Yikasikeshany Antu Afishina Kal, Mudi Mwasalay Yesu

LAZAR wadinga mu Betaniya, wayela nakash. Ampanyend Mart ni Mariy, atuma antu chakwel aya amuleja murund nend wa piswimp Yesu. Pakwez mayej minam mamushikija Lazar ku rufu. Pamutekau mwi nzay, arund ni amutej ayendila Mart ni Mariy mulong wa “kuyongoj.” (Yohan 11:19) Kupwa kwa machuku maad Yesu washika ku Betaniya ni waya kumutal murund nend mukatish. Anch twashinshikin yalonday ni yasalay, tukutwish kwilej chom chimwing piur pa mutapu wa ku yikasikesh afishina.

Kwikalaku Kwey Kukutwish Kumekesh Anch Uyibangidin Antu Akwau

Chakwel ashika ku Betaniya, Yesu wasala machuku maad, wauka ushad wa kawit ka Yordan ni kuya mwi njil yadinga yiyila ku Yeriko. Mart wasota kuya kapamp kamwing kumulangwish Yesu padingay kwinsambishil kwa ul. Kupwa, pateshay Mariy anch Yesu washik kal, ndiy watumbuka swa kuya kumutal. (Yohan 10:40-42; 11:6, 17-20, 28, 29) Kwikalaku kwa Yesu kwading chakin kamu musul wa kuyikasikesh anambaz afishina.

Chilik chimwing kand nlel unou, kwikalaku kwetu, kukutwish kuyongoj antu afishina kal. Scott ni Lydia, afisha mwanau wa mivu musamban, Theo ku akisidan avurikin anch: “Twaswiridina kutambul dikasikesh dia dijuku ni dia arund. Eza uchuku nakash ku rupital.” Ov, chom ik chalondau arund inay? “Pa chisu chinicha twadingap nich kuswir kwa kuyitesh. Kwikalaku kwau kwalonda chom chimwing​—awiy atubangina.”

Bibil ulondin anch payimanay Yesu antu akat kudil mulong wa rufu ra Lazar, ndiy “wanenganana nakash” ni “wadila.” (Yohan 11:33-35, 38) Yesu kashinshikinap kusu runeng ra antu ading adidila. Ndiy wova ushon nakash mulong wa yovil yau ya kufish. Dilejan ik didiaku kudi etu? Pitukata kuyendil antu afishina kal, tuswiridinap kwov usany wa kudil pamwing ni antu adidila. (Rom 12:15) Mu mutapu ukwau, kangal waman anch ufanyidin kumubachik muntu wafishina chakwel adila bwat. Antu amwing akutwish kusot kudil ku ujindj.

Tesh Nich Ranaken

Yesu wading ulamina mu manangu mazu mamwing ma kuyongoj nich Mart ni Mariy, pakwez ndiy wayilika alonda bil. (Yohan 11:20, 21, 32) Padingay ni kwambamb ni Mart, ndiy wamwipula chipul kupwa wamutesha.​—Yohan 11:25-27.

Kwikal mwin kutesh muwamp kukutwish kumekesh anch ukat kuyibangin. Mulong wa kumwongoj muntu ufishina, tufanyidin kwikal antu ateshina nawamp. Tukutwish kumekesh anch tudi in kutesh awamp kusutil ku kuyipul afishina yipul yimwing yikutwisha kuyikwash arumburila ayinau yom yikwau. Pakwez babal, kangal wayibachik chakwel alonda anch asotin kwau kushakam pakad kulond. Akutwish pamwing ap aziyang kal ni aswiridin kupim.

Antu akad ranaken akutwish kuburen yovil ni kuchirikin yisu yikwau yom yimwing. Antu amwing akat kumekesh yovil yau. Mariy ni Mart alonda awonsu aad anch: “Nsalejam, anch ey wadi kunoku, ing mwanamakwam kafilap.” (Yohan 11:21, 32) Chom ik chasalay Yesu? Wayitesha nich kushimpish muchim ni ranaken. Walika kupakish kuyipul chakwel alejana yovil yau. Watesha chakin kamu yovil yikash ni kuswan kwa kukutwishau kwikal nich.

Anch wijap piur pa yom ukulonda piukata kumwendil mwin kufish, ukutwish kusambish misamb nich chipul ech, “Ov, usotin twisambinaku pa mulong winou?” Kupwa mutesha nawamp pakezay kwakul. Lam mu manangu mey yiuteshina. Mutala nawamp ni pakish kutesh yovil yend.

Chikasiken kwijik yovil ya mwin kufish. Lydia ulondin anch “maswir metu maswimpa, yisu yimwing kitwatwishap kupan ukwash pakwez twasambisha kudil ku mes ma antu atwendila. Twasota anch antu akwau ikala nich yitongijok yiwamp. Arund netu asala usu wau chakwel ijika yovil yetu.”

