3, 4) Tukezap kand kafa nzal ap kuman mar madiokila ku yom yatangau. (Isay 25:6; Mar. 4:41) Tukwikal ni musangar wa kuyak akatish netu akuvumbuka kudiokal mu ‘jinzay ja chivurikish.’ (Yoh. 5:28, 29) Ey chilay ik uchingedina pakampwil kuman mwi ngand yisu?
8 Pasalay yilay, Yesu wikepisha nakash ni wamekesha ranaken—mikadil tufanyidina niyetu kukudish. El tushinshikinany yilakej yaad, chakusambish rusangu ra musambu wa uruw wasadika ku Kanan.
DILEJAN DIA KWIKEPISH
9. Yom ik yasalay Yesu ku musambu wa uruw? (Yohan 2:6-10)
9 Tang Yohan 2:6-10. Ov, Yesu wading ufanyidin kusal chom kanang chisu chapwa maar ku musambu wa uruw? Bwat. Kwadingap uprofet ap umwing wasambela kulejan anch Messia ukez kasal maar mu chilay. Pakwez tongin bil mutapu ukwiyova anch mud maar mapwa ku musambu wey wa uruw. Chimeken anch Yesu wanakena dijuku dinidia, pakampwil ikundj ni mband atijana, ni kakatap anch akwachik usany. Chawiy, mud mutapu twamanang kwinsambishin, wasala chilay. Wakarumuna mem—alitre piswimp 390—kwikal maar mawamp nakash. Pamwing ap wayinkisha maar mavud mwamu chakwel kushalaku makwau makutwisha kuyikwash kand mu machuku ma kurutu ap kand mulong ambay a uruw inay asu akutwish kumalandish mulong wa kwikwash nich. Musangar mud ik wafanyinau kwov ambay a uruw inay asu!
Mwimburija Yesu kusutil kulik kwibaz mulong wa yom usadina (Tal paragraf wa 10-11)e
10. Jinsangu ik jimwing ja usey tutanina mu rusangu rilejenau mu Yohan shapitre wa 2? (Tal kand chipich.)
10 Shinshikin jinsangu jimwing ja usey jidia mu rusangu rilejenau mu Yohan shapitre wa 2. Ov, wamanang anch Yesu kendiyap wizwisha mem mu ansab? Pa ndond pa kwipwitin nkeu amwinend, wayileja atushalapol kwizwish mem mwa ansab. (Verse wa 6, 7) Ni kupwa kwa kukarumun mem kwikal maar, Yesu katubulap mar ni kumatwal amwinend kud ntakel wa musambu. Pakwez wayileja atushalapol kusal mwamu. (Verse wa 8) Chakin kamu Yesu kanonap rupas ra maar, warizambul kurutu kwa antu ni kwibaz anch, ‘Pimany maar nasala kal!’
11. Chilay cha Yesu chitufundishin ik?
11 Yom ik tukutwisha kwilejin ku chilay cha Yesu pakarumunay mem kwikal maar? Chilay chinech chitufundishin anch tufanyidin kwikepish. Yesu kibazap mulong wa chilay chasalay; kibazangap ap pakemp piur pa yom yasalangay. Pakwez, nich kwikepish wapanang chisu chawonsu katumb kawonsu kud Tatukwend. (Yoh. 5:19, 30; 8:28) Anch twamwimburij Yesu kusutil kudandamen kwikal ikepishina, tukwibazap mulong wa yom tusadina. Chikalap nchik yom tukutwisha kusal mu mudimu wa Yehova, el twibazany mulong wa dilau tukweta dia kumusadin Nzamb ushimokishena, pa ndond pa kwibaz ayinetu. (Jer. 9:22, 23) Tumwinkishan Yehova katumb kamuwanyidina. Mulong kwikil chom chiwamp tukutwisha kusal pakad ukwash wend.—1 Kor. 1:26-31.
