Ukat Kuman Chikas cha Nzamb mu Mwom Wey?

1, 2. Chom ik chitonginingau antu amwing piur pa Nzamb?

ANTU avud itiyijining anch Nzamb kakatap kushinshikin pa yisalijok yau. Atongining anch Nzamb kakatap kubangin piur pa yom yikata kuyishiken. Chilakej, kupwa kwa rinkind mukash kushesh chikunku chijim cha ngand ya Philippines mwi ngond wa 11, takel wa musumb umwing ujim walond anch: “Nzamb ukutwish kwikal ndond kanang.”

² Antu akwau atongining anch Nzamb kakutwishap kuman yom yisadinau. (Isay 26:10, 11; 3 Yohan 11) Antu amwing a pa chirungu cha Paul niyau atongang mwamu. Walonda piur pau anch: “alikin kumwijik Nzamb.” Ading antu akad kutentam, ayimp, in ris.​—Rom 1:28, 29.

3. (a) Yipul ik tufanyidina kwiyipul? (b) Mu Bibil, ‘chikas’ cha Nzamb chimekeshin ik?

³ Chidi mutapu ik piur petu? Twij anch Yehova umening yom yawonsu tusadina. Pakwez, twitiyijining anch Yehova ukat kutubangin? Tumening ukwash wend mu mwom wetu? Mu Bibil, “chikas [NWT]” cha Nzamb yisu yivud chikat kumekesh ukash wend. Ukat kusadil ukash wend mulong wa kuyikwash atushalapol end ni kuyishesh akankuny end. (Tang Kuvurik Yijil 26:8.) Yesu walonda anch antu amwing akez “kumuman Nzamb.” (Mateu 5:8) Tudi pakach pa antu inay? Mutapu ik tukutwisha “kumuman Nzamb”? El amboku twilejany yilakej ya mu Bibil ya antu amana chikas cha Nzamb mu mwom wau ni akanganya kuchiman. Tukwilej kand mutapu ukutwish ritiy kutukwasha kuman chikas cha Nzamb.

ALIKA KUMAN CHIKAS CHA NZAMB

4. Mulong wak akankuny a in Isarel alika kuman chikas cha Nzamb?

⁴ Pasak, antu ading ni mutapu wa kuman ap kutesh mutapu wayikwashay Nzamb in Isarel. Yehova wasadila yilay mulong wa kuyikol antwend kudiokal mu Idjibit ni kushesh ant avud a mwi Ngand ya Kushilamu. (Joshua 9:3, 9, 10) Ap anch ant akwau atesha ni kuman mutapu wayipandishay Yehova antwend, “akumangana pamwing nich muchim umwing, mulong wa kurish nend Joshua ni in Isarel.” (Joshua 9:1, 2) Parishau nau in Isarel, ant inay atwisha kuman chikas cha Nzamb. Ku ukash ujim wa Yehova, “muten wimana ni ngond wimana kand zong, djat kamu ni payifundakeshinau akankuny kudi in Isarel.” (Joshua 10:13) Pakwez Yehova walika michim ya akankuny a in Isarel ‘yichinchika,’ chawiy charishau nau in Isarel. (Joshua 11:20) Ayishesha akankuny a in Isarel mulong alika kwitiyij anch Yehova wading kuyirishin antwend.

5. Chom ik chalikay kwitiyij Mwant muyimp Akab?

⁵ Kupwa, Mwant muyimp Akab wikala ni mutapu wa kuman chikas cha Yehova tupamp tuvud. Elija wamuleja anch: “Kukwikalap maum ap ruvul, ching nalond dizu diam.” (1 Ant 17:1) Chafanyina kusadik mwamu mulong wa chikas cha Nzamb, pakwez Akab kitiyijap. Kupwa, Elija wamulembila Yehova, ni Nzamb wamwakula pa kutum kasu kudiokal mwiur. Akab wamana chom chinech. Chad, Elija wamuleja Akab anch Yehova wafanyina kupwish chishipu ni kunakish ruvul. (1 Ant 18:22-45) Akab wamana yilay yawonsu ni wadandamena kulik kwitiyij anch wamana ukash wa Yehova. Chom ik twilejina ku yilakej yiney? Tufanyidin kukimb chikas cha Yehova mu mwom wetu.

