Ukwash wa “Nzamb [Mwin Kupan] Kudandamen ni Kwongoj”

MIVU 2 000 yasutina kal, Paul nfund a Bibil wamujimbula Yehova mudi “Nzamb [mwin kupan] kudandamen ni kwongoj.” (Rom 15:5) Mulong Bibil utwinkishin kashinsh anch Yehova kakatap kukarumuk mu kusut kwa chisu, tukutwish kumuchingejin Nzamb anch ni katat uchikat kuyongoj antu amusadidila. (Yakob 1:17) Chakin, Bibil ulondil piur pa Yehova anch ukat kuyongoj antu adia mu maswir mu jinjil kushalijan. Jisu jinjil jinej jimwing? Nzamb uyinkishin usu antu akata kukarumukin kudi ndiy mu malembil, amwitininga ukwash. Ndiy uyibachikining kand in Kristu akin ayongoja ambay nau akaritiy. Ni Yehova wateka jinsangu jisangareshina muchim mu Dizu diend, Bibil, mulong wa kuyikasikesh antu anenganena mulong afisha mwanau. El tushinshikinany mitapu yiney yisatu ya kwongoj, umwing ku umwing.

Yehova “Wamwova”

Mwant David wafunda piur pa Sakatang wetu, Yehova anch: “En antu, kungamenany mwi Ndiy miten yawonsu, burilany michim yen kurutu kwend. Nzamb Ndiy kwikang kwetu.” (Kuseng 62:8) Ov, mulong wak David wamuchingejina Yehova mwamu? Pilondilay amwinend, David wafunda anch: “Nshon kazwendj ou wadila, [ Yehova] wamwova, wamupandisha ku milong yend yawonsu.” (Kuseng 34:6) Mu mar mawonsu mamutana, David wadinga ching ni kumulembil Nzamb amukwasha, ni Yehova wading ching ni kumukwash. David wadinga wij kusutil ku yamana anch Nzamb ukumukwash chakwel adandamena.

Anvaj anenganena aswiridin kwijik anch Yehova ukuyikwash mu ushon ujim, mudi mwamukwashay David. Akutwish kumusejin mwin “kutesh malembil” mujim, ni kumuchingejin anch ukuyikwash. (Kuseng 65:2) William, wisambinangau mu mutu wa mulong wasambelang wafunda anch: “Chisu chivud nadinga ni kwiyov anch nikutwishap kujijaman pa chisu ap chimwing pakad mwanam, ni namwita Yehova atudisha. Yehova wanginkisha usu ni dikasikesh dia kudandamen kwikal mwom.” Anch niyey wamulembil Yehova nich ritiy, Nzamb mujim wa mwiur ukez kukukwash. Twamb oku twel oku, Yehova Nzamb uyishidilamu antu asadila usu wa kumusadil anch: “Am [ Yehova] Nzamb wen. Nikez kakukasikeshany ni kukulejany anch: ‘Kangal wovany wom, nikukukwashany.’”—Isay 41:13.

Ukwash wa Arund Akin

Chisu chivud antu afishina mwan aswiridin chisu cha kudil kusu ni kubudish yovil yau. Pakwez, chikwikalap cha manangu ku mutambu wau kwiyep chisu chilemp antu akwau. Kukwatijan ni Jinswir 18:1, “Muntu ukat kwiyauril kudi akwau” ukutwish kuman mar. Chawiy lel, antu anenganena afanyidin kudimuk kangal awila mu mupit wa kwiyauril.

Arund amwovila Nzamb wom akutwish kuyikwash nakash antu adia mu mar. Jinswir 17:17 ulondil anch: “Murund ukat kumekesh kukat machuku mawonsu. Mwanamaku wavadika mulong wa kukwash mu yom yikash.” Lucy, wajimbulangau mu mutu wa mulong wasambelang ou, amwongoja kudi arund akin kupwa kwa rufu ra mwanend. Parumburilay piur pa arund nend a mu chikumangen, walonda anch: “Kwingedin kwau kwakwasha nakash, ap anch pa yisu alonda pakemp. Murund umwing wangendina pa machuku ma nadinga amwinam. Ndiy wadinga wij anch nikutwish kudil, ni wadinga kwez twadil nend pamwing. Mukwau wadinga ni kwintazuk dichuku ni dichuku mulong wa kwinkasikesh. Akwau niyawiy atutazuka kwol kwau mulong wa kudia, mwamu mwadandamenau kusal.”

