“Tuwejinaku Ritiy”

1. Ritiy rikwet usey ik? (Tal chipich cha kwinsambishil.)

WIYIPULAP kal anch: ‘Yehova ukwimpandish kamu chisu cha mar makash?’ Kambuy Paul walonda anch ritiy udi mwikadil umwing wa usey tufanyidina kwikal nich mulong wa kupand. Walonda anch: “Wakad ritiy muntu kakutwishap kumusangarish Nzamb.” (Hebereu 11:6) Chikutwish kwikal chiswapela, pakwez uyakin udia anch “kadiap antu awonsu akweta ritiy.” (2 Tesalonik 3:2) Ma verse minam maad matukwashin kwijik mulong wak chidi cha usey kukasikesh ritiy retu.

2, 3. (a) Ritiy retu rikwet usey ik? (b) Yom ik tukwisambina?

² Kambuy Pita walonda piur pa ritiy ‘ripakinau’. (Tang 1 Pita 1:7.) Mar makash madi piswimp ap, ni tufanyidin kwikal “mu chisak cha antu akweta ritiy chakwel tupanda.” (Hebereu 10:39) Chawiy lel, tufanyidin kusal usu nakash mulong wa kukasikesh ritiy retu. Tufanyidin kwikal pakach pa antu akufutau chisu chikwezay Yesu Kristu, Mwant wetu. Chikwau kand, mudi muntu wamwita Yesu chakwel ikala ni ritiy rikash, niyetu tukutwish kwit anch: “Nkwasha chakwel ritiy ram ruwanyin!” (Marko 9:24) Ap, mudi atwimbuy, tufanyidin kulond niyetu anch: “Tuwejinaku ritiy.”​—Luka 17:5.

³ Mu mutu wa mulong winou, tukushinshikin yom yiney: mutapu tukutwisha kukasikesh ritiy retu, mutapu tukutwisha kumekesh anch ritiy retu ridi rikash, ni mulong wak tufanyidin kwikal nich kashinsh anch Nzamb ukwakul anch twamwit kutuwejinaku ritiy.

NZAMB UKWET MUSANGAR ANCH TWAKASIKESH RITIY RETU

4. Yilakej ik yikutwisha kutubachik kukasikesh ritiy retu?

⁴ Mulong ritiy rikwet usey nakash, Yehova watwinkisha yilakej yivud ya ritiy yidia mu Bibil. Yilakej yiney “ayifunda mulong wa kutufundish.” (Rom 15:4) Chilakej cha Aburaham, Sara, Isak, Jakob, Moses, Rahab, Gidion, Barak, ni yikwau yivud yikutwish kukasikesh ritiy retu. (Hebereu 11:32-35) Kuwejinaku yilakej ya pasak, tukwet kand yilakej yikwau ya ritiy yishimokishena ya akadivar nau anambaz netu a nlel.a (Tal mazu ma kwinshin.)

5. Mutapu ik wamekeshay Elija anch ukwet ritiy rikash mudiay Yehova, ni chom ik tufanyidina kwiyipul?

⁵ Chilakej chimwing cha Bibil chidi cha muprofet Elija. Anch watongijokin pa chilakej chend, shinshikin yom yitan yamekesha anch ukwet ruchingej rikash mudiay Yehova. (1) Pamulejau Mwant Akab kudi Elija anch Yehova ukulet chishipu, walonda nich kashinsh anch: ‘Mudi mudiay mwom Yehova Nzamb wa in Isarel unikata kusadil, kukwikalap maum ap ruvul.’ (1 Ant 17:1) (2) Elija witiyija anch Yehova wafanyina kumwinkish ndiy ni antu akwau yom yadingau nich kuswir chisu cha chishipu. (1 Ant 17:4, 5, 13, 14) (3) Elija wading kand nich kashinsh anch Yehova ukumuvumbul mwan wa mwadiamufu. (1 Ant 17:21) (4) Katadikap ap anch kasu ka Yehova kafanyina kutemish mulambu wend ku Mukand wa Karimel. (1 Ant 18:24, 37) (5) Ap kurutu kwa ruvul kunak, Elija wamuleja Akab nich kashinsh anch: “Yang, udia ni kuna, mulong katat novil chonyin cha ruvul.” (1 Ant 18:41) Chawiy, kupwa kwa kushinshikin yom yiney, tukutwish kwiyipul anch: ‘Ritiy ram ridi rikash mudi ra Elija?’

