MUTU WA MULONG WA KWILEJ WA 16
“Mwanamakwey Ukuvumbuk”!
“Yesu wamwakula [Mart] anch: ‘Mwanamakwey ukuvumbuk.’”—YOH. 11:23.
MUMINY 151 Ukutazuk
YIDIA MU MUTU WA MULONG WINOUa
1. Mutapu ik wamekeshay mwan umwing ritiy rend mu kushilamu kwa divumbuk?
Matthew amubarila tupamp tuvud mulong wading ni mayej makash. Padingay ni mivu sambwad, dichuku dimwing wading utadin pamwing ni dijuku diend program wa JW Télédiffusion. Kwinsudien kwa program kwading muminy wading wisambidina mutapu tukuyaka akatish netu akuvumbuka.b Papwishau, Matthew wayisejina anvajend, wayikwat ku makas, wayel anch: “Tatuku, Maku, umenany? Ap anch nafa kwam, nikuvumbuk. Ukwinchingelany kwen; nikuvumbuk.” Tongin mutapu wiyovau anvaj inay pa kuman ritiy rikash radingay nich mwanau mu kushilamu kwa divumbuk!
2-3. Mulong wak chiwapin kutongijokin pa kushilamu kwa divumbuk?
2 Chid chiwamp kutongijokin chisu ni chisu piur pa kushilamu kwa divumbuk kudia mu Bibil. (Yoh. 5:28, 29) Mulong wak? Mulong mayej makash ap rufu ra muntu tukatina yikutwish kushiken pakad kutongin. (Mul. 9:11; Jak. 4:13, 14) Ruchingej retu ra divumbuk rikutwish kutukwash kujijamen yikokujol ya mutapu winou. (1 Tes. 4:13) Mifund yitwinkishin kashinsh anch Tatukwetu wa mwiur utwij nawamp ni utukatin nakash. (Luka 12:7) Mulong Yehova ukututangiril kand nich wuntu ni manangu metu mud mutwading kurutu kwa kufa, chinech chimekeshin anch utwij nawamp nakash. Ni mulong Yehova utukanin kutwinkish mwom wa chikupu, ap kand kutuvumbul anch twafa, chinech chimekeshin anch utukatin nakash.
3 Mu mutu wa mulong winou tukuman chakusambish mulong wak tukutwish kwikal ni ritiy mu kushilamu kwa divumbuk. Kupwa tukushinshikin rusangu ra Bibil rikutwisha kukasikesh ritiy retu mudioshinau mazu ma mutu wa mulong winou: “Mwanamakwey ukuvumbuk.” (Yoh. 11:23) Kwinsudien, tukuman mutapu tukutwisha kukasikesh ritiy retu mu ruchingej ra divumbuk.
MULONG WAK TUKUTWISH KWIKAL NI RITIY MU KUSHILAMU KWA DIVUMBUK
4. Kurutu kwa kwitiyij yom yitukaninay muntu, kashinsh ik tufanyidina kwikal nich? Let chilakej.
4 Mulong wa kwitiyij yom yitukaninay muntu, tufanyidin kwikal nich kashinsh anch ukatin kusal yom yikaninay ni ukwet dikand dia kusal mwamu. Chilakej: Tongin bil mud anch chikumbu chey chasheshikang ku rinkind mukash. Kupwa murund ney wez wakukan anch ‘nikukukwash kurijek chikumbu chey.’ Ud mwin yakin, ni ukwet kashinsh anch ukatin kamu kukukwash. Anch uding mwin kutung ukweta ukaliweny ni ukwet yom ya mudimu, wij anch ukutwish kukukwash. Mwamu ukwitiyij chad anch ukuwanyish kushilamu kwend. Chad chid nchik piur pa kushilamu kwa Nzamb piur pa divumbuk? Ov, ukwet chakin kamu usu wa kuwanyish kushilamu kwend, ni ukatin kusal mwamu?
5-6. Mulong wak tukwet kashinsh anch Yehova ukwet impu ya kuyivumbul afu?
