Ipukany Kuzuwol pa “Dichuku dia Rusangu Ruwamp”

ANTU anying akweta musong wa mak akarumuna yitongijok yau. Kwikil muntu ap umwing wayinkisha yipan ku chisu cha musumb. In Siri adinga aunyingumukina musumb wa Samaria chawiy chaleta nzal yikash. Kwikil chom chandama mu musumb chawiy usey wa yakudia wakandama nakash. Chawiy chisambidinau piur pa chishiken chimwing cha kuyidia antu kudi antu akwau.—2 Ant 6:24-29, NW.

In musong wa mak asambisha kutong anch: ‘Ov, mulong wak tulikina kwandam mu chibeng cha in Siri? Kwikil chom chitukushadisha.’ Pa urel winiwa, asambisha kuya pikwikala mididim bwi. Pashikau mu chibeng, mwadinga zoong. Kikwadingap in kulam. Ayimbur adinga akukas, pakwez kikwadingap amasalay. Awonsu anying atala mwi ntent yimwing. Kimwadingap muntu, pakwez ching kusu yakudia ni ya kuna yadingamu too. Adia ni ana. In mak inay amana kand or, argent, yidjal, ni yom yikwau ya usey. Ayisenda aya akayijindjik, achirik kand mulong wa kusend yikwau. Chibeng chawonsu chishadila kwau. Yehova wasala chilay ni in Siri ova rushind ra mend ma amasalay adinga ezinaku. Chatongay anch sot ayandamina, chawiy in Siri afukula mau achin. Yom yawonsu yashala mwinimwa ni kwadingap muntu wa kuyisend!

In mak adinga ni kuya ni kujindjik kwindjing yom ya usey. Pakwez, chitongijok chakwel anch akwau in Samaria adinga afil nzal ya pa mes bwi chayeza mu manangu. Asambisha kulond umwing ni mukwau anch: “Chom tusadila ech kichiwapinap. Dichuku dined didi dichuku dia rusangu ruwamp!” In mak achirika mu Samaria ni apalangesha rusangu ruwamp ra yom yamanau.—2 Ant 7:1-11, NW.

Niyetu tushich pa chirung chitukutwisha kulond anch chidi “dichuku dia rusangu ruwamp.” Pisambinay piur pa chom chimwing chijim cha “chijingidij . . . cha disudiel dia mangand,” Yesu walonda anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” (Mat. 24:3, 14, MM) Chom chinech chifanyidin kwikal nich usu ik padi etu?

Yom ya Mwom Yikutwish Yatukwat

Asangara nakash mulong wa yom yamanau, pakwez in mak inay avuramenaku musumb wa Samaria. Manangu mau mawonsu madinga pa yom yikutwishau kwikal nich. Ov, chom mudi chinech chikutwish chatushiken? “Tumungun” tudi yimwing ya yom yisadila chijingidij chilejena chisu cha disudiel dia mangand. (Luka 21:7, 11) Yesu wayibabesha in kwilejend anch: “Dimukany en ayinen, palemp michim yen yakifund kudia ni kukwachik kwa maruvu ni yom ya mwom winou.” (Luka 21:34) Chitudia in Kristu, tufanyidin kudimuk chakwel kangal twayilik milong ya mwom wetu wa pichuku pichuku yitushikija ku kuvuramen anch tudi mu “dichuku dia rusangu ruwamp.”

Mband umwing mwin Kristu ukweta dijin dia Blessing kadingap ni kulikin milong yend ya mwom yimukwata nakash. Wasala mudimu wa uchibol, mu chirung chawonsu chadingay ku shikol, eza kumwat kudiay mwin kusadil ku Bethel, niyend amwitiyija ikala chid cha dijuku dia Bethel udia ku Bénin. Ndiy ulondil anch: “Nikat kukombang ni kukorop mu yikumbu, pakwez niusangaredin nakash mudimu wam.” Katat Blessing ukutwish watal ku mivu 12 yasutila kal ey mu mudimu wend wa chisu chawonsu ni kusanger anch mulong wajikishina mes mend pa “dichuku dia rusangu ruwamp” mutudia ni katat unou.