12. Mutapu ik ukwau tukutwisha kwimburij kwikepish kwa Yesu? Let chilakej.
12 Shinshikin mutapu ukwau tukutwisha kwimburij kwikepish kwa Yesu. Tongin chilakej ech: Mukurump wa chikumangen wasutish chisu chivud mulong wa kumukwash nsand udia nkwash a mudimu kurijek diskur diend diakusambish. Mud chibudikin, mukadivar nsand wasal diskur diwamp, ni chikumangen chadisanger. Kupwa kwa chikumangan muntu umwing wez wamutan mukurump wamwel anch: ‘Mukadivar kanang wasal kal diskur diwamp nakash.’ Ov, mukurump ufanyidin kwakul anch: ‘Mwawiy, pakwez yansendang chisu chivud mulong wa kumukwash kudirijek? Anch ufanyidin kusu kwend kwakul nich kwikepish anch: ‘inge, mwawiy kamu. Wansangaresh kal nakash’? Anch tud ikepishina, tukukimbap anch ing atutumbishang mulong wa yom yiwamp twayisadinang antu akwau. Pakwez tukusangar mulong twij anch Yehova umen ni ukwatin nich usey yom tusadina. (Ilakej ni Mateu 6:2-4; Heb. 13:16) Chakin kamu, tukat kumusangaresh Yehova anch twamwimburij Yesu kusutil kwikal ikepishina.—1 Pita 5:6.
DILEJAN DIA RANAKEN
13. Yom ik yamanay Yesu pasejay piswimp ni musumb wa Nayin, ni kupwa yom ik yasalay? (Luka 7:11-15)
13 Tang Luka 7:11-15. Tongin yom yasadika mu muvu wa 31 C.C. Yesu waya ku Nayin, musumb umwing wa ku Galalia piswimp ni Sunem, kwamuvumbulau mwan ikundj wa mband umwing kud muprofet Elisha mivu 900 kurutu kwa chinship chinech cha ku Nayin. (2 Ant 4:32-37) Pasejay Yesu ku chis cha musumb, wamana chisak cha antu abudikina mu musumb, ading ayil mu kujikan. Kwasadika yom ya ushon nakash—mwadiamufu umwing wafisha mwan umwing kusu wadingay nich. Pakwez maku winou kadingap amwinend; wading ni antu akwau avud a mu musumb. Yesu wimika chital ni wamusadina maku winou wading unenganena chom chimwing chapakampwil—wamuvumbula mwanend! Winou ud muntu wakusambish pakach pa antu asatu avumbulay Yesu isambidinau mu ma Evanjil.
Mwimburija Yesu kusutil kuyanaken antu afishina (Tal paragraf wa 14-16)
14. Jinsangu ik jimwing ja usey tutanina mu rusangu rilejenau mu Luka shapitre wa 7? (Tal kand chipich.)
14 Shinshikin jinsangu jimwing ja usey jidia mu rusangu rilejenau mu Luka shapitre wa 7. Ov, waman kal anch Yesu ‘wamumana’ maku wading udidina ni kupwa “wamwovila riy”? (Verse wa 13) Chawiy, yom yamanay—pamwing ap mutapu wading uyilay mband winou mu kudil kurutu kwa chital cha mwanend wafang kal—yamubachika Yesu kumwanaken nakash. Yesu kimenap kusu kwend pa kumwovil maku winou riy; wamekesha anch umwanakedin. Wamwela, chakin kamu nich dizu dia matul, anch: “Lik kudil.” Kupwa wasala chom kanang mulong wa kumukwash. Wamuvumbula mwan ni “wamupana kud makwend.”—Verse wa 14, 15.
15. Chilay cha Yesu chitufundishin ik?
15 Yom ik tukutwisha kwilejin ku chilay chasalay Yesu pamuvumbulay mwan a mwadiamufu? Chilay chinech chitufundishin anch tufanyidin kuyanaken antu akweta ushon. Chakin, tukutwishap kuvumbul afu, mud mwasalay Yesu. Pakwez, mud Yesu, tukutwish kukudish ranaken mulong wa antu afishang kal kusutil kuyishinshikin. Tukutwish kumekesh anch tuyanakedin kusutil kulond ni kusal yawonsu tukutwisha mulong wa kuyikwash ni kuyongoj.d (Jnsw. 17:17; 2 Kor. 1:3, 4; 1 Pita 3:8) Ap tumazu tumekena mud twausweral ni tuyisal tuwamp tukemp tukemp tukutwish kumwongoj muntu nakash.
