Mu Sinagog Wa Ku Nazaret

Chakin kamu, kwading kupwitijan kukash mu Nazaret. Mivu yikemp kurutu amubatisha Yesu kudiay Yohan, Yesu wading nsongamabay mwinimwa. Pakwez, katat amwij mudi muntu usadina midimu yikash. Antu adingay nend mu Nazaret akata kusal nend midimu yiney pamwing.

Asangara nakash pamumanangau Yesu ukat kuya mu sinagog kukwatijan ni chaku chend. Mudimu wasadikang kwinikwa wading wa kulembil, wa kutang mikand yafundau kudi Moses ‘mu sinagog rubing rawonsu pa dichuku dia sabat,’ yawiy yom yasadikang. (Midimu 15:21) Ading kand kutang chikunku cha mikand ya uprofet. Chisu chatumbukay Yesu mulong wa kutang, chimeken anch ndiy wading wij yom yivud mu mivu yakumanganay mu sinagog winiwa. Amwinkisha muvungur wa muprofet Isay. Ndiy watana ndond yading yifundinau piur pa Muntu wazizilau many nich spiritu wa Yehova, verse winou tumutanin nlel mu Isay 61:1, 2.

Yesu watanga chikunku chinech chalejana mutapu wasambelau kulejan piur pa Muntu ukeza kulejan rusangu ra kuyikol ankwal, kuyilej amputames rusangu ra kuyerik ni kulejan muvu witiyijinay Yehova. Kupwa kwa kutang muvungur winou, wauchirisha ni waya kushakam. Antu awonsu ading amutadin. Kupwa wachingelaku pakemp ni walonda anch: “Yom yiwateshanganya pinatanganga mu Mukand wa Nzamb yawanyin kal ilel unou.”—Luka 4:21.

Antu ashimoka mulong wa “yom yiwamp yalonday,” ni asambisha kwipulijan umwing ni mukwau anch: “Ov, kindiyap winou mwan wa Josef?” Pakwez, akata anch Yesu asala yilay mudi muntu wateshau chisu chatangay, chawiy Yesu walonda anch: “Chakin kamu, nij anch en ukwinlejany chishimu anch ‘Mwingang, iyoka bil amwiney. Ukwinlejany kand anch. Twateshil kal yom yawonsu yiwasadila ku Kapernaum, katat yisala kand kunoku mu ul wey wa chivadik.’” (Luka 4:22, 23) Anamakwend a Yesu akata anch ayoka bil awiy kwol kwau. Chawiy, awiy atonga anch Yesu wayiswingish kal.

Pajinguninay Yesu yitongijok yau, ndiy wajimbula yom yasadika mu rusangu ra Isarel. Yesu walonda anch kwading adiaafu avud mu Isarel pa chirung cha Elija pakwez, Elija kamutumap kuya kudi adiaafu awonsu adinga mwinimwa. Pakwez, Elija waya kudi mwadiamufu wakad kwikal mwin Isarel wadinga ku Sarepita, ul wadinga piswimp ni Sidon, kwawiy kwasalay Elija chilay cha kumupandish mwan. (1 Ant 17:8-16) Chikwau kand, pa chirung cha Elija kwading antu avud mu Isarel ayela musong wa mak, pakwez muprofet wamwoka ching Naman mwin Siria.—2 Ant 5:1, 8-14.

Mutapu ik wasalau antu adinga mu ul wavadikinay Yesu piur pa yom yateshau ya rusangu rayimekesha anch ading in kwitutul ni aburedin ritiy? Antu adinga mu sinagog ajimana, atumbuka ni asambish kumukadabish Yesu mau pol pa musumb. Amulondula kushik ni ku mukandu ndond yatungau ul wa Nazaret ni akimba mutapu wa kumukwat chakwel amudjibula pansh. Pakwez, Yesu wayikusinika ni wachina pakad kwisupul chitat. Yesu waya ku Kapernaum kwinkaj kwa Karung wa Galalia.