Imburijany Ritiy rau

Wababala ni Wachingela

ELIYA wasota nakash ikala pamwing ni Tatukwend wa mwiur. Pakwez runtu radinga rimwombilamu radinga rimumen kusu ching muprofet wakin wadinga ulembidina anch kasu keza kudiokal mwiur, ni antu au adinga pakad kwidjidjek amwitiyijin. Kurutu chinzwizu cheza chimusenda Eliya pa Mukandu wa Karmel ni amusejina Yehova Nzamb mu malembil mend amwinend, wadinga ni mudimu ukash wa kusal. Wadinga ufanyidina aya akamuleja Mwant Akab.

Chadi chiyikasikedin amakundj inay aad ikal ashalijadina nakash. Akab, wadinga udjit yileng ya want, wadinga mwin ris, mwin kubwambwil. Eliya, wadjala yidjal ya uprofet—nkandj wa chamwamu wa chikit cha nnam ap wa unyevu wa kabar ap wa mavuj ma mpemd. Wadinga ikundj umwing ukapukina, ushinshamena, ni mwin ritiy. Dichuku diadinga dishejidin piswimp dijikisha yom yivud piur pa amakundj inay aad.a

Diadinga dichuku diyimp ku mutambu wa Akab ni kudi antu akwau in kumwifukwil Baal. Relijon wa upangan wakasikeshinau Akab ni mukajend, Mwant-Mwad Yezebel, mu want wa Isarel wa tubil dikum washeshika mutapu umwing uyimp. Bal wasauka patok anch udi wa makasu. Nzamb winou wakad mwom wakanganya kwakish kwau kasu chakwel kuyakul ku malembil mamulembilau, kumujil maj, ni ku kwitapol kwa aprofet end. Bal wakanganya kuyichidij amakundj inay 450 ku disheshik diadinga diyifanyidina. Pakwez nzamb wa makasu wakanganya kand kusal chom chikwau, ni kukangany kwinoku kwadinga kwa chikupu. Mulong mu kusut kwa mivu yisatu, aprofet a Bal adinga ni kumulembil nzamb wau apwisha chang chikash chashesha ngand, pakwez Bal wimekesha anch kakutwishap kusal mwamu. Piswimpap, Yehova amwinend ukumekesh winzamb wend mu kupwish chang.—1 Ant 16:30–17:1; 18:1-40, Les Saintes Écritures — Traduction du monde nouveau.

Chisu ik chikezay Yehova kusal? Mutapu ik ukwiyendishay Eliya djat pa chisu chinicha? Ni chom ik tukutwisha kwilejin kusutil kudiay ikundj winou mwin ritiy? El tujinguninany pitushinshikidina rusangu rafundau mu 1 Ant 18:41-46, NW.

Ngikadil ya Kulembil

Eliya wamusejina Akab wamwel anch: “Yang, udia ni kuna; mulong kudi chidjimin cha ruval muvud.” (Verse wa 41) Ov, mwant winou muyimp wileja chom kanang kusutil ku yom yamanay pa dichuku dinidia? Rusangu kirilondilap kamu, pakwez kitumenap pinap dizu ap dimwing dia kwit dilikishin, kwikil chimekeshina anch muprofet wamukwasha chakwel amusejina Yehova ni amwita dilikishin. Bwat, Akab “waya akadia ni kuna.” (Verse wa 42) Chadi Eliya wasala nchik?

“Eliya wakandama pa musong wa Karmel ni wazendjika muntu pansh ni wateka chifu chend mu manungun mend.” Payay Akab akadia, Eliya ndiy wikala ni chisu cha kumulembil Tatukwend. Shinshikin mwikadil wa kwikepish wisambidinau panap—Eliya ushich pansh wazendjikang kal mutu mu chilik chakwel anch mpal yend yidi piswimp ni manungun mend. Chom ik chadinga chisadilay Eliya? Tuswiridinap kutongin chom cha kutongin? Bibil, mu Yakob 5:18, utulejin anch Eliya walembila chakwel chang chipwa. Pakadi kwidjidjek walembila pandingay pa musong wa Karmel.

Kwisambishin, Yehova walonda anch: “Nakwat kal mupak wa kunakish ruval pa divu.” (1 Ant 18:1, NW) Chawiy Eliya walembila anch mazu malonday Tatukwend mawanyina, mudi kamu mwayilejay Yesu in kwilej end alembila pasutil kal mivu kanan.—Mateu 6:9, 10.

