In Kwilej Anying Ikal Kal Ayibind A Antu

Pakimbau antu a mu Nazaret kumujip, Yesu wachinina mu Kapernaum, ul udia piswimp ni Karung wa Galalia, utazukinau kand anch “karung wa Genesaret.” (Luka 5:1, TMK) Yom yiney yawanyisha uprofet udia mu mukand wa Isay walonda anch antu a mu Galalia adia piswimp ni karung akez kuman chitokish.—Isay 9:1, 2.

Chawiy, padingay Yesu mu Galalia wadandamena kulejan anch: “Want wa Nzamb udi piswimp!” (Mateu 4:17) Yesu watana in kwilejend anying. Aya nend mu weny pamwing, pakwez, padiokalau mu Yudeya ni Yesu, in kwilej achirikina mudimu wau wa kuta ansh. (Yohan 1:35-42) Katat chidi chisu chifanyidinau kwikal pamwing ni Yesu mulong ayifumba kuwanyish mudimu wau nawamp chisu chikuchirikay mwiur.

Padingay Yesu ukat kuya ku chikumu cha karung, ndiy wamumana Simon Pita, mwanamakwend Andare pamwing nau arund nau akat kuta mand. Yesu waya wandam mu waat mwadingay Pita ni wamuleja chakwel achirika kwinyim kwa chikum. Payau panyim pakemp, Yesu washakama mu waat ni wasambisha kufundish yisak ya antu yading ku chikum cha karung uyakin piur pa Want.

Chapwishay Yesu kuyilej antu, ndiy wamuleja Pita anch: “Twal waat ku mem makurukina, chad ey nau arund ney, djibulany mand men mu mem chakwel ukwatany ansh.” Pita wakula anch: “Nsalejam, twarishang kal nich uchuku wawonsu, kitukwatilap chom. Pakwez mulong wa dizu diey tukupakish bil kand kudjibul mand mu mem.”—Luka 5:4, 5.

Padjibulau mand mau, akwata ansh avud nakash ni pasambishau kupwit, mand minam masambisha kwapuk! Pakad kulab, arund nau adinga piswimp eza mau mulong wa kuyikwash. Chawiy, maat mawonsu maad mizula too nich ansh ni makimba kujiy. Pita pamanay yom yiney, wamwasina Yesu manungun ni walonda anch: “Nsalejam, sejany mwan kulemp, mulong am nidi mwin yitil.” Yesu wamwakula anch: “Kangal wov kwey wom. Kudiokal katat, ey ukez kwikal mwin kulet antu kudi am mudi mukata kuletay chibind ansh mu waat.”—Luka 5:8, 10.

Yesu wamuleja Pita ni Andare anch: ‘Nlondulany, chad nikez kakwikadishany ayibind a antu.’ (Mateu 4:19) Wayitazuka kand, ayibind a ansh akwau aad, Jakobu ni Yohan an enday Zebede. Awiy itiya pakad kwidjidjek. Chawiy, awonsu anying alika mudimu wau wa kuta ansh ni ikala in kwilej a kusambish amulondula Yesu chisu chawonsu.