Ov, Nzamb Ukat Kutupup?

Pasadika kuzal kwa divu kukash ni tsunami mwi ngond wa Rish 2011, ntakel umwing wa chipolitik udia mu Japon walonda anch: “Nitongin anch chidi tembatsu (kupup kwa Nzamb), ap anch ni yovidil riy antu ajipau kudi mar minam.”

Pafau antu 220000 ni kusut mu kuzal kwa divu mu Haïti mwin ngond wa Chiwong 2010, mulej umwing wa rusangu ruwamp walonda anch yiney yasadika mulong awiy “atil urund ni djabul” ni afanyidin “kumuchirikin nzamb.”

Pafau antu 79 mu kubachikijan mu Manille, ku Philippines, mwimpel umwing wa in Katolik walonda anch: “Nzamb usotil kulangwish kom ketu kafila kal ni kakad kwitiyij.” Kupwa, jurnal umwing walejana anch “amakurump makum maad pa chitot itiyijin anch Nzamb umekeshin ujim wend kusutil ku kuzal kwa divu, rinkind mukash ni mar makwau ma chitangil” makata kushiken mwingand.

CHITIYIJ chakwel anch Nzamb ukat kulet mar mulong wa kuyipup antu ayimp chidiap cha katat. Mu muvu wa 1755, pafau antu 60000 mu kuzal kwa divu, mu kasu, ni mu tsunami washikena mu Lisbonne, mu Portugal, Voltaire filozof umwing wijikena nawamp wipula anch: “Ov, mulong wak mar makash mashikena mu Lisbonne, pakwez Paris wading mu musangar ukash?” Chikwau kand, ma miliyon ma antu makat kwiyipul anch Nzamb ukat kusadil mar ma chitangil mulong wa kuyipup antu. Mu jingand jivud mar minam amajimbwil anch yisal ya Nzamb.

Mulong wa yom yiney yawonsu tufanyidin kwiyipul anch: Ov, Nzamb usadidil chakin kamu mar ma chitangil mulong wa kuyipup antu? Ov, mar ma chitangil makata kushiken nlel unou madi kupup kudiokila kudi Nzamb?

Mulong asotin kumufish nich Nzamb, antu amwing alejen jinsangu jimwing ja Bibil jilejena mutapu wayisheshay Nzamb antu nich yom ya chitangil. (Disambishil 7:17-22; 18:20; 19:24, 25; Kuchind Michid 16:31-35) Pakwez, kushinshikin kwa jinsangu jinej ja Bibil kulejen anch, kudi yom yikash yisatu yishalijadin. Chakusambish, kurutu kwa kuyishesh atakela kuyibabesh. Cha kaad, chinyim nich mar ma chitangil ma katat makata kuyijip antu awamp ni ayimp, Nzamb wading ukat kutond afanyidina kusheshik. Ching kusu antu ayimp akad kuswimp ap antu alika kutesh kubabesh awiy asheshika. Chakasatu, Nzamb wayinkisha antu akad mulong mutapu wa kupand.—Disambishil 7:1, 23; 19:15-17; Kuchind Michid 16:23-27.

Mu mar ma chitangil masheshina mwom wa mamiliyon ma antu nlel unou, kwikil chom chimekeshina anch Nzamb ndiy uletining mar minam. Ov, jinsangu ik jilejena kupandikan kwa mar minam? Ov, mutapu ik tukutwisha kurish nich? Ov, kudi chisu chimwing chikeza mar ma chitangil kupwa? Ukez kutan yakul mu mutu wa mulong ulondwilaku.