5 Ov, Yehova ukwet kamu impu ya kuyivumbul afu? Mwawiy kamu. Wayipepila in kufund Bibil amwing chakwel afund kushilamu kwend kwa divumbuk dia machuku ma kurutu. (Isay 26:19; Ozey 13:14; Kuj. 20:11-13) Ni anch Yehova wakan chom, ching kamu wachiwanyish. (Jos. 23:14) Yehova uchingedin nich impu nakash kuyivumbul antu afila kal. Mulong wak tulondina mwamu?
6 Tongijokin pa yom yalonday Job. Wading nich kashinsh anch ap anch wafap nchik, Yehova ukumuvumbul. (Job 14:14, 15) Wawiy mutapu wiyovilay kand Yehova piur pa atushapol end awonsu afila kal. Ukwet impu ya kuyichirish kand ku mwom ni ukash wa mujimbu uwamp mulong wa kusanger kand mwom. Chid nchik piur pa antu afa pakad kwikal ni mutapu wa kwilej uyakin piur pa Yehova? Nzamb wetu wa rukat ukatin kuyivumbul niyau. (Mid. 24:15) Ukatin ikala niyau ni mutapu wa kwikal arund nend ni kushakam pa divu chikupu. (Yoh. 3:16) Chakin kamu, Yehova ukwet impu ya kuyivumbul afu.
7-8. Mutapu ik tukutwisha kwikal ni kashinsh anch Yehova ukwet dikand dia kuyivumbul antu afila kal?
7 Ov, Yehova ukwet dikand dia kuyivumbul afu? Mwaning! Ud “Mwin Dikand Diawonsu.” (Kuj. 1:8) Chawiy mulong ud mwin dikand diawonsu, ukutwish kumupandakan mukankuny win mwawonsu, ap rufu. (1 Kor. 15:26) Kwijik yom yiney kukat kutwinkish usu ni kutwongoj. Shinshikin chilakej cha Nambaz Emma Arnold. Ndiy ni dijuku diend arisha ni yikokujol yapaka ritiy rau pa chisu cha Njit ja Kaad ja pa Mangand Mawonsu. Emma wamukasikesha mwanend mband mulong antu ading akatinay afa mu kompony wa mar mu Nazi ni walonda anch: “Anch antu inay afila alik kuvumbuk, chimeken anch mukankuny netu rufu ukwet usu kumusutamu Nzamb. Pakwez winou udiap uyakin.” Chakin kamu, kwikil chom chikweta usu kumusutamu Yehova! Nzamb mwin dikand diawonsu watanga mwom ukwet chakin kamu mutapu wa kuyivumbul antu afila kal.
8 Diyingishin dikwau ditwinkishina kashinsh anch Nzamb ukuyivumbul antu afila kal did anch ndiy kakuvuramenangap. Umwij katumbu ni katumbu pa dijin diend. (Isay 40:26) Chikwau kand, uyivurikin antu awonsu afila kal. (Job 14:13; Luka 20:37, 38) Chikutwish kumuswapel kuvurik kachom ni kachom piur pa antu akuvumbulay, kuwejaku yifu ni yisalijok yau, yom yasalau mu mwom ni ukaliweny wau wa kuvurik yom.
9. Mulong wak uchingejidina mu kushilamu kwa Yehova piur pa divumbuk dia machuku ma kurutu?
9 Chakin kamu, tukutwish kuchingejin mu kushilamu kwa Yehova piur pa divumbuk dia machuku ma kurutu, mulong twij anch ukwet impu ni dikand dia kuwanyish kushilamu kwinoku. Shinshikin kand diyingishin dikwau ditubachikina kuchingejin mu kushilamu kwa Nzamb piur pa divumbuk. Pasak, Yehova wamwinkisha Yesu ni atushalapol end akwau ashinshamena usu wa kuvumbul afu. El tushinshikinany chilakej cha muntu umwing wavumbulay Yesu mu rusangu rilejenau mu Yohan shapitre wa 11.
