Musadila Yehova Pakad Kampuw

1, 2. Mulong wak Yesu wamukata Mart, pakwez chom ik chiyimp chasalay chimekeshina anch wading muntu wakad kuwanyin?

ANCH watongin piur pa Mart mpanyend a Lazar, utongin anch udi muntu wa mutapu ik? Bibil ulejen anch Mart wading murund muwamp wa Yesu, ni Yesu wamukata. Chakin, Mart kadingap kusu amwinend mband wadinga ukatinay Yesu ni kulimish. Chilakej, Mariy mwanamakwend a Mart wading niyend murund nend a Yesu. Yesu wading umukatin kand makwend Mariy. (Yohan 11:5; 19:25-27) Chad mulong wak lel Yesu wamukata Mart?

² Yesu wamukata Mart mulong wading mband ukweta yisal yiwamp ni muchim wa kupan, ni wading kand kusalang midimu nakash. Pakwez cha usey nakash, Yesu wamukata mulong wading ni ritiy rikash. Witiyija yom yawonsu yafundishay Yesu, ni katadikap anch Yesu wading Mesia washilaumu. (Yohan 11:21-27) Ap mwamu, Mart wading muntu wakad kuwanyin. Mudi antu awonsu, warumbukang niyend. Chilakej, chisu chayay Yesu kuyital, Mart wading umujimedin mwanamakwend Mariy, ni wamuleja Yesu anch amuyula. Walonda anch: “Nsalejam, ov, ey umenap kwey anch, mwanamakwam wanlikinang kal midimu yawonsu amwinam? Muleja, eza ankwash!” (Tang Luka 10:38-42.) Mulong wak Mart walonda mwamu, ni chom ik tukutwisha kwilejin ku chakul chamwinkay Yesu?

MART WADING NI KAMPUW

3, 4. Chom ik chasalay Mariy chamusangaresha Yesu, ni chom ik chilejay Mart? (Tal chipich cha kwinsambishil.)

³ Yesu wasangara mulong Mart ni Mariy amutazuka kwol kwau, ni wasadina chisu chinech mulong wa kuyifundish uyakin wa usey. Mariy washakama piswimp nend, “mulong wa kutesh yom yalonday.” Wading ukatin kwilej yom yivud kudi Mulej Mujim. Mart niyend wasota kumutesh Yesu. Yesu wafanyina kumubaz mulong wimika midimu yading yisadinay mulong wa kumutesh.

⁴ Pakwez Mart wading ni kampuw. Wading ukwatiken ni kwisuk yakudia ya Yesu ni kusal yom yikwau yivud mulong wa kuwapish dichuku dinidia. Pamanay anch Mariy kamukwashinap, wamujimena ni wamwinanina Yesu. Yesu wading wij anch Mart niyend wasala yom yivud, chawiy chamulejay anch: “Mart, Mart! Ey unenganen ni kwiyakamish mulong wa midimu yivud.” Wamuleja kand anch yakudia yikemp yikutwish kwau kuwanyin. Chawiy lel Yesu wamubaza Mariy mulong wading umuteshin nawamp. Yesu walonda anch: “Mariy watondang kal chom chiwamp, chakad kwez kumutambul.” Mariy wafanyina pamwingap kuvuramen yakudia yadiau, pakwez kafanyinap kuvuramen yom yilejay ni yamulejau kusal kudi Yesu. Kupwa kwa mivu 60, kambuy Yohan wafunda anch: “Yesu wamukata Mart, ni mwanamakwend Mariy.” (Yohan 11:5) Mazu minam mamekeshin anch Mart witiya chiyul chiwamp cha Yesu ni wamusadina Yehova nich kushinshaman mu mwom wend wawonsu.

