Yesu Usadin Midimu Yishimokishena Mu Kapernaum

Yesu wayitazuka in kwilej anying—Pita, Andare, Jakobu ni Yohan—chakwel ikal ayibind a antu. Pakwez, pa dichuku dia Sabat, aya awonsu mu sinagog wa mu Kapernaum. Pasambishay Yesu kufundish mu sinagog, antu ashimoka nakash piur pa mutapu wend wa kufundish. Mutapu wend wa kufundish wading mudi muntu ukweta ulabu, kadiap mudi mutapu wafundishangau alej a yijil.

Pa dichuku dia Sabat kweza muntu umwing wading ni chilembil. Padingau mu sinagog, muntu winou watoya nich dizu dia piur anch: “Ov, ey Yesu wa ku Nazaret, usotil kutusal yom ik? Ov, ey wezang mulong wa kutushesh etu? Nij kamu nawamp anch, ey udi muruu utumbila wa Nzamb!” Yesu wamwela chilembil wadinga mudiay muntu anch: “Nenet zong, mudiokala kamu muntu winou!”—Marko 1:24, 25.

Pa chisu chinicha, chilembil winou wamwasa muntu winou pansh ni muntu winou wasambisha kwikwany, kupwa chilembil watoya nich dizu dikash. Chawiy, chilembil winou wamudiokala muntu “wakad kumusal chom chiyimp.” (Luka 4:35) Antu awonsu adinga mu sinagog ashimoka nakash! Antu asambisha kwipulijan anch: “Ov, chom ik chinech? Muntu mwinou ukat kuyilej ayilembil, niyau akat kumuziyil.” (Marko 1:27) Chimeken patok anch, rusangu riner rapalangana mu Galalia mwawonsu.

Padiokalau mu sinagog, Yesu nau in kwilejend aya ku chikumbu cha Simon Pita. Kwinikwa mawenend a Pita wading uyedin nakash mashik. Amwita Yesu chakwel amwoka. Chawiy, Yesu waseja piswimp, wamukwata ku chikas ni wamulangwisha. Pakad kulab wayerika ni wasambisha kuya pamwing ni Yesu nau in kwilej, pamwing ap waya nau mulong wa kuyisukin yakudia.

Pa chisu cha urel, antu adiokala ku jindond kushalijan eza nau ayej avud ku chikumbu cha Pita. Chimeken anch antu awonsu adinga mu musumb izula ku chis. Mulong wak? Akimba kuyok. Chakin kamu, ‘antu awonsu ading akweta ayej, ayiletola kudi Yesu. Ndiy wamwanzuka muntu ni muntu makas, chad wayok awonsu.’ (Luka 4:40) Chikalap nchik kukasikan kwa mayej, Yesu wayoka awonsu, mudi mwasambelau kulond. (Isay 53:4) Wayoka kand antu awonsu ading ni ayilembil. Padiokalangau, ayilembil atoyang anch: “Ey udi Mwan a Nzamb.” (Luka 4:41) Pakwez, Yesu wayibarokina ni wayikangesha kulond chom ap chimwing. Ayilembil inay ading ij anch Yesu udi Kristu, chawiy Yesu kakatap anch ayilembil inay imekesha mudi akat kumusadin Nzamb wakin.