YESU WAFISHA MURUND NEND MUKATISH
10. Yom ik yashikena pading palejenay Yesu ushad ukwau wa Yordan ni yom ik yasalay? (Yoh. 11:1-3)
10 Tang Yohan 11:1-3. Tongijokin pa yom yasadika ku Betaniy kwinsuden kwa muvu wa 32 C.C. Yesu wading nau arund a piswimp mu ul winou, Lazar nau ampanyend aad, Mariy ni Mart. (Luka 10:38-42) Pakwez Lazar wayela ni ampanyend ading iyakamishin. Yesu wading ushad ukwau wa Yordan, kwi ndond kwading kwitina kwend machuku maad kudiokal ku Betaniy, chawiy amutumina uruu. (Yoh. 10:40) Cha ushon, Lazar wafa kurutu muntu ashik kwi ndond kwadingay Yesu. Ap anch Yesu wading wij anch murund nend wafang kal, ndiy washakama kand kwinikwa machuku maad ni kupwa weza chad ku Betaniy. Chawiy kurutu Yesu ashika kwinikwa, Lazar wading wafang kal kwasutang kal machuku manying. Yesu wasala chom chimwing chayisangaresha arund nend ni kumutumbish Nzamb.—Yoh. 11:4, 6, 11, 17.
11. Dilejan ik piur pa urund tukutwisha kwilejin ku rusangu riner?
11 Twilejin dilejan dia usey piur pa urund winou. Tongijok bil: Chisu chamutuminau Yesu uruu kud Mariy ni Mart, kamulejap kuchirik ku Betaniy. Amuleja kwau anch murund nend mukatish uyedin. (Yoh. 11:3) Chisu chafay Lazar, Yesu wafanyina kwend kumuvumbul ap anch wading kulemp. Pakwez, Yesu watonda kuya ku Betaniy mulong wa kwikal pamwing nau arund nend Mariy ni Mart. Ov, ukwet murund ukutwisha kukukwash ap anch umwitinap ukwash? Chawiy wij anch ukutwish kumuchingejin ap mu ‘yirung yikash.’ (Jnsw. 17:17) Mud Yesu, el twikalany arund awamp kud antu akwau! Katat tuchirikinany rusangu retu ni tumanany yom yasadika.
12. Yesu wamuleja Mart yom ik, ni mulong wak kushilamu kwinoku kwadingap kwa chamwamu? (Yoh. 11:23-26)
12 Tang Yohan 11:23-26. Mart wading wij anch Yesu ud piswimp ni ku Betaniy. Waya kumusankan pakad kulab ni wamuleja anch: “Nsalejam, anch ey wadi kunoku, ing mwanamakwam kafilap.” (Yoh. 11:21) Chakin kamu, Yesu wafanyina kumwok Lazar. Pakwez Yesu wading ukatin kusal chom chisutinamu kumwok. Wamuleja anch: “Mwanamakwey ukuvumbuk.” Wamwinkisha kand Mart diyingishin dia kukasikesh kashinsh kend mu kushilamu kwinoku pamulejay anch: “Am yam mwin kuvumbul antu ni kuyinkish mwom.” Chakin kamu, Yehova wamwinkishin kal Yesu usu wa kuyivumbul afu. Kwinsambishin, wamulangwisha mwan mband chisu chikemp kupwa kwa kufa ni wamulangwisha kand mwan nsand, chimeken anch pa dichuku diawiy dimwing diafay. (Luka 7:11-15; 8:49-55) Pakwez, ov, ukutwish kumuvumbul muntu wafang kal pasutang kal machuku manying ni wasambishang kal kuvund?
“LAZAR, BUDIK!”
Yesu wova riy nakash mulong wa arund nend ading anenganena (Tal paragraf wa 13-14)
13. Kukwatijan ni Yohan 11:32-35, yom ik yasalay Yesu chisu chamumanay Mariy ni antu akwau akat kudil? (Tal kand chipich.)
13 Tang Yohan 11:32-35. Tongin yom yasadika. Mariy, mpanyend mukwau wa Lazar, waya kumusankan Yesu. Wachirikina mazu malonday yayend: “Nsalejam, anch ey wading kunoku, ing, mwanamakwam kafilap!” Ndiy pamwing nau antu akwau ading anenganen nakash. Yesu niyend wanenganana nakash payimanay akat kudil. Mulong wayovila arund nend riy, chawiy niyend wadila. Wova kusansan kudiokiling ku kufish mukatish. Chakin kamu, wading ni impu ya kudiosh chom chayiletina runeng!