AMANA CHIKAS CHA YEHOVA

6, 7. Chom ik chitiyijau in Gabayon ni Rahab?

⁶ In Gabayon ashalijana nakash ni michid yadinga yiyinyingumukina. Amana chikas cha Nzamb. Pa ndond pa kuyirishish in Isarel, in Gabayon asota kusal nau chisambu. Mulong wak? Alonda anch, atesha piur pa Yehova ni yom yawonsu yasalay. (Joshua 9:3, 9, 10) Chading cha manangu kudi awiy kwitiyij anch Yehova wading kuyirishin in Isarel.

⁷ Rahab wamana niyend chikas cha Yehova. kadingap mwin Isarel, pakwez watesha piur pa mutapu wayikolay Yehova in Isarel mu Idjibit. Pezau in kutentish kol kwend, wayileja anch: “Am nij anch [Yehova, NWT] wakwinkishinany kal en in Isarel ngand yiney.” Rahab witiyija anch Yehova wafanyina kumupandish ndiy ni dijuku diend. Wamekesha ritiy rend mudiay Yehova ap anch wijika anch kusal mwamu chading chom cha ubaj.​—Joshua 2:9-13; 4:23, 24.

8. Mutapu ik wamanau in Isarel amwing chikas cha Nzamb?

⁸ Chinyim ni Mwant muyimp Akab, in Isarel amwing amana kasu kadiokala mwiur mudi mwalembilay Elija, itiyija anch Nzamb ndiy wasala mwamu. Atoya anch: ‘Yehova udi Nzamb wakin!’ (1 Ant 18:39) Chimeken patok anch kudi awiy amana ukash wa Nzamb.

9. Mutapu ik tukutwisha kumuman Yehova ni chikas chend nlel?

⁹ Twashinshikin kal yilakej yiwamp ni yiyimp yitukwashina kutesh chirumburikina “kumuman Nzamb” ap kuman chikas cha Nzamb. Anch twashiken ku kumwijik Yehova ni mikadil yend, tumen chikas chend ni ‘mes ma michim yetu.’ (Efes 1:18) Chom chinech chikutubachik kuyimburij antu ashinshamena a pasak ni a nlel amana mutapu wayikwashay Yehova antwend. Pakwez, tukweting kashinsh anch Nzamb uyikwashining antwend nlel unou?

MUTAPU UMEKENA CHIKAS CHA NZAMB NLEL

10. Uman ik tukweta umekeshina anch Yehova uyikwashin antu nlel? (Tal chipich cha kwinsambishil.)

¹⁰ Tukwet uman uvud umekeshina anch Yehova udandamedin kuyikwash antu nlel. Tuteshining uman wa antu ita ukwash wa Nzamb mu mwom wau ni atambula yakul ku malembil mau. (Kuseng 53:2) Chilakej, padingay kulejan mu ditung dikemp mu Philippines, Allan wasankanijan ni maku umwing wasambisha kutoy. Allan ulondin anch: “Pamanch, maku winou wamulembila Yehova chakwel asankanijana ni Kaman.” Padingay changadim, wileja Bibil ni Atuman, pakwez pamwatau ni pabukay mu ditung diadingay, kadandamenap kand kwilej Bibil. Nzamb wakula swaa malembil mend chakin kamu. Mu angond akemp, wipana kudi Yehova ni watambula dibatish.

11, 12. (a) Mutapu ik ukatay Yehova kuyikwash atushalapol end? (b) Rumburil mutapu wamukwashay Yehova nambaz umwing.