Chilakej cha Eliya chitulejin yom yivud piur pa malembil. Pakampwil mu yitongijok ya Eliya rutong ra Tatukwend radinga rifanyidin kuwanyin. Pitukata kulembil, chiwapin tuvurikang anch: “Anch twit chom ku rusot rend [Nzamb], ndiy ukutwov.” (1 Yohan 5:14) Choviken patok anch, tuswiridin twijika anch rusot ra Nzamb ridi chakwel tulembil mutapu witiyikina—diawiy diyingishin diwamp dietwetu twilejang Bibil pichuku pichuku mu mwom wetu. Chakin kamu Eliya wasota kand amana mutapu ukupwa chang mulong wa mar majim madingau nich antu a ngand yend. Muchim wend wadinga wizwila too nich kujikitish, pamanay chilay chasalay Yehova pa dichuku dinedia. Kubangin ukwash wa antu akwau ni kujikitish kudiokila ku muchim kufanyidin kwikal mu malembil metu.—2 Korint 1:11; Filipoi 4:6.

Chingejinany ni Kubabal

Eliya wadinga nich kashinsh anch Yehova ukusal mulong wa kupwish chang, pakwez kadingap wij nawamp chisu chikusalay Yehova mwamu. Chawiy lel, chom ik chasalay muprofet pa chisu chinicha? Shinshikinany yilondila verse wa 43 anch: “Ndiy wamwela kashalapol wend anch: ‘Kandam amboku. Tal ku mutambu wa karung wa mem.’ Niyend waya, watala ni walonda anch: ‘Kwikil chom.’ Ni wamwela kand anch, ‘Yang kand,’ tupamp sambwad.” Chilakej cha Eliya chitulejin piswimp malejan maad. Dia kusambish, talany ruchingej ra muprofet. Kupwa, shinshikinany kubabal kwend.

Nich kutakaman Eliya wasota amana uman ulejena anch Yehova sot asala, chawiy chamutuminay kashalapol wend pa chilik chijim chakwel akashinshikina nawamp chinshinsh chakwel amanaku yijingidij ya ruval usotila kunak. Pachirikay, kashalapol pakadi rusangu risangareshina walond anch: “Kwikil chom.” Chinshinsh chadinga kwau zwang, ni mwiur, kimwadingap madj. Ov, katat wamanany kal chom chimwing chishimokishina? Vurik anch Eliya udiokil pa kumulej Mwant Akab anch: “Kudi chidjimin cha ruval muvud.” Ov, mutapu ik ukulonday muprofet mazu minam oku kwikil kwau madj ma ruval mamekenaku?

Eliya wadinga wij kushilamu kwa Yehova. Mudi muprofet ni ntimesh wa Yehova, wadinga nich kashinsh anch Nzamb wend ukuwanyish dizu Diend. Eliya wadinga nich ruchingej—rijim mu chilik chakwel anch wadinga ni kutesh chidjimin cha ruval. Tukutwish twavurik yilondilay Bibil piur pa Moses: “Ndiy wakasikesha mudi muntu ukata kumuman Nzamb wakad kumekan ku mes.” Ov, Nzamb udi wakin kudi ey? Ndiy waleta mayingishin mavud chakwel twikala nich ritiy ra chilik chimwing mudiay ndiy ni mu yakushilamu yend.—Hebereu 11:1, 27.

Cha kaad, tushinshikinany mutapu wadingay Eliya ubabela. Wamutuma kand kashalapol wend, kadingap kapamp kamwing ap twaad, pakwez tupamp sambwad! Tukutwish twatongin mutapu waziyay kashalapol mulong wa kuchirikin mudimu winou ukash, pakwez Eliya wadinga uchingedin ching amana chijingidij ni kaziyap. Kwisik, kupwa kwa kuyaku kapamp ka sambwad, kashalapol weza walonda anch: “Tal! Kudi didj dikemp mudi chilaz cha chikas cha muntu dikaninikin kudiokal mu karung wa mem.” (Verse wa 44) Ov, umumen kashalapol winou mu manangu mey uzambwil chikas chend ni usadidil chilaz cha chikas chend mulong wa kwilik kujimb kwa didj dikemp dikaninikina ku chinshinsh kwa Karung Mujim?b Chimeken anch kwikil chom chovay kashalapol. Pakwez kudi Eliya, didj dined diadinga dia usey nakash. Chadi wamwinkisha katat kashalapol wend midimu yikwau yikash ya kusal: “Yang, ukamuleja Akab anch, ‘Tenchik ditemb! Ni yang kwey chamwamu ruval ukukukangesh!’”

