Kudi Am Kusej Piswimp ni Nzamb Kwading Kuwamp Kamu

PANADING ni mivu chidivu, nalepap kand. Nlel nikwet mivu 43, pakwez nikwet kwam kulep kwa metre umwing. Chisu chamanau anvaj am anch nikulepap kand, ankasikesha kusal mudimu ukash chakwel nilika kutongin chisu chawonsu pa mujimbu wam. Mulong wa kukwatikan nakash, nasala chintamb cha kulandishin mabuj piswimp ni chikumbu chetu ni kulam yom nawamp. Antu avud asambisha kwez kuland yom nakash.

Pakwez, kusal mudimu ukash kwaswimpap chom ap chimwing. Nading ching mwiswimp nakash, ni narishang ni yom yimwing ya mu mwom mudi kulep kwa chintamb cha kulandishin. Yom yawonsu yamekanang anch ayisala mulong wa antu alemp ansutinamu. Niyovilang riy amwinam, pakwez yom yaswimpa pinawanyisha mivu 14.

Dichuku dimwing, amband aad Atuman a Yehova anlandang mabuj asambisha kwilej nam Bibil. Nashikena ku kujingunin anch kumwijik Yehova ni rutong rend kudi kwa usey nakash kusutamu kushinshikin pa kulep kwam. Chom chinech chankwasha nakash. Kuseng 73:28 wikala verse nikatina nakash. Chikunku chakusambish cha verse winou chilondin anch: “Kudi am chidi chiwamp kamu kusej piswimp kudi Nzamb.”

Dijuku dietu diabuka mu Côte d’Ivoire mulong wa kuya mu Burkina Faso, ni mwom wam waswimpa nakash. Mu Côte d’Ivoire, antu ading ijididin kal ku chintamb cha kulandishin mabuj. Pakwez mwi ndond yetu yisu, nading ngendj ni antu avud anshimwokang. Antu ading kwintal nakash, chawiy najinginang mu chikumbu machuku mavud. Chad navurika mutapu chading chiwamp kudi am kusej piswimp ni Yehova. Natuma mukand ku biro wa mutiy wa Atuman a Yehova, kupwa antumina muntu muwamp. Nani, mishoner umwing, weza kwintal wading ukweta moto.

Njil jikweta usukuril ja mu mukal wetu jading jisidin nakash, ni chisu cha ruval jading jiyipin nakash. Nani wading kuwa ni moto chisu chezangay kwilej niyamam, pakwez kimikap kwez. Dichuku dimwing, weza kwinsend mulong wa kuya ku yikumangan. Najingunina anch chifanyidin kushakam mu chikumbu mulong wa kuchin masip ma antu. Chikwau kand, kukandam pa moto kwadingap kuswapela mulong yisu yimwing chading chikasiken kwendish moto. Ap anch chading mwamu, nasala usu wa kuvurik chikunku chakaad cha verse wam unikatina nakash: “Nikangidil kal kudi Nsalejam [Yehova].”

Yisu yimwing Nani niyamam twading kuwa mu jinjil jisidina, pakwez mulong twading ukatin yikumangan, twadandamena. Kushalijan mud ik kwadingaku kwa rukat ra antu natana mu Chot cha Want ni antu a pol adinga kwinsip! Kupwa kwa angond chidivu, natambula dibatish.

Chikunku chakasatu cha verse wam unikatila nakash chidi: “kulejan yisalijok yend yawonsu.” Namana anch mudimu wa kulejan wafanyina kwinkasiken. Chad nikat kuvurik kapamp ka kusambish naya kulejan ku chikumbu ni chikumbu. An akemp ni amakurump ading kwinsip, kwinlondul ni kwimburij mutapu nading nendina. Novanga kuyip nakash, pakwez panavurika anch antu inay akwet kuswir kwa Paradis mudi am; nadandamena kulejan.

Mulong wa kuswapej yom, nasambisha kwendish moto wa ayilim. Muntu nasalang nend mudimu wa kulejan wambachika, kupwa wamatika ni wakandama pa moto ni twasambisha kukurumuk. Ap anch mudimu wa kulejan wankasikena kwinsambishil, kupwa waletina musangar nakash, chawiy chambachika kwikal chibol wa rawonsu mu muvu wa 1998.

Nileja Bibil ni antu avud, ni anying pakach pa in kwilej inay atambula dibatish. Chikwau kand, mwancham mband witiya niyend uyakin! Kuman mutapu uyilau antu akwau kurutu kukat kwinkasikesh nakash. Dichuku dimwing nading niyedina malariya, natambula mukand udiokila mu Côte d’Ivoire. Nileja Bibil kapamp kamwing ni mwin kwilej shikol ya piur ya mu Burkina Faso ni namupana chakwel ileja Bibil ni mukadivar. Kupwa mwin kwilej winou waya mu Côte d’Ivoire. Musangar mud ik pakutesh anch mwin kwilej winou wikadin kal mwin kulejan wakad kutambul dibatish!

Mutapu ik niwanyishina maswir mam? Dirijek dikata kuyikwash ayilim dianfundisha kuchim maswin. Mwin kufundish umwing wamana mutapu wam wa kusal mudimu ni walonda anch: “Tufanyidin kukufundish mutapu wa kusal sabang.” Ni kupwa, asala mwamu. Nasambisha kusal sabang wa chitut ni wa kowal nich mem. Antu akata sabang wam ni ayileja antu akwau chakwel eza kuland. Nalandishang amwinam, nasadilang moto wam wa makar masatu mulong wa kulandish.

Cha ushon, mu 2004, nimika mudimu wa uchibol mulong wa mayej ma ubid wa mwingong. Pakwez, nidandamedin ching kwipan mu mudimu wa kulejan.

Antu alonda anch ading angij mulong wa mwikadil wam wa musangar ni kusip. Nikwet mayingish mavud ma kwikal ni musangar mulong kudi am kusej piswimp ni Nzamb kwading kuwamp kamu.​—Rusangu rulondinay Sarah Maiga.