CHOM IK TUKUTWISHA KUSAL MULONG WA KUKASIKESH RITIY RETU?

6. Chom ik tufanyidina kumwit Yehova mulong wa kukasikesh ritiy retu?

⁶ Mulong chikasiken kukasikesh ritiy ni usu wetu ayinetu, chawiy tufanyidin kumwit Nzamb mwiku utumbila. Mulong wak? Mulong ritiy chidi chikunku cha dibuj dia mwiku utumbila. (Galatia 5:22) Tukwikal ni manangu anch twalondul chiyul cha Yesu cha kulembil mulong wa kwit mwiku utumbila. Yesu washilamu anch Yehova ukez “kupan Mwiku Utumbila kudi awonsu akata kwit.”​—Luka 11:13.

7. Rumburil mutapu tukutwisha kulam ritiy retu rikash.

⁷ Anch twikal ni ritiy rikash mudiay Nzamb, tufanyidin kurilam. Tukutwish kufanikesh ritiy nich kasu. Anch twakish kasu, mizuzu yikutwish kuvul. Pakwez, anch twalik kuwej nkuny ku kasu, kakutwish kujim kwau. Pakwez, anch twawejinaku nkuny, kasu kakudandamen kuzut nakash. Chidi chilik chimwing ni ritiy. Anch twadandamen kutang ni kwilej Dizu dia Nzamb pichuku pichuku, rukat retu piur pa Yehova ni Bibil rikukul. Mudi chibudikin, tukulam ni tukukasikesh ritiy retu.

8. Chom ik chikukukwasha kukasikesh ni kulam ritiy rey?

⁸ Tufanyidinap ching kusanger yom twileja kurutu kwa kutambul dibatish. (Hebereu 6:1, 2) Chilakej, kwilej uprofet wa Bibil wawanyina kal kukukwash kukasikesh ni kulam ritiy rey. Ukutwish kand kusadil Dizu dia Nzamb mulong wa kuman anch ritiy rey ridi rikash kamu.​—Tang Jakobu 1:25; 2:24, 26.

9, 10. Mutapu ik tukukasikesha ritiy retu kusutil (a) arund awamp? (b) yikumangan ya chikumangen? (c) kulejan rusangu ruwamp?

⁹ Kambuy Paul walonda anch in Kristu akutwish ‘kukasikeshijan mu ritiy umwing ni mukwau.’ (Rom 1:12) Chirumburikin ik? Anch twasutish chisu pamwing ni akadivar nau anambaz, tukutwish kukasikesh ritiy ra umwing ni mukwau. Chinech chidi chakin anch twasutish chisu ni antu akweta ritiy ‘ripakinau.’ (Jakobu 1:3) Arund ayimp akat kuyipish ritiy retu, pakwez arund awamp akat kurikasikesh. (1 Korint 15:33) Chawiy chituyudinau kukumangan chisu chin chawonsu ku yikumangan. Mulong kwinikwa, tukutwish kudandamen “kukasikeshijan muntu ni mukwau.” (Tang Hebereu 10:24, 25.) Chikwau kand, malejan tutambwila ku yikumangan makat kukasikesh ritiy retu. Bibil ulondin anch “Ritiy rikat kudiokal ku yom yikat kuteshau.” (Rom 10:17) Chawiy lel, iyipula anch: ‘Yikumangan ya win Kristu yiding ya usey mu mwom wam?’