Eliya utushidil kand chilakej chikash. Niyetu tushich pa chirung chikezay Nzamb kusal mulong wa kuwanyish rutong rend ralonday. Eliya wachingela nsudiel ya chang; atushalapol a Nzamb niyawiy nlel achingedin nsudiel ya ditenchik dia yom dia mangand manam mijondila. (1 Yohan 2:17) Djat ni pakusadilay Yehova Nzamb, tufanyidin kubabal mudi mwadingay Eliya. Mwan a Nzamb, Yesu, wayibabesha in kwilej end anch: “Chawiy lamany, mulong kiwijanyip pa dichuku dikwezay Mwant wen.” (Mateu 24:42) Ov, Yesu wasota kulond anch in kwilej end akez kikal chikupu akad kwijik chisu chikweza nsudiel? Bwat, mulong wisambina nakash piur pa mutapu ukwikala mangand mu machuku mayila djat kwisudiel. Umwing ni umwing wetu ukutwish wilej piur pa yijingidij yiney yirumburilau ya “kwisudiel kwa mangand.”—Mateu 24:3-7.c

Chimwing ni chimwing cha chijingidij chinech chidi uman ukash witiyikishina. Ov, uman winou uwanyidin chakwel utubachik tusala swa-swa? Didj dikemp kusu diakaninika ku chinshinsh diawanyina chakwel Eliya itiyija anch Yehova sot asala chom. Ov, muprofet ushinshamena wova usany?

Yehova Uletin Kwipimish ni Yiyukish

Rusangu ridandamedin anch: “Kupwa kwa kusut chisu diur diawonsu diajala bwi nich madj ni rinkind ni kwanaka ruval mujim. Ni Akab wakandama mu ditemb diend waya ku Yezerel.” (Verse wa 45) Yishiken yasambisha kumekan mu mutapu ukash. Padingay kashalapol wa Eliya ni kumulej Akab uruw watuminau, didj dined dikemp dikala dijim, dizula ni diajadisha diur. Rinkind mujim watuta. Piswimp, kupwa kwa mivu yisatu ni chikunku, chadi ruval wanaka pa divu dia Isarel.d Divu diadinga diumina mudi pa kampamp diatalala zong mem. Pasambishay ruval kunak, kawit Kishon wafuza mem, chimeken chadinga mulong wa koyish mash ma aprofet ajipau a Bal. Chad ni in Isarel in ushish niyawiy ikala ni chisu cha kukomb kwa matayeng ma difukwil dia Bal mwi ngand.

Chakin kamu Eliya wachingejina anch mwamu chikwikala! Ov, Akab wela kwit dilikishin ni kukarumuk kudiokal ku difukwil dijodila dia Bal? Yishiken ya pa dichuku dinidia yadinga mayingishin makash chakwel ashikena ku kukarumuk kwinoku. Chakin kamu, kitukutwishap twijik yik yadinga mu mutu wa Akab pa chisu chinicha. Rusangu ritulejin kusu anch mwant “waya ku Yezerel.” Ov, kudi chom kanang chilejay? Ov, wakwata mupak wa kukamuk mu mwom wend? Yishiken yeza kusadikaku yilejen anch chakul chidi bwat. Pakwez kudi Akab ni kudiay Eliya, dijuku diadinga kandikal diwanyina.

Muprofet wa Yehova wasambisha niyend kuya mwinjil mwin mwayilay Akab. Weny ulemp, wakadiay kwijik wadinga umuchingedil kurutu. Pakwez kwasadika chom chisu.

