DILEJAN DIA 16
Yom ik Yasalay Yesu Padingay pa Divu?
Antu avud akat kutong piur pa Yesu mud mwan uchidia kal mukemp, mud muprofet ukweta manangu, ap akat kutongijokin pa mutapu wamujipau. Pakwez, tukutwish kwilej yom yivud nakash piur pend anch twashinshikin yom yasalay padingay pa divu. Mu dilejan dined, tukuman yom yimwing ya usey nakash yasalay Yesu ni mutapu yikutwisha kukukwash.
1. Mudimu ik wading ukwatinay Yesu nich usey nakash?
Mudimu wading ukwatinay Yesu nich usey nakash wading wa “kurumburil rusangu ruwamp ra Want wa Nzamb.” (Tang Luka 4:43.) Walejana rusangu ruwamp anch Nzamb ukutek Want, charumburik anch guvernema ukupwisha milong yawonsu yirishinau nich antu.a Yesu walejana nich mushiku uruu winou ukasikeshina mu mivu yisatu ni chikunku.—Mateu 9:35.
2. Mulong wak Yesu wasala yilay?
Bibil ulejen ‘yilay, ni yom yikwamushena, ni yijingidij yivud yasalay Nzamb kusutin Yesu.’ (Midimu 2:22) Kusutil usu wa Nzamb, Yesu wadutisha rinkind mukash, wadisha tunan twa antu, woka ayej ni wavumbula kand afu. (Mateu 8:23-27; 14:15-21; Marko 6:56; Luka 7:11-17) Yilay yasalay Yesu yamekesha patok anch Nzamb ndiy wamutuma. Yamekesha kand anch Yehova ukwet usu wa kupwish milong yawonsu turishina nich.
3. Yom ik tukutwisha kwilejin ku mwom wa Yesu?
Yesu wamuziyina Yehova mu yishiken yawonsu. (Tang Yohan 8:29.) Chikalap nchik rupompat, Yesu wasala nich kushinshaman yom yawonsu yamwitau kusal kud Tatukwend djat ni ku rufu rend. Wamekesha anch antu akutwish kumusadin Nzamb nich kushinshaman ap anch arishin ni milong yikash. Chawiy, Yesu watushila ‘chilakej chakwel tulondul nich kushinshaman mwi nzau jend.’—1 Pita 2:21.
ILEJA CHIKURIKINA
Shinshikin mutapu walejanay Yesu rusangu ruwamp ni mutapu wasalay yilay.
4. Yesu walejana rusangu ruwamp
Yesu wenda tunan twa akilometre mu jinjil jiyimp mulong wa kulejan rusangu ruwamp kud antu avud. Tang Luka 8:1, kupwa isambinany yipul ey:
Ov, Yesu walejana rusangu ruwamp ching kwau kud antu ezang kumutesh?
Usu ik wasalangay Yesu mulong wa kuyitan antu?
Nzamb wasambela kulejan anch Mesia wafanyina kulejan rusangu ruwamp. Tang Isay 61:1, 2, kupwa isambinany yipul ey:
Mutapu ik wawanyishay Yesu uprofet winou?
Ov, utongin anch nlel antu akwet kamu kuswir kwa kutesh rusangu ruwamp riner?
5. Yesu wafundisha uyakin wa usey
Yesu walejana rusangu ruwamp ra Want wa Nzamb, pakwez wafundisha kand malejan ma usey. Shinshikin yilakej yikemp mu Malejan mend ma pa Mukandu. Tang Mateu 6:14, 34, ni 7:12, kupwa isambinany yipul ey:
Yiyul ik ya ukwash yapanay Yesu mu maverse minam?
Ov, utongin anch yiyul yiney yikutwish kand kutukwash nlel?
6. Yesu wasala yilay
Yehova wamwinkisha Yesu usu wa kusal yilay yivud. Mulong wa kuman chilakej chimwing, tang Marko 5:25-34 ap talany VIDEO. Kupwa isambinany yipul yidia kwinshin oku.
Kukwatijan ni video winou, kashinsh ik kadingay nich mband wading uyedina?
Yom ik yikusangareshina mu chilay chinech?
Tang Yohan 5:36, kupwa isambinany chipul ech:
Yilay yasalay Yesu “yimekeshin” ik piur pend?
Ov, wij?
Yom yivud twija piur pa Yesu yidiokil mu mabuku manying matazukinau anch ma Evanjil—Mateu, Marko, Luka, ni Yohan. Evanjil ni Evanjil urumburil yom kushalijan piur pa Yesu. Anch twabomb nsangu jinej pamwing, tukutwish kwikal ni chitongijok chidia zwang piur pa mutapu wading mwom wa Yesu.
MATEU
ndiy wafunda Evanjil wakusambish. Utulejin piur pa yom yivud yafundishay Yesu, pakampwil yom yafundishay piur pa Want wa Nzamb.
MARKO
wafunda Evanjil mwiswimp. Utulejin yinship yivud yisangareshina.
LUKA
utulejin mutapu Yesu wading ukwatinay nich usey nakash malembil ni mutapu wading uyimenay amband.
YOHAN
utulejin yom yivud yambambay Yesu pamwing nau arund nend a piswimp ni antu akwau. Yom yiney yitukwashin kwijik Yesu wading muntu wa mutapu ik.
ANCH MUNTU WAKWEL ANCH: “Yesu ndiy Nzamb Mwin Dikand Diawonsu.”
Ey utongin nchik?
YOM TWILEJA KAL
Yesu walejana piur pa Want wa Nzamb, wasala yilay, ni wamuziyina Yehova mu yom yawonsu.
Ov, uvurikin?
Wisu mudimu wakusambish wezinay Yesu pa divu?
Yilay yasalay Yesu yitufundishin ik?
Malejan ik ma usey mafundishay Yesu?
JINGUNIN KAND
Yesu wisambina nakash piur pa yom ik?
“Want wa Nzamb—Ukwet Usey Ik Kudi Yesu” (Chinong cha Kalam cha 1 Ngond wa 10, 2014)
Jingunin yom yitwinkishina kashinsh anch Yesu wasala kamu chakin yilay.
“Yom ik Ukutwisha Kwilejin ku Yilay Yasalay Yesu?” (Chinong cha Kalam cha 15 Ngond wa 7, 2004)
Tal mutapu ikundj umwing mwaswimpay mwom wend pilejay mutapu Yesu wayibanginangay antu akwau.
“Nitonginang Kwam Ching Amwinam” (Chinong cha Kalam cha 1 Ngond wa 10, 2014)
Tal list ulejena yom ya usey yasalay Yesu kulondwish chisu chayisalay.
“Yinship Yijim ya Mwom wa Yesu pa Divu” (Ukwash Mulong wa Kwilej Dizu dia Nzamb, chikunku 4)
a Mu dilejan dia 31-33 mwawiy tukwileja yom yivud piur pa Want wa Nzamb.