¹⁰ Tukasikeshin kand ritiy retu pitulejena ni pitufundishina rusangu ruwamp ra Bibil kudi antu akwau. Mudi in Kristu a pakur, twilejin kumuchingejin Yehova ni kulond nich mushiku ni chisu chawonsu.​—Midimu 4:17-20; 13:46.

11. Mulong wak Kaleb nend Joshua ikala ni ritiy rikash, ni mutapu ik tukutwisha kuyimburij?

¹¹ Ritiy retu mudiay Yehova rikudin pitumena mutapu utukwashinay ni mutapu wakwilay ku malembil metu. Chawiy chamushikena Kaleb nend Joshua. Amekesha ritiy mudiay Yehova payau kutentish Ngand ya Kushilamu. Mu kusut kwa mivu, ritiy rau rikala rikash chisu chin chawonsu chamanangau mutapu mwayikwashangay Yehova. Joshua watwisha kuyilej in Isarel nich kashinsh anch: “Kushilamu kwawonsu kuwamp kwashilayimu [Yehova] Nzamb wen kudi en, kwikil chom ap kusu chimwing chaburena kuwanyin.” Kupwa walonda anch: ‘Chawiy katat mwovany Yehova wom, musadilany ndiy nich muchim wa kashinsh ni ujijamena.’ Ni wawejaku anch: “Pakwez am ni chikumbu cham tukumusadil [Yehova].” (Joshua 23:14; 24:14, 15) Anch twamuchingejin Yehova ni anch twaman mutapu utukwashinay, ritiy retu rikukasikan.​—Kuseng 34:8.

MUTAPU TUKUTWISHA KUMEKESH RITIY RETU

12. Mutapu ik tukata kumekesh anch tukwet ritiy rikash?

¹² Mutapu ik tukata kumekesh anch tukwet ritiy rikash? Mwin kwilej Jakobu ulondin anch: “Nikukulej yisalijok yam yiwamp, kwawiy kumekedina ritiy ram.” (Jakobu 2:18) Yisalijok yetu yikat kumekesh anch tukwet ritiy rikash. Tumanany amboku mutapu ik mwamu.

13. Mutapu ik tukata kumesh ritiy retu chisu chitulejena?

¹³ Kulejan udi mutapu uwamp nakash wa kumekesh ritiy retu. Mulong wak? Mulong chisu chitulejena, tumekeshin anch twitiyijin anch disudiel didi piswimp ni anch ‘dikulabap, bwat.’ (Abakuk 2:3) Mulong wa kwijik anch ritiy retu ridi rikash, tufanyidin kwiyipul anch: ‘Usey ik ukweta kulejan kudi am? Nikat kusalang yawonsu yitwishikena mulong wa kuyilej antu akwau piur pa Nzamb? Nisadining usu wa kusal yom yivud mu mudimu wa Yehova?’ (2 Korint 13:5) Tumekeshany amboku ritiy retu rikash pa “kulond ku kan patok kudi antu,” kusutil ku kulejan rusangu ruwamp.​—Tang Rom 10:10.

14, 15. (a) Mutapu ik tukutwisha kumekesh ritiy mu mwom wetu? (b) Pan uman wa yom yasadika umekeshina ritiy rikash.

¹⁴ Tukat kumekesh kand ritiy retu mudiay Yehova pitukata kujijamen yakamish ya mwom mu mangand minam. Anch tudi atuzwendj, ayej, aziyina, anenganena, ap akweta milong yikwau, tufanyidin kwikal ni ritiy mudiay Yehova nend Yesu anch ‘akutukwash pa chisu chitukweta kuswir.’ (Hebereu 4:16) Tumekeshin ritiy mudiay Yehova chisu tumwitina ukwash. Yesu walonda anch tukutwish kumwit Yehova chakwel atwinkisha “yakudia yetu ya pichuku pichuku.” (Luka 11:3, TMK) Jinsangu jidia mu Bibil jimekeshin anch Yehova ukutwish kutwinkish yawonsu tuswirikedina. Chilakej, chirung cha chishipu mukash mu Isarel, Yehova wamwinkisha Elija yakudia ni mem. Bibil ulondin anch: “Ankwaj amutwadilanga mabot ni mbij pamanch ni urel, wading ni kuna mem ma mu wit.” (1 Ant 17:3-6) Tukwet ritiy anch Yehova ukutwish kutwinkish kand niyetu yom tuswirikedina.