16. Mud mumekeshinau pa chipich, yom ik wilejidina ku yom yamushikena maku wading udiokidinap pa kufish mwanend?
16 Shinshikin chilakej chimwing. Mu mivu ya kwinyim ey, dichuku dimwing pading pawanginau muminy ku chikumangan, nambaz umwing wamumana maku umwing wading nend piswimp ukat kudil. Muminy wading ulondin piur pa ruchingej ra divumbuk, ni maku winiwa wafisha mwanend mband pading kand kal palab. Chawiy pamanay mwamu, nambaz waya kapamp kamwing, wamulama maku winou, ni wapwisha kuwang nend pamwing chikunku cha muminy chading chishadina. Mu kusut kwa chisu maku winou walonda anch: “Nayikata nakash akadivar ni anambaz.” Wajikitisha nakash mulong wa yikumangan. Walonda anch: “Ku Chot cha Want kwawiy tukata kutambul ukwash.” Tukutwish kwikal nich kashinsh anch Yehova umening ni ukwatining nich usey ap tuyom tukemp tukemp tukata kusal mulong wa kuyanaken antu afishina, “akweta michim yakad ruchingej.”—Kus. 34:19.
YOM YIKASIKESHINA RITIY UKUTWISHA KWILEJ
17. Yom ik twileja kal mu mutu wa mulong winou?
17 Kwilej jinsangu jidia mu ma Evanjil piur pa yilay yasalay Yesu kukutwish kukasikesh ritiy retu. Yilay yiney yitufundishin anch Yehova ni Yesu atukatin nakash, anch Yesu ukwet usu wa kupwish milong yawonsu yiyimeshina antu mar, ni anch yiyukish yitukaninay Nzamb yikuletay piswimp ap kusutil Want wend yid yakin, yikuwanyin. Patushinshikidina jinsangu jinej, tukutwish kutongin pa mutapu tukutwisha kwimburij mikadil ya Yesu. Umen nchik anch watenchik dichuku dimwing kwilej mu program wey wa dilejan dia pakampwil ap mu Difukwil dien dia mu Dijuku yilay yikwau yasalay Yesu? Tal malejan wilejidinaku, ni kupwa misambina nau akwen. Ukutwish kutongin mutapu mambamb minam makutwisha kukukasikeshany!—Rom 1:11, 12.
18. Yom ik tukwisambina mu mutu wa mulong ulondwilaku?
18 Yesu wavumbula muntu wa kasatu piswimp kwinsudien kwa mudimu wend. Pakwez divumbuk dined diading dishalijadin ni makwau, mulong muntu wavumbulay wading murund nend, ni wafa kwad kwasut kal machuku manying. Yom ik tukutwisha kwilejin ku rusangu ridia mu ma Evanjil piur pa chilay chinech? Ni mutapu ik tukutwisha kukasikesh ritiy retu mu ruchingej ra divumbuk? Mutu wa mulong ulondwilaku ukwisambin yipul yiney.
MUMINY 20 Wamupana Mwaney Kapwokal
a Yesu wadutisha rinkind mukash, woka ayej, ni wavumbula afu. Kutang jinsangu ja yilay yasalay Yesu kukat kutusangaresh nakash! Jinsangu jinej ajifundin mu Bibil, kadiap mulong wa kwipuwangej nich, pakwez mulong wa kutufundish. Tukwisambin jinsangu jinej ni kuman yom tukutwisha kwilejinaku yikukasikesha ritiy retu mudiay Yehova ni Yesu, ni kujingunin kand mikadil tufanyidina kukudish.
b Mwin kwilej milong ya Bibil umwing urumburil anch: “Pakur ku mutambu wa Kwingangel antu ading ij anch akwet chisend cha kwakan, ni mwin kwakan wading ufanyidin kuyinkish angendj end yom yivud kusutamu kusu kwau yiswirikedinau. Chawiy kwakan kuwamp, pakampwil ku musambu wa uruw, kwading kwitin kwikal ni yom yivud kusutamu yading yikwetau nich antu kuswir.”
c Ma Evanjil malejen yilay 30 ni kusut yasalay Yesu. Chikwau kand, kud yilay yikwau yivud yasalay Yesu, pakwez Bibil kayijimbwilap chimwing ku chimwing. Dichuku dimwing, “antu awonsu a mu musumb” umwing aya kumutal ni “wayoka antu avud akwetinga misong.”—Mar. 1:32-34.
d Mulong wa kutan yiyul piur pa yom ukutwisha kulond ap kusal mulong wa kumwongoj muntu ukweta ushon, tal mutu wa mulong “Yikasikeshany Antu Afishina Kal, Mudi Mwasalay Yesu,” mu Chinong cha Kalam cha 1 Ngond wa 12, 2010.
e KURUMBURIL CHIPICH: Ngatan ni ngachik pamwing ni antu atazukangau akat kusanger nviny muwamp, pakwez Yesu ud kwend kuns.