¹¹ Atushalapol avud a Yehova amana ukwash wend palikau yisalijok yiyimp yadingau kusal kurutu ikal atushalapol a Nzamb mudi kuna ruwand, kusadin yom ya ulemb, ap kutal pornografi. Amwing alondin anch apakisha kulik yisalijok yiney ku usu wau, pakwez katwishap kwau. Chad, pitau ukwash wa Yehova, wayinkisha “ukash upandakena ukash wawonsu,” ni atwisha kulik yisalijok yau yiyimp.​—2 Korint 4:7; Kuseng 37:23, 24.

¹² Yehova uyikwashin kand atushalapol end kurish nich milong yau. Chom chinech chamushikena Amy. Amutuma kukwash mulong wa kutung Chot cha Want ni chikumbu cha amishoner mu ditung dikemp dia Océan Pacifique. Yaku yading yishalijadin ni ya kol kwau, kwadingap chisu chawonsu kasu ka nzembu ap mem mawamp, ma balibal mading mizwil ni mem, dijuku diend diading kulemp, ni wading ushich mu chikumbu chikemp cha angendj. Dichuku dimwing, wamutoyina nambaz wading kusalay nend mudimu pamwing. Wova nayimp nakash mulong wa yom yasalay. Pachirikay uchuku ku chikumbu, wamulembila Yehova ni kumwit ukwash. Kupwa, peza kasu ka nzembu, watanga mutu wa mulong umwing mu Chinong cha Kalam wisambidina piur pa shikol ya Gilead. Mutu wa mulong wisambina piur pa milong yimwing yadingay kurish nich. Ulondin anch: “Uchuku winiwa, namana anch Yehova wading ulondin ni niyam. Chom chinech chambachika kudandamen mu mudimu wam.”​—Kuseng 44:25, 26; Isay 41:10, 13.

13. Uman ik tukweta umekeshina anch Yehova uyikwashin antwend kuchidij mbil yau ya kulejan?

¹³ Yehova uyikwashin kand atushalapol end kuchidij ni kwijikish rusangu ruwamp. (Filip 1:7) Chilakej, pakata ma guvernema mamwing kupakish kwimik mudimu wa kulejan, tukat kwichidij ku dirumburish. Twawinin mu milong 268 ya dirumburish pa mangand mawonsu, milong 24 twayiwina ku Cour européenne des droits de l’homme kudiokal mu muvu wa 2000. Chimeken patok anch kwikil muntu ap umwing ukutwish kwimik chikas cha Nzamb!​—Isay 54:17; tang Isay 59:1.

14. Uman ik ukwau tukweta umekeshina anch Nzamb udi ni antwend?

¹⁴ Kulejan rusangu ruwamp pa mangand mawonsu udi uman ukwau umekeshina ukwash wa chikas cha Nzamb. (Mateu 24:14; Midimu 1:8) Ni uumwing wa atushalapol a Yehova a mu michid yawonsu utwishiken mulong wa ukwash wa Yehova. Uumwing winou udi wa pakampwil! Ap antu akad kumwifukwil Yehova akat kulond anch: “Chakin, Nzamb udi ni yenen.” (1 Korint 14:25) Tukwet uman uvud umekeshina anch Nzamb udi ni antwend. (Tang Isay 66:14.) Chidi mutapu ik kudi ey? Ukat kuman chikas cha Nzamb mu mwom wey?

UKAT KUMAN CHIKAS CHA YEHOVA MU MWOM WEY?

15. Yisu yimwing, mulong wak tukatap kuman chikas cha Yehova mu mwom wetu?

¹⁵ Yisu yimwing, tukutap kuman chikas cha Nzamb mu mwom wetu. Mulong wak? Anch tukwet milong yivud, tukutwish kuvuramen anch Yehova watukwashin kal yisu yivud. Chawiy chamushikena Elija. Wading muntu utakamena, pakwez pakimbau kumujip kudi Mwant mwad Jezabel, wova wom. Chisu chimwing, wavuramena mutapu mwamukwashau kudi Yehova. Bibil ulejen anch Elija wasota kwend kufa. (1 Ant 19:1-4) Kwisu kwafanyinay kutan ukwash ni kutakaman? Wafanyina kumuchingejin Yehova!​—1 Ant 19:14-18.