“Chikas chin kamu cha Yehova chikala padiay Eliya, chawiy ndiy wikasa fe mwi ntul ni waya mau kurutu kwenday Akab djat ku chis cha Yezerel.” (Verse wa 46) Chakin kamu, “chikas chin kamu cha Yehova” chadinga ni kusal padiay Eliya mu mutapu umwing wakad muntu kutesh. Yezerel wadinga ku makilometre 30, ni Eliya kadingap nsand pa chisu chinicha.e Mutala bil muprofet mu manangu mey, wikasin maswin mend malemp, wamakasin fe mwi ntul chakwel mend yend yishadila nawamp, ni kupwa uyil mau mwinjil yiney yatalalang kal zong—wafutul mau nakash wamutan, kupwa wamusut, ni wasut kamu zwant ditemb dia mwant!

Eliya wadinga ni chiyukish mudi ik! Chakwel kwov usu winou, ukash, ni usu—pamwingap kupandakanamu mwadingay ni kwiyov padingay uchidi nsand—kukutwish kwamuletin uman usangareshina. Tufanyidin tuvurik mauprofet malejena anch kukez kwikal ukash wa mujimbu ni usu kudi antu ashinshamena mu Paradiz wezinaku. (Isaiah 35:6; Luke 23:43) Mudi mwayay Eliya mau mwinjil yiney yitalela zong, chakin kamu ndiy wijika anch wadinga witiyikin kudi Tatukwend, Nzamb umwing kusu wakin, Yehova!

Yehova ukwet impu ya kupan yiyukish. Kuwanyish yitinay mulong wa kuyitambul kutwitin tusala usu nakash. Mudi Eliya, tufanyidin kubabal, kushinshikin nawamp umam wa usu ulejena anch Yehova udi piswimp ni kusala chom kanang mu yisu yiney yikash ni ya swa-swa. Mudi Eliya, tuyingin kuchingejin mu yakushilamu ya Yehova, “Nzamb wa uyakin.”—Kuseng 31:5.

[Mazu madia kwishin kwa paj]

[Kamushet/Chipich chidia pa paj wa 11]

Chang cha pa Dichuku dia Eliya Chasala Machuku Minch?

Eliya muprofet wa Yehova wamuleja Mwant Akab anch chang cha machuku mavud chikupwa katat kamu ak. Chom chinech chashikena mu “muvu wa kasatu”—chakin kamu kusambishin pa dichuku Eliya dialejanay anch kukwikal chang. (1 Ant 18:1, NW) Yehova wanakisha ruval kupwa kamu kwa Eliya kulond anch Ndiy ukunakish ruval. Antu amwing akutwish alond anch, chang chapwa pa muvu wa kasatu ni chasala mivu kupandakan pa yisatu. Pakwez, Yesu ni Yakob awonsu aad atulejin anch chang chasala “mivu yisatu ni angond musamban.” (Luka 4:25; Yakob 5:17) Ov, padi kupwitijan pinap?

Bwat. Waman kal anch, chirung cha chishipu mu Isarel wa pasak chadinga chilemp, chasalanga ni angond musamban. Pakad kwikanyek Eliya weza kudiay Akab kumulej milong ya chang mulong chishipu chamekana kwikal chilemp ni chikash kupandakanamu muchadinga. Chakin kamu, ruval wasambisha kunak piswimp ni pakach pa muvu. Chawiy, palonday Eliya anch chang chikupwa mu “muvu wa kasatu” kudiosh pabwakay, chang chadinga chasal kal piswimp mivu yisatu ni chikunku. “Mivu yisatu ni angond musamban” awanyina kamu pa kusut kwa chisu chakumanganau antu chakwel amana kupak kujim ku Mukandu wa Karmel.

Shinshikin kand chom chinech, chisu chezay Eliya cha kusambish kudiay Akab. Antu adinga itiyijin anch Bal ndiy “ukat kwendil pa madj,” nzamb ukutwisha kunakish ruval chakwel chishipu chipwa. Anch chishipu chalepa nakash, chimeken patok anch antu adinga ni kwiyipul chad: ‘Bal udi kwisu? Chisu ik chikunakishay ruval?’ Kulejan kwa Eliya anch kukezap kwikal ap maum ap ruval djat ni pakezay kulondil dizu kwayiletina wom nakash in kumwifukwil Bal inay.—1 Ant 17:1, NW.

[Dizu dirumburila]

Pictorial Archive (Near Eastern History) Est

[Chipich chidia pa paj wa 10]

Malembil makash ma Eliya mamekesha maku mend makin ma kusot kuman rusot ra Nzamb chirisadikina