Malejan Piur Pa Kwak Angendj Ni Piur Pa Malembil

Betaniy udi ul udia kwingangel kwa Mukandu wa Mitond mudi ya Mpach padia makilometre masatu ni Yerusalem. (Yohan 11:18) Yesu waya kwinikwa ni waya ku chikumbu kwadingay Mariy ni Mart. Yesu wading murund wa amband inay aad adinga ni mwanamakwau Lazar, chawiy amwaka Yesu nich musangar.

Chading chom cha usey nakash kumwak Mesia mudi ngendj kwol kwau. Mart wakata nakash kumwak Yesu nawamp, chawiy chasambishay kwirijek mulong wa kwisuk yakudia. Pading pisukinay Mart, mwanamakwend Mariy waya kushakam ku mend ma Yesu mulong wa kumutesh. Pa chisu chinicha, Mart wamuleja Yesu anch: “Nsalejam, ov, ey umenap kwey anch, mwanamakwam wanlikinang kal midimu yawonsu amwinam? Muleja, eza ankwash!”—Luka 10:40.

Pa ndond pa kumulond Mariy nayimp, Yesu wamuyula Mart mulong wading ukwatiken ni yom ya kumujimbu palonday anch: “Mart, Mart! Ey unenganen ni kwiyakamish mulong wa midimu yivud. Pakwez ey ukwet kusu kuswir kwa chom chimwing. Mariy watondang kal chom chiwamp, chakad kwez kumutambul.” (Luka 10:41, 42) Chakin kamu, Yesu wamekesha patok anch chadingap cha usey kusutish chisu chivud mulong wa kwisuk yakudia yikutwisha kwau kuvund. Chading kwau chiwamp kwisuk yakudia yikemp yiwanyidina.

Chitongijok cha Mart chading chiwamp. Ndiy wakimba kwikal ni chisambu cha kwak ngendj. Pakwez, ndiy wiyakamisha nakash mulong wa kwisuk yakudia yamusutishina chisu cha kutesh malejan ma mwan wa Nzamb! Yesu walonda patok anch Mariy wakwata mupak wa manangu wela kumuletin yibudikin yiwamp ya chikupu, ni kusutin dilejan dined etu awonsu tukutwish kutaninamu.

Chisu chikwau, Yesu wisambina dilejan dikwau dia usey. Mwin kwilej wend umwing wamwipula anch: “Nsalejetu, tulejap niyetu mutapu wa kulembil, mudi Yohan mwayilejay in kwilejend.” (Luka 11:1) Pasut kal muvu umwing ni chikunku, Yesu wafundisha dilejan dined mu Malejan mend ma Usey ma pa Mukandu. (Mateu 6:9-13) Pakwez, chimeken anch mwin kwilej winou kadingapaku, chawiy Yesu wachirikina malejan ma usey. Kupwa Yesu wisambina chishimu chimwing mulong wa kukasikeshin usey wa kudandamen kulembil.

Ndiy walonda anch: “Tongany bil, anch umwing wa pakach penen waya ku chikumbu cha murund nend mukach mwa uchuku, wamwel anch: ‘Murund nam, nsondjikap mabot masatu. Murund nam mukwau wezil mu weny washik kal katat kwol kwam. Kinikwetap yakudia ya kumwinkish!’ Anch murund nend wamwakwil mukach mwa chikumbu anch: ‘Kangal wanswidiosh! Natekang kal [kayand] ku chis, am ni anam twalalang kal. Kinikutwishap kulank mulong wa kukwinkish ey mabot, bwat!’ Nakulejany chakin, anch walikap nchik kulank kumwinkish yakudia mulong wa urund, ndiy ukulank kumwinkish yom yawonsu yikwetay nich kuswir mulong wadandamen kal kwit.”—Luka 11:5-8.

Yesu kalondap anch Yehova kakatap kutesh malembil madandamedinau kwit mudi mwasalay murund winou. Pakwez ndiy wamekesha anch, ap anch murund winou kakatap kwakul, pakwez ndiy wakula mulong murunend wadandamena kwit, chilik chimwing kand ni Tatukwetu wa mwiur, ndiy ukat kwakul ku malembil madandamedinau kwit kud atushalapol end ashinshamena! Yesu wadandamena kulond anch: “Chawiy nikulejinany anch: ‘[Dandamenany] kwit mu kulembil, Nzamb ukez kukwinkishany. [Dandamenany] kusurab, ukez kutanany. [Dandamenany] kukokal ku chis, akez kukwanzurilany.’ Mulong muntu mwawonsu ukata kwit, ukat kutambul kamu, niyend ukata kusurab, ukat kutan, niyend kand ukata kukokal ku chis, akat kumwanzuril.”—Luka 11:9, 10.

Yesu wisambina kand dilejan dia usey mu kusadin chilakej cha nvaj palonday anch: “Ov, kudi umwing wenen atatuku anch mwanend wamwit insh, ndiy ukumwinkish nnak? Ap anch mwanend wamwit diy, ov, ndiy ukumwinkishay kapambamb? Anch en udianyap nchik ayimp, ukat kupanany yom yiwamp kudi anen. Chawiy Tatukwen udia mwiur ukez kupandakeshamu kupan [spiritu] utumbila kudi awonsu akata kwit!” (Luka 11:11-13) Chikasikeshin mud ik kwijik anch Tatukwetu wa mwiur uteshining malembil ni uwanyishining maswir metu!