In Musong Wa Mak Dikum Okau —Umwing Ndiy Wajikitisha

Pajinguninay mupak wa in Sanedrin anch akimbin kumujip, Yesu waya mu musumb wa Efraim wading kwindum kwa Yerusalem. Washakama kwinikwa pamwing ni in kwilejend mulong wa kwiyep akankuny end. (Yohan 11:54) Chawiy, chisu chakusal musambu wa Pasak wa muvu 33 C.C. chaseja, chawiy Yesu wirijeka mulong wa kuya mu weny. Ndiy waya kwindum kwa Samaria kupwa waya kand mu Galalia, winou wading weny wend wa nsudien kurutu afa.

Pading payilay mu weny winou, ukat kusut mal kushalijan, ndiy wasankanijana ni antu dikum ading ayedina musong wa mak. Chakin kamu, anch musong winou walab ukat kumukatwish muntu yidi yend ya mujimbu mudi miny ya ku makas ap ya ku mend ap matu. (Kuchind Michid 12:10-12) Chijil cha Nzamb chading chilejen anch muntu ukweta musong wa mak wafanyina kutoy anch: “Nijondile! Am nijondile!” ni wafanyina kushakam pa ndond ya amwinend.—In Levi 13:45, 46.

Chawiy kand, in musong wa mak dikum inay ading palemp ni Yesu. Chawiy chatoyau anch: “Mwant Yesu! Itwovila riy!” Payimanay Yesu in musong wa mak inay ndiy wayileja kapamp kamwing anch: “Yangany, akutalany kudi in kupesh.” (Luka 17:13, 14) Yesu wasala mwamu mulong wa kulimish Chijil cha Nzamb chalonda anch in kupesh awiy afanyina kumulej muntu wadinga uyedina musong wa mak anch wayerik kal ap bwat. Kupwa kwa kuyerik antu inay afanyina kushakam pamwing ni antu akwau.—In Levi 13:9-17.

In musong wa mak inay dikum ading ni ruchingej mu yilay yasalay Yesu. Ap anch ading kandikal ayerika pakwez awiy aya kuyital in kupesh. Padingau mwi njil, ritiy rau ratekau mudiay Yesu rayikwasha. Iyova anch ayerikal ni aya kushakam!

Antu chidivu okau musong wa mak aya rawonsu. Pakwez, umwing kayap rawonsu. Muntu winou wading mwin Samaria wachirika kumukimb Yesu. Mulong wak wachirikay? Muntu winou weza mulong wa kumujikitish Yesu nakash mulong wa yom yasalangay. Muntu winou wokau “wamushimana Nzamb nich dizu piur,” wajingunina anch Nzamb ndiy wasalang anch amwoka musong wend. (Luka 17:15) Pamutanay Yesu, ndiy wasa manungun mend kurutu kwa Yesu mulong wa kumujikitish.

Yesu wamwipula muntu winou piur antu akwau adingay nend anch: “Ov, kinayokangap antu awonsu dikum? Ing, akwau chidivu adi kwisu? Ov, kwikil kand muntu mukwau watonganga kuchirik mulong wa kumujikitish Nzamb, ching kusu kwau mweny ou?” Kupwa Yesu wamuleja mwin Samaria winou anch: “Tumbuk, yang kwey. Ey wapand kal mulong wangitiyij kal am.”—Luka 17:17-19.

Payokay in musong wa mak dikum, Yesu wamekesha patok anch wading ni usu wa Yehova Nzamb. Kadiap kusu muntu umwing wayerika pakach pa in musong inay okau kudi Yesu, pakwez umwing kusu ndiy waya mwi njil yitwadina ku mwom. Tudiap mu chirung chamusadinau Yesu kudi Nzamb mulong wa kuyok antu mu chilay. Pakwez, anch twatek ritiy retu mudiay Yesu, tukutwish kuya mwi njil yitwadina ku mwom—wa chikupu. Ov, tukat kumekesh muchim wa kujikitish mudi wamekeshay mwin Samaria winou?