14. Yom ik tukutwisha kwilej piur pa Yehova kusutil yom yasalay Yesu pamumanay Mariy ukat kudil?
14 Yom yasalay Yesu pamumanay Mariy ukat kudil, yitufundishin anch Yehova ukwet ranaken nakash. Mulong wak tulondina mwamu? Mu mutu wa mulong wasambelang, twilejang anch Yesu ukat kumekesh mu chilik chiwanyidina yitongijok ni yovil ya Tatukwend. (Yoh. 12:45) Yesu wova ushon mulong wa arund nend ading anenganena. Chawiy, chinech chimekeshin anch Yehova niyend ukat kwov ushon anch watuman tunenganen. (Kus. 56:8) Ov, chinech chikubachikanap kwey kumusejin Nzamb wetu wa ranaken?
Yesu wamekesha anch ukwet usu wa kuyivumbul antu afila kal (Tal paragraf wa 15-16)
15. Mud mulejenau mu Yohan 11:41-44, yom ik yasadika kwi nzay ya Lazar? (Tal kand chipich.)
15 Tang Yohan 11:41-44. Yesu washika kwi nzay ya Lazar ni walejana kudiosh diyal diading dipatinawaku. Pakwez Mart wading widjidjekin ni walonda anch katat wanunkang kal. Yesu wamwakula anch: “Ov, kinakulejinap anch, ukuman uyaj wa Nzamb anch witiyij?” (Yoh. 11:39, 40) Yesu watala mes mwiur ni walembila kurutu kwa antu awonsu. Wakata kumwinkish Yehova katumb mulong wa yom yasadika. Kupwa Yesu watoya anch: “Lazar, budik!” Ni Lazar wabudika mwi nzay! Pinap Yesu wasala chom chading chitonginau antu amwing anch kakutwishap kuchisal.—Tal note d’étude wa Yohan 11:17.
16. Rusangu ridia mu Yohan shapitre wa 11 rikasikeshin mutapu ik ritiy retu mu ruchingej ra divumbuk?
16 Rusangu rilejenau mu Yohan shapitre wa 11 rikasikeshin ritiy retu mu ruchingej ra divumbuk. Mulong wak tulondina mwamu? Vurik mazu mamulejau Mart kud Yesu anch: “Mwanamakwey ukuvumbuk.” (Yoh. 11:23) Mud Tatukwend, Yesu ukwet impu ni usu wa kuwanyish kushilamu kwinoku. Padilay wamekesha anch ukwet impu nakash ya kuyivumbul afu ni kudiosh kusansan kukata kudiokal ku rufu. Pavumbukay Lazar, Yesu wamekesha kand anch ukwet usu wa kuyivumbul afu. Tongijokin kand pa yom yamuvurishau Mart kud Yesu anch: “Ov, kinakulejinap anch, ukuman uyaj wa Nzamb anch witiyij?” (Yoh. 11:40) Tukwet kand mayingishin mawamp ma kwitiyij anch Nzamb ukuwanyish kushilamu kwend kwa kuyivumbul afu. Chad, yom ik tufanyidina kusal chakwel ruchingej riner rikala ni usu nakash kud etu?
YOM TUKUTWISHA KUSAL CHAKWEL RUCHINGEJ RA DIVUMBUK RIKALA NI USU KUD ETU
17. Yom ik tufanyidina kuvurik chisu tutangina nsangu ja divumbuk jisambidinau mu Bibil?
17 Kutang ni kutongijokin piur pa divumbuk dia antu avumbulau pasak. Bibil wisambidin divumbuk dia antu chinan avumbulau panap pa divu.c Chid cha usey kwilej nawamp rusangu piur pa divumbuk ni divumbuk. Piwilejina, vurik anch antu inay ading akin, amakundj, amband ni an. Shinshikin malejan ukutwisha kwilejinaku. Tongin mutapu ukutwisha yilakej yiney yawonsu kumekesh impu ni dikand dikwetay Nzamb mulong wa kuyivumbul afu. Ni cha usey nakash, tongijokin chikurikina pa divumbuk dia Yesu, didia dia usey nakash pakach pa antu avumbulau pasak. Vurik anch kwading yitot ya antu ading atuman a divumbuk diend ni chinech chikasikeshin ritiy retu.—1 Kor. 15:3-6, 20-22.
