Yipul ya in Kutang

Ov, Yak Ya Chitangil Yidi Dipup Dia Nzamb?

Nzamb kakatap kusadil yak ya chitangil mulong wa kuyipup nich antu akad milong. Kandikal asalangap mwamu ni kakezap kachisal. Ov, mulong wak? Chidi mulong Bibil ulondil mu 1 Yohan 4:8 anch: “Nzamb udi rukat.”

Rukat rawiy chibachikin cha kusambish cha yawonsu yisadilingay Nzamb. Rukat kirikatap kuyisotin antu akad milong tuyimp, mulong Bibil ulondil anch “rukat kirukusalangip nayimp kudi mukwau.” (Rome 13:10) Mu Yob 34:12, Bibil ulondil anch: “Chakin kamu, Nzamb kakutwishap kusal kuyip.”

Chakin, Bibil wasambela kwisambin yak ya machuku metu, mudi “kunyikek kwa ngand kuyimp.” (Luka 21:11, MM) Pakwez Yehova kakwetingap chisend cha kusheshik kukata kusadik mudi mudingayap mwin kutal ngikadil ya chipepil chidingayap nich chisend cha kusheshik kusadilay rikind mukash wasambelay kulejan anch wezin. Chiwamp, chad anch Nzamb kadiap musul wa mar ma yak ya yitangil mamenay muntu, kwisu kumadiokilinga?

Bibil ulejen patok anch: “Ngand ya kabuj yidi mu chikas cha Satan [Djabul].” (1 Yohan 5:19) Ndiy wikala mpongarik kusambishil pabwambwilay kwisambishil kwa muchid wa muntu djat ni nlel unou. (Yohan 8:44) Satan umening mwom wa muntu mudi chom chamwamu. Kwibaz kwawiy kumuyikedila, chawiy chidiap cha kushimok anch ndiy watenchika kal ditenchik dimwing dipalangeshina ching choy. Ditenchik dia mangand ma katat disangaredin kuyizikis antu djat ni mu chilik cha kwel anch antu akad wakuyichidij ashich mutapu umwing uyimp, mu jindond musadikininga yak ya chitangil ap yisarumwinay muntu amwinend akwachikining chisu ni chisu. (Efes 2:2; 1 Yohan 2:16) Chawiy, antu in ris awiy afanyidinau kufish nich mulong wa yak yimwing yijipina antu. (Mulej 8:9) Mutapu ik?

Yak yivud yishimokishina antu ayinau awiy akata kuyisarumun mu mutapu umwing ap ukwau. Shinshikin mudi chilakej, mar mayishikena antu abulau kudi rikind ni mem a mu musumb wa Nouvelle-Orléans, mu États-Unis, pwat-pwat ni mem yadiokala ku mikandu ya ku mipak yashesha yikumbu mu Venezuela. Mu mikadil yiney ni yikwau, yishiken ya chitangil, mudi rinkind ni ruval, yiding yak yikash kudi antu avud mulong wa kuburen kwijik nawamp ndond yishichau, kuburen kutesh yibabesh, ni kurumbuk kwa in kuyikel.

Tushinshikinany chak chasadika mu yisu ya Bibil. Pa dichuku dia Yesu, rubumb rawa cha kukashimuk ni rayijipa antu 18. (Luka 13:4) Chak chinech chikutwish chikal chibudikin cha kurumbuk kwa antu, ap chikutwish chikal mulong wa “chisu cha mar chikat[a] kushik kudi antu awonsu”—pakwez chakin kamu kichadingap dirumburish dia Nzamb.—Mulej 9:11.

Ov, Nzamb kandikal aletangap chak cha kujipan? Mwaning, pakwez kushalijan nich yak ya chitangil ap yisarumwinau antu, yak yiniya yadinga ni kutond, yadinga nich rutong, ni yadinga ya pa chipatu. Mabeb ma mem ma pa mangand mawonsu ma mu machuku ma Nowa ni kusheshik kwa musumb wa Sodom ni Gomor pa machuku menday Lot yidi yilakej yaad. (Disambishil 6:7-9, 13; 18:20-32; 19:24) Dirumburish dined dia Nzamb diayishesha antu ayimp pakwez antu adinga atentamina ku mes kwa Nzamb ayipandisha.

Mudi mulong wa uyakin, Yehova Nzamb ukwet ukaliweny, impu, ni usu wa kupwish nich mar mawonsu ni kuyikol antu ku yibudikin ya yak ya chitangil. Piur pa Yesu Kristu, Mwant watonday Nzamb, Kuseng 72:12 kwasambela kulond anch: “Ukumukamunin chimana mar pakudilay, ni kazwazu wakad mwin kumukwash.”