5. Mulong wak chikasiken nakash nlel kushinshikin pa yom yikweta usey nakash, ni tukwakul ku chipul ik?

⁵ Mudi pasak, twij anch kudi yom yivud nlel yikutwisha kutuletin kampuw mulong wa kutukangesh kumusadin Yehova. Nimero wa Chinong cha Kalam cha 15 ngond wa 9, 1958, chayibabesha akadivar nau anambaz anch kangal alik tekinoloji ayiletina kampuw mu mudimu wa Yehova. Ap chisu chinicha, chimeken anch kwabudikang yom yisu dichuku diawonsu. Yom mudi magazet, ma radio, ma filim, ni ma televizion yikalaku nakash. Chinong cha Kalam chalonda anch pitusejina piswimp ni disudiel dia ditenchik dined, “yom yiletina kampuw yikuvulijan nakash.” Nlel unou, kusutamu pasak, kudi yom yivud yikutwisha kutuletin kampuw. Chom ik tukutwisha kusal mulong wa kwikal mudi Mariy ni kushinshikin pa kumwifukwil Yehova?

KANGAL KUSADIN NAKASH YOM YA MANGAND

6. Mutapu ik wasadinau antu Yehova tekinoloji?

⁶ Antu a Yehova akat kusadin tekinoloji wa mangand mulong wa kulejan rusangu ruwamp. Chilakej, kurutu ni chisu cha njit ja kusambish ja mangand mawonsu, amekesha filim “Photo-Drame de la Création.” Mu kusadin yipich ni mafilim miswimp makweta ulombu pamwing ni mizik, alejana rusangu ruwamp kudi ma miliyon ma antu mu jingand jivud. Chikunku cha nsudiel cha “Photo-Drame” charumburila chirungu cha chisambu chisu chikuyikelay Yesu Kristu pa mangand. Kupwa, antu a Yehova asadina radio mulong wa kupalangesh rusangu ra Want kudi ma miliyon ma antu pa mangand mawonsu. Nlel unou, tukat kusadin ordinater ni Internet mulong wa kuyikimb antu kwawonsu kudiau, ap anch adi kulemp.

7. (a) Mulong wak chidi cha ubaj kusadin nakash yom ya mangand? (b) Chom ik tufanyidina kubabel nakash? (Tal mazu ma kwinshin.)

⁷ Bibil utubabeshin anch kangal twasadin nakash yom ya mangand. Pakach pa yom yiney padi kusutish chisu nakash ku yom yiletinau kudi mangand minam. (Tang 1 Korint 7:29-31.) Yom yimwing ya mangand yiyipinap, pakwez yikat kusend chisu chivud. Chilakej, tukutwish kusanger kwipuwangej, kutang ma buku, kutal televizion, kuya kutal jindond jiwamp, mu sok mujim, ni kwikal ni yom ya katat ap ya usey. Yom yivud mudi kwambamb ku internet, kufund ma mesaj ap ma e-mail, kukimb jinsangu jisu ap kwijik jinsangu ja masengan. Pakwez amwing akutwish kwov nayimp anch kasadididinap yom yiney. (Mulej 3:1, 6) Anch twasadin chisu chetu chivud ku yom yakad usey, tukutwish kubabel yom ya usey mudi difukwil dia Yehova.​—Tang Efes 5:15-17.

8. Mulong wak chidi cha usey kulik kukat yom ya mangand?

⁸ Satan usadin yawonsu yitwishikena mulong wa kutupwitin ku yom ya mangand mend ni kutukangesh kumusadin Yehova. Satan wasala mwamu mu mivu chitot ya kusambish, ni nlel usadin kand mwamu nakash. (2 Timote 4:10) Chawiy tufanyidin chisu chawonsu kushinshikin mutapu tumena yom ya mangand ni kusal usu wa kuswimp. Bibil utulejin anch tufanyidinap kukat yom ya mangand. Pakwez, tufanyidin kasikesh rukat retu mulong wa Yehova. Anch twasal mwamu, chikutuswapel kumuziyil Yehova ni kusej piswimp nend.​—1 Yohan 2:15-17.

SHINSHIKIN PA YOM YA USEY NAKASH

9. Chom ik chayifundishay Yesu in kwilejend kushinshikin, ni mutapu ik washay chilakej?

⁹ Mudi mwamulejau Mart anch kangal wiyakamish ni yom yivud, Yesu wayifundisha kand in kwilejend kusal mwamu. Wayikasikesha kushinshikin pa kumusadin Yehova ni Want wend. (Tang Mateu 6:22, 33.) Yesu amwinend washa chilakej chiwamp. Kadingap kwend ni yom yivud, ni kadingap ukwet chikumbu.​—Luka 9:58; 19:33-35.