Yesu wasala mwamu mu mutapu uwanyidina. Ndiy wading wij anch muntu ni muntu wading ukwet “kuyip kwa muchim wend.” (2 Jinsangu 6:29) Yesu wambatanisha chakul chend nich moy wa anambaz inay aad. Mart wadandamen kulond, chawiy chamubachika Yesu kwambamb nend. Yesu kalondap yom yivud mulong Mariy wading ukat kudil. (Yohan 11:20-28, 32-35) Ov, chom ik tukutwisha kwilejin ku chilakej chend? Chitwishikin kumulik mwin kufish alonda bil. Anch wayitesh bil chakwel alejana yovil yau ya ushon, chinech chikutwish kuyikasikesh nakash.

Mazu Makutwisha Kwokan

Pamulejau Yesu kudi Mariy ni Mart anch: “anch ey wadi kunoku,” ndiy kayifishap nich ap kachirikinap pa yalondau. Ndiy wamwakula Mart ni kumukasikesh anch: “Mwanamakwey ukuvumbuk.” (Yohan 11:23) Kusutil ku mazu minam makemp, Yesu wamukwasha kushinshikin yom ya kurutu ni wamuvurisha nich rukat anch kwading ruchingej.

Pitwisambina ni muntu wafishina kal, vurikany anch mazu ma kashinsh, mawampina makutwish kurumburik yom yivud, ap anch makutwish kwikal makemp! Chitwishikin kulond ap kufund mazu ma kwongoj nich. Mulong mikand ni ma kart akutwish kuyitangiril, makutwish kulet rongoj ra chisu chilemp. Angond chidivu kupwa kwa kufa kwa nfumwend Bob, Kath ukat kutangiril kand ma kart mawonsu matambulay. Ndiy walonda anch: “Namana anch mankwasha nakash pa chisu chinicha, pawiy pinipa natambula dikasikesh.”

Ov, chom ik ukutwisha kufund mu wiswimp mu mukand wa kwongoj nich? Ukutwish kufund piur pa muntu wafila​—yom wasala nend pamwing ap ngikandil yend yiwamp. Kath ulondin anch: “Mazu makasikeshina piur pa Bob ni chaku chend masambisha kwimwemwetish ni kwindidish pa chisu chimwing. Jinsangu jisipishena piur pend jansipisha ni navurika mutapu twashakama nend mu musangar. Nikwet ni katat ma kart mavud nisangaredina nakash pafundinau ma verse ma Bibil.”

Yinkish Ukwash Uwanyidina

Mulong wa kukwash dijuku dia Lazar, Yesu wasala yom yakad etu kutwish kusal. Ndiy wamuvumbula Lazar. (Yohan 11:43, 44) Pakwez tukutwish kusal yom yitukutwisha kusal, mudi kwisuk yakudia, kuyak angej, kubam manswin, kumukwash kumulamin an, kumukwash kuland yom, kumwikish nfalang ja transport. Yisal mudi yiney ya rukat yikez kamusangaresh ufishina.

Choviken patok ach, chisu chimwing muntu ufishina usotining kwikal amwinend. Chawiy lel ukutwish kutek chisu chifanyidina kwambamb nau. Maku umwing wafisha kal ulondin anch: “Kwikiling chisu cha kupwish runeng, kwikiling kwiyov nawamp.” Amwing apakishining kumuvurish ufishina machuku ma usey ma kuvurik, mudi dichuku dia kwatijan ap dia rufu. Kusutil kupan ukwash mu yisu yiney, ukutwish kwikal murund muwamp pa chisu cha mar.​—Jinswir 17:17.

Mu rongoj rapanay Yesu mudi ni ruchingej rayinkishay in kwilej end anch: “Murund netu Lazar walala kal mu tul, pakwez nikuya ni kamulangwisha.” (Yohan 11:11) Yesu wayikasikesha in kwilej end anch disanguk dia afu dikez kwikalaku. Ndiy wamwipula Mart anch: “Ov, witiyin mazu minam?” Mart wamwakula anch: “Mwawiy, Nsalejam!”​— Yohan 11:24-27.

Ov, witiyijining anch Yesu ukez kayivumbul afu? Anch chidi mwamu, lejan uyakin winou wa ruchingej kudi antu afishina kal. Yinkisha ukwash uwanyidina. Mazu mey makez kuyongoj mu chilik chiwanyidina.​—1 Yohan 3:18.

[Karte udia pa paj wa 9]

(Chakwel kutan mazu mawonsu, tal mu mukand)

PERE

Wit wa Yordan

Yeriko

Betaniya

Karung wa Mungu

Yerusalem

SAMARIA