16. Mutapu ik tukutwisha kuman chikas cha Nzamb chisu tukweta milong?

¹⁶ Job washinshikina pa minan yend ni kamanap mulong wend mu mutapu waumanangay Yehova. (Job 42:3-6) Yisu yimwing, chikutwish kutukasiken kuman chikas cha Nzamb mulong wa milong yetu. Chom ik chikutwisha kutukwash kuman yom yisadinay Nzamb piur petu? Tufanyidin kutongijokin pa yom yilondinay Bibil piur pa milong yetu. Mwamu, Yehova ukumekan muntu wakin kudi etu, ni tukushiken niyetu ku kulond anch: “Nading ni kwov yeyey ching kusu ku matu, pakwez katat nakuman kal nich mes mam.”

17, 18. (a) Mutapu ik ukutwish kuman chikas cha Yehova mu mwom wey? (b) Rumburil chom chashikena chimekeshina mutapu utukwashinay Nzamb nlel.

¹⁷ Mutapu ik ukutwisha kuman chikas cha Yehova mu mwom wey? Tushinshikinany amboku yilakej yitan. Chakusambish, vurik anch Yehova wakukwasha kwijik uyakin. Chakaad, ukutwish kuvurik ku yikumangan ya win Kristu, watesha diskur dimwing, ni walonda anch, “Chawiy kamu chom nadia niswirikedina!” Chakasatu, pamwing ap wamana mutapu wakulay Yehova malembil mey. Chakanying, wakimba kumusadil Yehova nakash ni wamana mutapu wakukwashay kuwanyish rutong rey. Chakatan, pamwing ap walika mudimu wey wadinga ukusendina chisu chivud mulong wa kusal mudimu wa Yehova ni wamana kuwanyin kwa kushalamu kwa Nzamb anch: “Kinikukushap.” (Hebereu 13:5) Anch tukwet urund ukash ni Yehova, chikutuswapel kuman chikas chend mu mwom wetu.

¹⁸ Sarah, nambaz wa mwi ngand ya Kenya, walonda anch: “Nalembila piur pa mwin kwilej wam wading kasangaredinap dilejan dia Bibil. Namwita Yehova anch nafanyina kwimik kwilej nend. Kapamp kamwing kupwa kwa kulond ‘Amen,’ antazuka ku telefon. Mwin kwilej wantazuka ni kwingipul anch ukutwish kukumangan ni yamam! Nashimoka nakash!” Anch twashinshikin pa yom yisadinay Nzamb piur petu, tukuman ukwash wend. Rhonna, nambaz umwing wa mu Asie, walonda anch chading chifanyidin chisu mulong wa kuman mutapu ukatay Yehova kutukwash mu mwom wetu. Walonda kand anch: “Pakwez yawonsu usadina, chidi chom cha kushimok kujingunin mutapu ukatay kutubangin!”

19. Chom ik chikwau tufanyidina kusal mulong wa kuman chikas cha Nzamb?

¹⁹ Yesu walonda anch antu awonsu “akeza kumuman Nzamb” afanyidin kwikal “zwang mu michim.” (Mateu 5:8) Chom chinech chirumburikin ik? Tufanyidin kulam yitongijok yetu zwang ni kulik kusal yom yawonsu yidia yiyimp. (Tang 2 Korint 4:2.) Mu mutu wa mulong winou, twi lej kal anch mulong wa kuman chikas cha Nzamb, tufanyidin kukasikesh urund wetu ni ndiy. Mu mutu wa mulong ulondwilaku, tukwisambin mutapu ukutwisha ritiy kutukwash kuman nawamp chikas cha Yehova mu mwom wetu.