Wayerik Kal Pamukwatay Kal Yesu Ku Disun

Pachirikay Yesu mu Dekapol rusangu rend rapalangana kudi in Yuda amwing ading ashicha kwinkaj kwa chikum cha Karung wa Galalia. Chimeken anch antu avud atesha anch Yesu waninetishang rinkind mukash watutang pa karung ni antu akwau ading ij anch ndiy wokang antu amwing ading nau ayilembil. Chawiy, “chisak chijim cha antu” chakumangana ku chikum cha karung mulong wa kumwak Yesu, pamwing ap chading chikumu chadinga mutambu wa Kapernaum. (Marko 5:21) Pasejay Yesu ku chikum, antu asangara nakash ni ading achingedin kushik kwend.

Muntu umwing wading uchingedina kamu nakash kumuman Yesu wading Yayirus, mukurump watakelang mu sinagog, pamwing wading sinagog wa mu Kapernaum. Ndiy wawila ku mend ma Yesu ni wamwilembila Yesu tupamp tuvud anch: “Mwanam mband udi piswimp ni kufa. Ez, amboku, umwanzuk makas mey chakwel ukutwish kuyerik, apanda.” (Marko 5:23) Mutapu ik wasalay Yesu pamwilembilau kudi Yayirus chakwel amwoka mwanend mband wakatay nakash wadinga ni mivu 12?—Luka 8:42.

Padingay Yesu uyil ku chikumbu cha Yayirus, Yesu wading wovil ushon wa yom yikwau. Antu avud ading ayila ni Yesu ading achingedin kumuman mutapu ukutwishay kusal chilay chikwau. Pakwez, mband umwing wading mu chisak cha antu inay waya mulong wading uyedin nakash.

Mband winou mwin Yuda wading uyedin musong wa rulong ra mash mu mivu 12. Waya kwiyokish kudi amingang avud, wasadina nfalang jend jawonsu jadingay nich mulong wa kuland mwon yamulejau kudi amingang. Pakwez, kayerikap. Chawiy, musong wend “wapandakana lel nakash.”—Marko 5:26.

Ukutwish kwijik anch musong wend wading umuziyishin, umwakamishin ni umwovishin usany. Yisu yivud, kadingap ni kwisambin patok piur pa musong wend. Chikwau kand, kukwatijan ni Chijil cha Moses muntu mwawonsu wading ni kupwek mash amumananga mudi wijondil. Muntu mwawonsu wamukwatang mband upwekina mash ap kukwat ku disun dikweta mash, muntu winou wafanyina kwowal mem ni amumanang mudi wijondila kushik urel.—In Levi 15:25-27.

Mband winou “watesha yom yasalay Yesu,” chawiy chayay kumukimb. Mulong wa kwijond kwend, ndiy wishinya ku ujindj mu chisak cha antu, ni wasambisha kutong amwinend anch: “Anch namupukun kusu ku masun mend, nikuyerik kwam.” Pakwatay ku disun dia Yesu, wiyova kapamp kamwing anch mash mend mapwekinap kand! Chad wiyova anch ‘wayerik kal ku musong wend ukash.’—Marko 5:27-29.

Kupwa Yesu wipula anch: “Ov, nany wampukunangaku?” Utongin nchik mutapu wiyovay mband winou pateshay chipul chinech? Pita wamutadikisha Yesu pamwakulay anch: “Mwant, antu akushinyeshin mutambu ni mutambu.” Chawiy mulong wak Yesu wipula anch: “Ov, nany wampukunangaku?” Yesu walonda anch: “Nij nawamp anch muntu umwing wampukunangaku, mulong novang ukash wandiokal.” (Luka 8:45, 46) Mwaning kwokan kwokanay Yesu kwading kwa usu wadingay nich.

Pamanay mband winou anch amujingunin kal, chawiy ndiy waya wawa ku mend ma Yesu, wova wom nakash ni wasambish kuzal. Ndiy walonda uyakin piur pa musong wend ni mutapu wayerikay kal kurutu kwa antu awonsu. Yesu wamwongoja mband winou pamulejay anch: “[Mwan] mband, ey wayerik kal mulong wa ritiy rey. Yang kwey nich chisambu, musong wey wapwa kal kamu chikupu.”—Marko 5:34.

Chakin kamu, Muntu watondau kudi Nzamb mulong wa kuyikel pa mangand udi muntu muwamp, wa ranaken kakatap kusu kuyiking antu pakwez ukwet kand usu wa kuyikwash!