18. Mutapu ik ukutwisha kusadin nawamp miminy yetu yisambidina ruchingej ra divumbuk? (Tal kand mazu ma kwinshin.)
18 Tesh, wang ni tongijokin pa miminy yisambidina ruchingej ra divumbuk.d (Efes 5:19) Miminy yiney yikat kutukwash kuman divumbuk anch chid chom chakin ni yikat kukasikesh ritiy retu mu ruchingej riner ra usey. Yiteshang, iyijidisha chakwel usambish kuyiwang nawamp, ni isambina yom yidia mu miminy pa chisu cha difukwil dia mu dijuku. Ukutwish kand kulam mazu ma miminy ni kumatongijokin chikurikina chakwel makasikesha ritiy rey ni kupukun muchim wey. Ni kupwa anch warish ni yikokujol yikash mu mwom wey ap anch wafish muntu ukatina, spiritu wa Yehova ukukukwash kuvurik miminy yiney, kukongoj ni kukwinkish usu.
19. Yom ik tufanyidina kutongijokin piur pa divumbuk? (Tal mushet “Yom ik Ukuyipula?”)
19 Tongijokin mud ud mwi ngand yisu. Yehova watwinkishin kal mutapu tufanyidina kutongijokin mwi ngand yisu. Nambaz umwing ulondin anch: “Nikat kusutish chisu cha kutongijokin mud nid mwi ngand yisu, nikat kusal mud niteshin madjimb mawamp ma yisalamb mu Paradis.” Tongin mud ukat kusankanijan ni amakundj nau amband a ritiy a pasak. Nany ukatina kusankanijan nend? Yipul ik ukumwipula? Tongin kand mud ukat kusankanijan ni akatish ney afa kal. Tongin pa yom ya kusambish ukuyileja, mutapu ukuyaka ni mutapu ukwiyova piukuyimana.
20. Mupak ik tufanyidina kukwat?
20 Tumujikitishin nakash Yehova mulong wa kushilamu kwa divumbuk! Tukutwish kwikal nich kashinsh anch kushilamu kwinoku kukuwanyin kamu mulong Yehova ukwet impu ni dikand dia kuwanyish kushilamu kwinoku. Elany amboku tudandamen kukasikesh ritiy retu mu kushilamu kwinoku kwa usey. Anch twasal mwamu, tukwikal mu urund wa piswimp nakash ni Yehova, umukanina muntu ni muntu wa pakach petu anch, ‘Akatish ney akuvumbuk!’
MUMINY 147 Kushilamu kwa Mwom wa Chikupu
a Anch wafishin kal mukatish ney, chid chakin anch ruchingej ra divumbuk rikat kukwongoj nakash. Chad, mutapu ik ukutwisha kuyirumburil antu akwau mulong wak ukwet ritiy mu kushilamu kwinoku? Ni mutapu ik ukutwisha kukasikesh ritiy rey mu ruchingej ra divumbuk? Mutu wa mulong winou ukutukwash etu awonsu kukasikesh ritiy retu mu ruchingej ra divumbuk.
b Mutu wa mulong wa muminy ulondina anch Udi Kwend Piswimp ap, wabudika mu program wa JW Télédiffusion wa Ngond wa 11, 2016.
c Tal mushet “Kuvumbuk Chinan Kulejenau mu Bibil” mu Chinong cha Kalam cha 1 Ngond wa 8, 2015, paj wa 4.
d Tal miminy ey mu buku wa miminy ‘Tumuwangilany Yehova ni Musangar’: “Tongin Chisu Chikwikala Yom Yawonsu Yisu” (Muminy 139), “Tutalany Mes pa Difut!” (Muminy 144), ni “Ukutazuk” (Muminy 151). Tal kand pa jw.org miminy ya orijinal, “Udi Kwend Piswimp ap,” “Mwi Ngand Yisu Yikweza,” ni “ Tu verras. ”