10. Chilakej ik chiwamp chatushilay Yesu?

¹⁰ Yesu kalikap chom ap chimwing chimuletina kampuw mu mudimu wa kulejan. Chilakej, kwinsambishil kwa mudimu wend wa kulejan, chisak cha antu a mu Kapernaum chasota anch Yesu ashakama chisu chilemp mu musumb wau. Chom ik chasalay? Washinshikina pa chisend chend. Walonda anch: “Chifanyidin am kurumburil Rusangu Ruwamp ra Want wa Nzamb mu mal makwau kand, wawiy mulong wantuminay Nzamb.” (Luka 4:42-44) Yesu wendanga ma kilometre mavud mulong wa kulejan rusangu ruwamp ni kuyifundish antu avud. Wading muntu uwanyidina, pakwez waziyang ni wading ukwet kuswir kwa kupim mulong wasalang mudimu nakash.​—Luka 8:23; Yohan 4:6.

11. Chom ik chasalay Yesu pamwipulau kudi muntu piur pa mulong wend? Chom ik chayifundishay Yesu in kwilejend?

¹¹ Kupwa, padingay Yesu kuyifundish in kwilejend malejan ma usey, muntu umwing wamukaturija ni kumulej anch: “Mulej, muleja mwanamakwam chakwel twangan nend dipit diatushilay tatukwetu.” Yesu kapakishap kwiyandjik mu mulong wa muntu winou. Mulong winou wamukangeshap kuyifundish in kwilejend. Pakwez, wasadina chisu chinech mulong wa kuyifundish anch, ang akimb ching kwikal ni yom yivud, kakutwishap kumusadil Nzamb nawamp.​—Luka 12:13-15.

12, 13. (a) Chom ik chasalay Yesu chayishimwokisha in Grek mu Yerusalem? (b) Mutapu ik wakulay Yesu pamulejau kudi Filip anch antu amwing asotin kwambamb nend?

¹² Machuku mansudiel ma mwom wa Yesu mading ma yakamish. (Mateu 26:38; Yohan 12:27) Wading wij anch ukuman mar nakash ni ukufa. Wading kand wij anch ukwet mudimu ujim wa kusal kurutu kwa kufa. Chilakej, Diarubing dia 9 Nisan, Yesu wandama mu Yerusalem ukandamin pa chimbur. Chisak cha antu chamwaka mudi Mwant wau. (Luka 19:38) Chikwacha, Yesu wayopata nich mushiku antu ading kulandish mu tempel ni ading kuyiy antu nfalang jau.​—Luka 19:45, 46.

¹³ In Grek amwing eza kusal musambu wa Pasak mu Yerusalem, amana yom yasalay Yesu ni ashimwoka. Chawiy chamwipulau kambuy Filip anch akutwish kwambamb nend Yesu. Pakwez, Yesu kapakishap kwambamb nau antu asota kumukwash ni kumuchidij kudi akankuny nend. Wading wij chom chading cha usey. Washinshikina pa kusal rusot ra Yehova, kupan mwom wend mudi mulambu. Chawiy chayivurishay in kwilejend anch wading piswimp ni kufa ni awonsu amulondwila afanyidin niyawiy kwipan. Walonda anch: “Muntu mwawonsu ukata kukat ching mwom wend kusu amwinend, kwisudiel ukez kuushadish. Pakwez muntu mwawonsu wakad kukat ching mwom wend kusu amwinend pa mangand minam, kwisudiel ukez kuulam djat ni ku mwom wa chikupu.” Pakwez Yesu wayikana kand anch ‘Tatuku ukez kuyilimish’ in kwilej a Yesu ni kuyinkish mwom wa chikupu. Filip wafanyina kuyikasikesh in Grek inay ni mazu minam.​—Yohan 12:20-26.

14. Ap anch Yesu wateka pa ndond ya kusambish mudimu wa kulejan, yom ik yikwau yasalay?

¹⁴ Padingay Yesu pansh, mudimu wend ujim wading wa kulejan rusangu ruwamp. Ap anch wipana mu kulejan, katonginangap ching pa mudimu winou. Chilakej, waya ku musambu wa uruw kwakarumunay mem kwikal maar mawapina nakash. (Yohan 2:2, 6-10) Wasangera kand yakudia yamutazukinau kudi arund nend ni antu akwau asangerang rusangu ruwamp. (Luka 5:29; Yohan 12:2) Cha usey, Yesu witekinang kand chisu mulong wa kulembil, kutongijok ni kupim.​—Mateu 14:23; Marko 1:35; 6:31, 32.

