Changadim Wachirik Kal Kand Ku Mwom!

Yayirus wamana mutapu wamwokau mband umwing wading ni musong wa rulong ra mash kudi Yesu. Chakin kamu, Yesu ukutwish kumukwash kand mwan mband wa Yayirus pakwez, Yesu wajingunina anch ‘mwan mband winou wafa kal.’ (Mateu 9:18) Ov, Yesu ukutwish kand kumukwash mwan mband winou?

Padingay Yesu ukat kwambamb ni mband wokay, antu amwing adiokala ku chikumbu cha Yayirus eza kumulej anch: “Mwaney mband wafa kal!” Alonda kand anch: “Ing, mulong wak umuswidioshina kand Mulej?”—Marko 5:35.

Rusangu riner rading ra ushon mud ik! Mulong muntu winou ading amulimishin kudi antu avud, katat ukwet kuswir kwa ukwash. Mwanend umwing kusu mband wafa kal. Pateshay Yesu rusangu riner, chawiy wamutala Yayirus ni wamukasikesha anch: “Kangal wov kwey wom, chom chijim, ikal kwey nich ritiy.”—Marko 5:36.

Chawiy, Yesu waya pamwing ni Yayirus ku chikumbu chend. Pashikay ku chikumbu atana antu akat kudil nakash. Antu ading kwinikwa ading akat kudil kwa ushon nakash ni ading inanin. Yesu wandama mu chikumbu ni wayileja antu anch: “Mwan winou kafilap, ulel kwend tul!” (Marko 5:39) Pateshau antu mazu minam amusipa nakash Yesu. Ading ni kashinsh anch mwan winou wafang kal. Mu kusadin usu wa Nzamb ukata kupan usu, Yesu ukumekesh patok anch chiswapel kuyichirish antu afila kal ku mwom mudi mukatau kumulangwish muntu ulela mu tul tukash.

Kupwa Yesu wayibudisha antu awonsu pol, pakwez Pita, Jakobu, Yohan ni anvaj a mwan awiy ashala. Yesu waya pamwing nau antu inay atan pa ndond yading yimuladikinau mwan. Wamukwata mwan winou ku chikas chimwing walond anch: “‘Talita kumi,’ charumburik anch: ‘Mwan mband, nakulej anch, lank!’” (Marko 5:41) Kapamp kamwing, ndiy walanka ni wasambisha kwend. Tong musangar wovay Yayirus ni mukajend pamumanau mwanau wikal kal mwom! Mulong wa kumekesh anch changadim winou udi mukash, Yesu wayileja anvaj end chakwel amwinkisha yakudia.

Mudi mwasalangay Yesu yisu yimwing, anch wayok antu wayilejang anch kangal ayilejamu antu akwau, chawiy wayileja kand anvaj a changadim winou kusal mwamu. Pakwez, anvaj a changadim winou ni antu akwau asangara nakash mulong wa chom chinech ni apalangesha rusangu riner “mwi ngand yiniya yawonsu.” (Mateu 9:26) Ukutwishap kwisambin piur pa yom mud yiney yisangareshina anch wamuman mukatish ney wafilakal pakwez wachirik kal kand ku mwom? Rawiy rusangu ra kaad ra divumbuk diasalay Yesu.