Yesu Umwokin Changadim Ni Umwokin Kand Kajikamatu

Kupwa kwa kuyilond Afaris patok mulong wa kusadil kwau kwa yinshakur Yesu waya nau in kwilejend. Aya mwi ngand ya Tir ni Sidon yadinga mu Fenisiy, ngand jinej jading kulemp nakash kwinkaj.

Yesu watana chikumbu cha kushakam, pakwez kakatap antu ijika anch wezang kal. Pakwez, chading chimukasikedin kwijindjik. Mband umwing mwin Grek wavadikina mwi ngand yiney wamumana Yesu ni wamwilembila anch: “Mwant, ngovila riy, ey Mwan wa David. Mwanam mband umen kamu mar ma chilembil muyimp.”—Mateu 15:22, TMK; Marko 7:26.

Kupwa in kwilej amuleja Yesu anch: “Mwopata, aya! Mulong ndiy utulondwil etu nich masok nakash.” Yesu kakatap kumwopat mband winou chawiy wayileja in kwilejend anch: “Am antuma kuya kudi amikoku ashadikina, awiy kamu in Isarel.” Mband winou kayap. Pakwez, ndiy waseja ni wawila ku mend ma Yesu ni wasambisha kumwilembil anch: “Mwant, nkwashap, amboku!”—Mateu 15:23-25.

Mulong wa kupak ritiy ra mband winou, Yesu wasadina chitongijok chiyimp cha in Yuda piur pa mutapu wayimanangau antu a michid yikwau palonday anch: “Kichifanyidinap kunon yakudia ya an kuyidjibwil an a atubu.” (Mateu 15:26, NWT) Palonday anch “an a atubu,” Yesu wamekesha yovil yend ya ranaken kudi antu akad kwikal in Yuda. Chifu chend ni mazu mend ma ranaken mafanyina kumekesh patok yovil yend.

Pa ndond pa kujiman, mband winou wasadina chilakej cha kasolikany kadingau nich in Yuda, chawiy walonda nich kwikepish anch: “Mwawiy, Nsalejam. Pakwez, ap mwamwap nchik, an a atubu niyau akat kudia yipuchipuch yikata kupaloshau mwishin mwa tebur wa ansalejau.” Chawiy, Yesu wajingunina mwikadil uwamp wa muchim wadingay nich mband winou ni walonda anch: “A! mband ey, ukwet ritiy rijim nakash, chikala kwau mudi muusotila.” (Mateu 15:27, 28, NWT) Chawiy, mwanend wayerika ap anch kadingap pamwing ni makwend kwinikwa! Pachirikay mband winou kwol kwend, wamutana mwanend mband ulel pa ulal wayerikang kal kamu ni—“chilembil muyimp wamudiokalang kal.”—Marko 7:30.

Yesu pamwing nau in kwilejend adiokala mu Fenisiy mulong wa kuya mwi ngand yadinga ushad wa Wit wa Yordan. Chimeken anch aya ushad wa Yordan kwinkaj kwa Karung wa Galalia mulong wa kuya mwi ngand ya Dekapol. Pashikau kwinikwa, aya ku mukandu, pakwez antu ayishindakesha kwinikwa. Antu amuletina Yesu ayilim, ayibid, amputames, ni atumam. Ayitula ku mend ma Yesu chad ndiy wayoka awonsu. Ashimoka nakash ni amutumbisha Nzamb wa in Isarel.

Pakwez, Yesu wamushinshikina nakash muntu wadinga kamam ni wadinga kajikamatu. Tongin mutapu wovay muntu winou padingay pakach pa antu avud. Pamwing ap pamanay Yesu mutapu wadingay muntu winou, chawiy wamusenda waya nend kuns. Padingau ayinau aad, Yesu wamuleja chom chikimbinay kumusal. Yesu wateka miny yend mu matu ma muntu winou kupwa, wachila mat mend ku miny ni wakwata ku ridim ra muntu winou. Kupwa Yesu watala mes mwiur, ni walonda mazu mamwing marumburikina anch “Jikuk.” Kapamp kamwing matu ma muntu winou majikuka ni wasambisha kulond nawamp. Yesu kakatap kupalangesh jinsangu ja yom yasalangay, ndiy wakata anch antu amwitiyija ayinau kusutil ku yom yikwimenau ap yikuteshau ayinau.—Marko 7:32-36.

Usu wadingay nich Yesu wa kuyok antu wading ni chibachikin chikash padi antu amana yom yiney chawiy “ashimwoka nakash.” Kupwa alonda anch: “Ndiy wasalang kal yom yawonsu yiwamp. Wamujikul kal kajikamatu, wamulondish kal kamam.”—Marko 7:37.