¹⁵ Tukwet kashinsh anch ang twasadin yany ya Bibil, tukutwish kuwanyish maswir ma dijuku dietu. Rebecca, nambaz udia mu Asie, urumburil mutapu wasadilau mu dijuku diau yiyul yidia mu Mateu 6:33 ni mu Jinswir 10:4. Ulondin anch nfumwend wamana anch mudimu wend utekin urund wend ni Yehova mu ubaj. Chawiy lel, walika mudimu wend. Mulong wa kuyibangin anau anying, asambisha kulandish yakudia. Mudi chibudikin cha mudimu wau ukash, ikala ni makut mawanyidina mulong wa kubangin maswir ma dijuku. Nambaz winou ulondin anch: “Twamana anch Yehova katulikap. Twalalap ni nzal dichuku ap dimwing.” Ukwet niyey uman wa mutapu mudi winou ukutwisha kukasikesh ritiy rey?

16. Chom ik chikushikena anch twamuchingejin Nzamb?

¹⁶ Anch twalondul umutakel wa Yehova, ndiy ukez kutukwash chakin kamu. Paul wajimbula mazu ma Abakuk palonday anch: “In kutentam akez kapand mulong wa ritiy rau.” (Galatia 3:11; Abakuk 2:4) Chawiy tufanyidina kwikal ni ritiy rikash mudiay Muntu ukutwisha kutukwash. Paul utuvurishin anch Nzamb ‘ndiy ukutwisha, mulong ku ukash wend udia mu etu, ndiy ukutwish kusal yom yivud yipandakena yipul yetu ap yom yitutongila.’ (Efes 3:20) Atushalapol a Yehova akat kusal yawonsu yitwishikena mulong wa kusal rusot ra Nzamb, pakwez ij kand anch kakutwishap kusal yawonsu. Tumujikitishin Yehova mulong udi pamwing niyetu ni ukat kuyukish usu wetu tusadina.

YAKUL KU MALEMBIL MA RITIY

17. (a) Mutapu ik wayakulay Yesu atwimbuy end? (b) Mulong wak tukutwish kuchingej anch Yehova ukwakul ku malembil metu ma ritiy?

¹⁷ Mudi yom yitwashinshikina kal ey, tukutwish kwiyov mudi mwiyovau atwimbuy pamwitau Yesu anch: “Tuwejinaku ritiy.” (Luka 17:5) Yesu wayakula atwimbuy end mu mutapu uwamp chisu cha Pentekot wa muvu wa 33, patambulau mwiku utumbila ni pashikenau kutesh nawamp rutong ra Nzamb. Chakasikesha ritiy rau. Chom ik chashikena? Asambisha chisu chinicha kampany mujim wa kulejan. (Kolosay 1:23) Tukutwish niyetu kuchigej anch malembil metu ma ritiy akutwish kumakul? Yehova washilamu anch chikutwish kusadik mwamu anch ‘twamwit mudi mudia rusot rend.’​—1 Yohan 5:14.

18. Mutapu ik ukatay Yehova kuyukish antu akata kukasikesh ritiy rau?

¹⁸ Anch tukwet ritiy rikash kamu mudiay Yehova, ukwikal ni musangar piur petu. Ukwakul ku malembil metu ma kwit ritiy, ritiy retu rikwikal ni tukwikal “antu awanyidina kwandam mu Want wend.”​—2 Tesalonik 1:3, 5.