Mulong Wa Ranaken Umwokin Mwin Musong Wa mak

Payay Yesu nau in kwilejend anying mu mudimu wa kulejan mu ‘ma sinagog madinga mu Galalia mwawonsu,’ rusangu ra yom yiwamp yasalay Yesu rapalangana ndond yawonsu. (Marko 1:39) Rusangu piur pa midimu yend rashika mu musumb mwading muntu uyedina musong wa mak. Mwingang Luka ulondin piur pa muntu winou anch wading uyedin nakash “musong wa mak.” (Luka 5:12) Anch muntu walab nakash nich musong winou uyimp nakash, ukutwish kuyipish yid yimwing ya kumujimbu.

Chawiy lel, muntu winiwa wading uyedina musong wa mak wading mu mwikadil uyimp nakash ni wafanyina kushakam pa ndond ya amwinend. Chikwau kand muntu winou wafanyina kutoy anch: “Nijondilee! Am nijondilee!” anch waman antu asambish kumusejin piswimp mulong wa kuyichidij antu inay chakwel mayej minam kangal mayisamburikin. (In Levi 13:45, 46) Pakwez, yom ik yasalay muntu winou wading ni musong wa mak? Ndiy wamusejina Yesu ni wawa pansh kurutu kwend, wamwilembila anch: “Nsalejam anch ey ukatil, ukutwish [kwintokish].”—Mateu 8:2.

Muntu winou wading ni ritiy rijim mud ik mudiay Yesu! Chading cha ushon mud ik pa kumuman muntu mudi winou uyedina! Yesu wakula mutapu ik? Yom ik wafanyina kusal anch wading pinipa? Nich ranaken rawonsu, Yesu wamusuburila yibel yadinga ku makas mend kupwa wamukwata. Yesu wamuleja anch: “Nikatin! Ikal utokina.” (Mateu 8:3, TMK) Chading chom chikasikena kwitiyij kudi antu, mulong muntu winou wading ni musong wayerika kapamp kamwing.

Mutapu ik ukutwisha kwiyov anch wikal ni mwant ukweta ranaken ni usu mudi Yesu? Mutapu Yesu wamusadinay muntu winou wadinga ni musong wa mak utwinkishin kashinsh anch pakwikalay Yesu Mwant wa mangand mawonsu, uprofet wa Bibil ulondina anch: “Ukat kumwovil chimanamar riy, ni uburedina kand. Ukat kuyipandish atuzwendj,” ukez kuwanyin. (Kuseng 72:13) Chakin kamu, Yesu ukez kuwanyish maswir mawonsu nich rukat mulong wa kuyikwash antu awonsu amena mar.

Vurik anch, ap anch Yesu wamwoka muntu winou wadinga uyedina musong wa mak, pakwez mudimu wend wa kulejan wawiy wayisangaresha nakash antu. Katat antu ateshin yom yiwamp yasalay Yesu. Pakwez, Yesu kakatap anch antu ateka ritiy rau mudiay ndiy mulong wa yom yateshau kusu. Ndiy wading wij uprofet ulondina anch: ‘kakezap kulond nich dizu dikash mu mikombil,” mulong wa kwitumbish. (Isay 42:1, 2) Pakwez, Yesu wamuleja muntu wading ni musong wa mak anch: “Tesh nawamp. Kangal wamulejamu muntu. Yang swa kudi mwin kupesh chakwel akutala. Chad upana yakupesh mudi mwalonday Moses.”—Mateu 8:4.

Mud mutapu ukutwisha kutongin, muntu winou wova musangar nakash pamwokau ni wakanganya kulam ujindj wa yom yamanay. Muntu winou waya ni wasambisha kupalangesh rusangu riner kudi antu awonsu. Rusangu riner rayishimokisha nakash antu ni rayisangaresha. Rusangu riner rawiy ramukangesha Yesu kumekan patok mu musumb, chawiy ndiy waya pa ndond ya amwinend. Chikwau kand, antu adiokala ku jindond kushalijan eza kudiay ndiy mulong ayifundisha ni ayoka.