“TUDIOSHANY ULIM WAWONSU”

15. Chom ik chalonday kambuy Paul chifanyidinau in Kristu kusal, ni mutapu ik washay chilakej chiwamp?

¹⁵ Kambuy Paul walonda anch in Kristu adi mudi in kubambel ayila mau mwi njil yilemp ni afanyidina kushik kwinsudiel pakad kulik anch chom ap chimwing chiyikangesha ap chiyimika. (Tang Hebereu 12:1.) Paul amwinend washa chilakej chiwamp. Wafanyina kwikal mpich ni muntu wijikena nakash mudi ntakel wa relijon wa in Yuda, pakwez walika yom yiney ni washinshikin pa “yom yipandakena kuwap.” Wasala nakash mudimu wa kulejan ni wasala ma weny mwi ndond jivud, mudi mu Siria, Aziy Mukemp, Makedonia, ni mu Yudeya. Paul washinshikina pa difut diend dia kutambul mwom wa chikupu mwiur. Walonda anch: nikasikeshin nich “usu wam wawonsu chakwel nitambul yom yezila kurutu. Chawiy chiniyidila mau salal djat ni kwisudiel chakwel nitambul chom cha usey chikupanay Nzamb.” (Filip 1:10; 3:8, 13, 14) Paul wading mujich, ni chinech chamukwasha ‘kumusadil Mwant mudimu ni muchim umwing.’​—1 Korint 7:32-35.

16, 17. Ap anch tudi angatan ap bwat, mutapu ik tukutwisha kulondul chilakej cha Paul? Mutapu ik wasalau Mark ni Claire mwamu?

¹⁶ Mudi Paul, atushalapol amwing a Yehova a nlel akat kulik kwatan chakwel atwisha kusal yom yivud mu mudimu wa Yehova. (Mateu 19:11, 12) Ajich kakwetingap yisend yivud ya dijuku mudi angatan. Pakwez ap anch tudi angatan ap bwat, etu awonsu tukutwish ‘kudiosh ulim wawonsu’ ukutwisha kutukangesh kumusadin Yehova. Tufanyidin kuswimp yisalijok yetu chakwel twipuka kusutish chisu ni tushikena kusal yom yivud mu mudimu wa Yehova.

¹⁷ Chilakej, Mark ni Claire, apamina mu Pays de Galles, asambisha uchibol papwishau shikol. Kupwa kwa kwatijan, adandamena ni mudimu wa uchibol. Pakwez asota kusal yom yivud. Mark urumburil anch: “Twatwisha kuswapej mwom wetu pa kusha chikumbu chetu ni kusal mudimu wa chisu chikemp chakwel tutwisha kusal mudimu wa rutung wa pa mangand mawonsu.” Kusut kwa mivu 20, asala ma weny mu jingand jivud ja mu Afrik mulong wa kukwash kutung Yot ya Want. Yisu yimwing aburenang nfalang, pakwez Yehova wadandamena kuyikwash. Claire walonda anch: “Chitusangareshin nakash kusutish dichuku diawonsu mu mudimu wa Yehova. Twikala ni arund avud nakash ni twaburenap chom ap chimwing. Tukutwishap kwisikej yom yikemp yitwasha ni musangar udiokila mu kumusadin Yehova chisu chawonsu.” Atushalapol avud a chisu chawonsu akat kwiyov niyawiy mwamu.a​—Tal mazu ma kwinshin.

18. Yipul ik tufanyidina kwiyipul?

¹⁸ Ukweting kamu musangar mu mudimu wa Yehova? Kudi yom yikukangeshina kusal yom yikweta usey nakash? Anch chidi mwamu, chom ik ukutwisha kusal? Pamwing ap ukutwish kurijek mutapu wey wa kutang ni wa kwilej Bibil. Mutu wa mulong ulondwilaku ou ukurumburil mutapu ukutwisha kusal mwamu.