Yom ik Yilondinay Bibil Piur pa Mar ma Chitangil?
Chakul cha Bibil
Nzamb kakuletishangap mar ma chitangil tumena nlel, pakwez ukat kuyibangin nakash antu amena mar minam. Want wa Nzamb ukupwish yom yin yawonsu yiletishina mar, kuwejaku ni mar ma chitangil. Mu chisu chinech, Nzamb ukat kupan kwongoj kudi antu amena mar ma chitangil.—2 Korint 1:3.
Mulong wak tukutwish kwikal nich kashinsh anch mar ma chitangil madiap dipup didiokila kudi Nzamb?
Ov, mar ma chitangil chidi chijingidij chimekeshina anch tushich machuku ma nsudiel?
Ov, mbil ja Bibil jikutwish kutukwash kwirijek mulong wa mar ma chitangil
Maverse ma Bibil mulong wa kuyikasikesh antu amena mar ma chitangil
Mulong wak tukutwish kwikal nich kashinsh anch mar ma chitangil madiap dipup didiokila kudi Nzamb?
Kusutil Bibil, twij anch Nzamb wasadina usu wend mulong wa kulet dirumburish. Mutapu wasalay mwamu ushalijadin nakash ni mutapu ukata kushiken mar ma chitangil.
Mar ma chitangil makat kujipan ni kuyipish yom pakad kwauril. Anch Nzamb wasadin usu wend mulong wa kulet dirumburish, ukat kwikal nich kashinsh anch ching antu ayimp awiy akusheshika. Chilakej, Nzamb pasheshay misumb yikur ya Sodom ni Gomor, wamupandisha ikundj muwamp Lot ni anend ayangadim aad. (Disambishil 19:29, 30) Nzamb watanga mu michim ya antu pa chisu chinacha ni washesha ching antu ading ayimp.—Disambishil 18:23-32; 1 Samwel 16:7.
Mar ma chitangil makat kushiken nakash pakad ap kubabeshan. Ku mutambu ukwau, Nzamb wayibabesha antu ayimp kurutu kwa kusadin usu wend padi awiy. Antu atesha kubabesh kwend ading ni mutapu wa kwiyep ku mar minam.—Disambishil 7:1-5; Mateu 24:38, 39.
Mu chilik kanang, yisal ni mipak ya antu yaletisha mar ma chitangil ni kuyiletin antu akwau milong. Mutapu ik? Kusutil kuyipish ndond tushicha ni kutung yikumbu ku jindond kudia kuzal kwa divu, kudia mem mavud ni kudia chirungul ap mashik nakash. (Kujingunik 11:18) Tufanyidinap kumufish nich Nzamb mulong wa mipak yikwatinau antu.—Jinswir 19:3.
Ov, mar ma chitangil chidi chijingidij chimekeshina anch tushich machuku ma nsudiel?
Mwaning, uprofet wa Bibil ulejen anch kukwikal mar pa chisu cha “disudiel dia mangand,” ap mu “machuku ma kwisudiel.” (Mateu 24:3; 2 Timote 3:1) Chilakej, piur pa chirung chetu, Yesu walonda anch: “Kukez kwikal kamungun ni kunyikek kwa [divu] ku jindond jivud.” (Mateu 24:7) Piswimp ap, Nzamb ukudiosh yom yawonsu yiletina kusansan, kuwejaku ni mar ma chitangil.—Kujingunik 21:3, 4.
Mutapu ik ukatay Nzamb kuyikwash antu amena mar ma chitangil?
Nzamb ukat kuyongoj kusutil Dizu diend, Bibil. Bibil utukasikeshin anch Nzamb ukat kutubangin ni anch ukat kwov nayimp chisu tumena mar. (Isay 63:9; 1 Pita 5:6, 7) Ulejen kand kushilamu kwend pa chisu chikupwa mar ma chitangil.—Tal “Maverse ma Bibil mulong wa kuyikasikesh antu amena mar ma chitangil.”
Nzamb ukat kuyikwash antu amena mar ma chitangil kusutil in kumwifukwil end. Nzamb usadidin in kumwifukwil end adia pa divu mulong wa kwimburij chilakej chashay Yesu. Asambela kulejan anch Yesu wafanyina kuyongoj antu akweta “michim ya runeng” ni “antu awonsu adidila.” (Isay 61:1, 2) In kumwifukwil Nzamb akat kusal usu wa kusal mwamu.—Yohan 13:15.
Nzamb ukat kusadin kand in kumwifukwil end mulong wa kupan ukwash uwanyidina kudi antu amena mar ma chitangil.—Midimu 11:28-30; Galatia 6:10.
Atuman a Yehova akat kupan ukwash kudi antu amanang mar ma rinkind mukash mu Porto Rico
Ov, mbil ja Bibil jikutwish kutukwash kwirijek mulong wa mar ma chitangil?
Mwaning. Ap anch Bibil kamufundap nich chitongijok cha kuturijek mulong wa mar ma chitangil, ukwet mbil jikutwisha kutukwash. Chilakej:
Rijek yom ukusal anch kwashiken mar ma chitangil. Bibil ulondin anch: “Muntu wa manangu anch waman yom yikash, ukat kujingam.” (Jinswir 22:3) Chidi cha manangu kurijek yom tukusala kurutu twikala mu ubaj wa chom kanang. Pakach pa yom yiney padi kutek pamwing ukwash wa kusambish wa chimwingang udia tayad mulong wa kumukwash nich muntu anch wayel ni kwambamb nau antu a mu dijuku mulong wa kwijik ndond ik tukutwisha kutanijan anch kwashiken mar ma chitangil.
Mwom ufanyidin kwikal wa usey nakash kudi ey kusutamu mapit mey. Bibil utubabeshin anch: “Etu kitwaletap chom mu mangand, chawiy chimwing kand, kitukusendap chom.” (1 Timote 6:7, 8) Tufanyidin kusha chikumbu ni mapit metu mulong wa kupand ku mar. Tufanyidin kuvurik anch mwom wetu udi wa usey nakash kusutamu chom chin chawonsu.—Mateu 6:25.