Dimukinany Yom Yikata Kupwit Chisu Nakash

Payitumay in kwilej 70, Yesu wayileja anch: “Chakin, mbut yaswang kal, pakwez in kwangul adi akemp; chawiy en lembilany kudi Mwant wa jimbut chakwel ayituma in kwangul jimbut jend.” (Luka 10:2) Mudi muchidinga, anch walambany kwangul jimbut jikutwish jayip, kuzuwol mu mudimu wa kulejan kukutwish kwashikij ku kusheshik kwa antu. Chawiy Yesu wawejinaku kand anch: “Kangal walangwishijanany ni muntu mwi njil.” (Luka 10:4) Dizu dia rudim ra kusambish rasadila pinap mulong ‘kulangwishijan’ dikutwish diarumburik yom yivud kupandakanamu kulond kwau kusu anch “ulongany” ap anch “wendang ap ushalang nawamp.” Dikutwish kand diarumburik kubwikatijan ni kwambamb chisu chilemp kukata kushiken anch arund atanijan. Chawiy Yesu wayileja in kwilejend chakwel ipuka yom ya chamwamu yikutwisha kuyizuwol ni kuyisheshin chisu chau. Uruu wadingau ni kulejan wadianga wa swa-swa.

Tonginanyap bil chisu chikutwisha kusut kwau ku kwipuwej. Mu kusut kwa mivu, mu jindond jivud televizion ndiy udinga wa kusambish ku kusutish chisu. Ov, chidi nchik pa mulong wa matelefon makwetau antu ni ma ordinater mau? Kukimbijol kumwing kwasadilau mukach mwa antu amakurump 1000 mu Grande-Bretagne kulejen anch “mwayen wa antu ashicha Grande-Bretagne asutishining minit 88 pa dichuku ni dichuku mu kwambambin ku telefon wa mu chikumbu, ni minit yikwau 62 ku telefon wa kusend ku makas, minit yikwau 53 mulong wa kutumol mikand ku Internet ni minit 22 mulong kutum jinsangu ni telefon.” Uvud wa minit yiney yawonsu yipandaken tupamp twaad uvud wa chisu chifanyidinay chibol nkwash kusutish mu mudimu wa kulejan pa dichuku ni dichuku! Ov, ey ukweting chaku ik cha kwambambang ku telefon ni kufundol pa Internet?

Ernst ni Hildegard Seliger adinga adimukin pa mutapu wa kusadil chisu chau. Awiy, asutisha mivu 40 ni kusut mu yibeng ya in Nazi ni mu rukan ra in Kominist. Payilikishaku, asala mudi ayibol djat ni pafilau.

Antu avud asotining kusal mudi mwasalau a Seliger. Antu inay adinga atijadina adinga ni kusutish chisu chau chivud mu kutang ni kufund mikand. Pakwez, milong ya muspiritu yawiy yadinga ya kusambish mu mwom wau.

Chakin kamu, etwawonsu tukatining kwisambang ni akatish netu, ni kwikil chom chiyimp mu kusalang mwamu. Kukarumunaku chom kanang mu yitusadilinga kukukutwish kwikal kwa usey mulong wetwetu. Ap mwamu, tukusadil manangu anch twayikel nawamp yom yikata kusutisha chisu chetu pa chirung chinech mulong wa kulejan rusangu ruwamp.

Kulejan Rusangu Ruwamp Muchifanyidina

Chidi chiyukish mudi ik kushakam mu chirung cha “dichuku dia rusangu ruwamp.” Kangal twazuwolany mudi mwasalau in mak anying pa kusambish. Vurikany anch ashikena ku kulond anch: “Chom tusadila ech kichiwapinap.” Chawiy chimwing, kichiwapinap kudi etu kulikin milong yetu ap yom yikata kushesh chisu yitukangesha kusal muchifanyidina mu mudimu wa kulejan.

Pa mulong winou, tukwet chilakej chipandakenamu kuwap chitufanyidina kwimburij. Pavurikay yom yasalay kwisambishil kwa mivu 20 ya mudimu wend wa kulejan, kambuy Paul washikena ku kufund anch: “Nizwisha kulejan rusangu ruwamp ra Kristu.” (Rome 15:19) Paul kalikinap chom ap chimwing chikepisha mushiku wend. El twikalany nich mushiku mudi mwadingay mulng wa kulejan uruu wa Want mu “dichuku dia rusangu ruwamp” dined.

[Chipich chidia pa paj wa 31]

Blessing kalikinap milong yend yipwitijana ni mudimu wend wa chisu chawonsu

[Chipich chidia pa paj wa 32]

A Seliger adinga ni kuta muchim pa mutapu wadingau ni kusadil chisu chau