Ap anch kusansan kukash kwovilingau anvaj pakatau kufish mwanau kukatap kupwa swa, kumulembil Nzamb ni kwinung pamwing ni arund in Kristu kukez kuyongoj nakash antu anenganena. Anvaj avud in Kristu afishap kal mwan ashikena ku kujingunin anch Yehova udi pamwing nau. Inge, Yehova “ukat kwok abukikina mu muchim, ukat kukas yitat yau.”—Kuseng 147:3.

Jinsangu ja Bibil Jongojina

Kuwejin pa malembil ni urund ukasikeshina, Dizu dia Nzamb diafundau didi musul wa rongoj kudi antu adidila. Jinsangu jidia mu Bibil jimulejen Yesu anch ukwet impu yikash ni usu wa kudiosh kusansan kwovilingau anvaj afishina kusutil ku kuyisangul afu. Jinsangu jinej jikat kuyongoj chakin antu anenganena. Tushinshikin kakat jinsangu jinej jaad.

Luka shapitre wa 7 wisambidin chom chasadika chisu chasankanay Yesu antu a mu ul wa Nain adinga ayil kujik mufu. Kwashala pakemp ela kumujik mwan kapokal wa mwad-a-mufu. Verse wa 13 ulondil anch: “Mwant chamumanay wamwovila riy, wamwel anch, lik kudil.”

Antu akemp kusu akutwisha kumulej maku ufishina mwanend anch lik kudil oku ayil kumujik. Ov, mulong wak Yesu walonday mwamu? Mulong wading wij anch ushon wa maku sot upwa. Rusangu ridandamedin kulond anch: “[ Yesu] waseja piswimp wapukun ku chital, ni in kumusend imana. Ndiy walonda anch: Nsangarum, nakwel anch, Lank. Wadinga mufu watumbuk, wasambish kulond. Ndiy wamupan kudi makwend.” (Luka 7:14, 15) Pa chisu chinicha kamu, maku wadila kand, pakwez chisu chinecha wadila mulong wa musangar.

Dichuku dikwau, Yesu wadinga piswimp ni chikumbu cha Yairus, wadinga umwitina amukwasha mulong wa mwanend mband wa mivu 12. Kachisu kakemp kusu, muntu weza wamulej anch mwan mband wafa kal. Rusangu riner raziyisha muchim wa Yairus, pakwez Yesu wamwela anch: “Kangal wov wom, itiy kusu.” Pashikau ku chikumbu chend, Yesu wandama mwadia mwan mband mufu. Wamukwat ku chikas, wamwel anch: “Mwan mband, nakwel anch [Lank].” Chom ik chasadika? “Kukashimuk mwan mband walanka, watumbuk wend.” Mutapu ik wasalau anvaj end? “Ashimok ni kushimok kujim.” Mudi Yairus ni mukajend amwaka mwanau mband, ova musangar ujim nakash. Chadinga mudi amen chilat.—Marko 5:22-24, 35-43.

Jinsangu jinej ja Bibil piur pa disanguk dia an jilejen chikutwishau ilel anvaj kuchingejin kurutu. Yesu walonda anch: “Muten ukat kwez ukeza kateshau awonsu adia mwi nzay chidjimin cha dizu diend, ni kubudik.” (Yohan 5:28, 29) Yehova watenchika anch Mwanend eza ayinkish mwom antu afa kal. Tutikit twa mamiliyon twa an afa kal akez “[katesh] . . . chidjimin cha dizu diend” pakezay kuyel anch: ‘Nakwedilany anch Lankany!’ Anikanch inay akez kusambish kand kwend ni kulond. Mudi Yairus ni mukajend, anvaj a an inay akez “[Kushimok] ni kushimok kujim.”

Anch wafisha mwan ikundj ap mwan mband, ijik amboku anch Yehova ukutwish wakarumun ushon wey wikal musangar kusutil ku disanguk. Chakwel kutaninamu mu ruchingej riner rijim, ziyil ku dikasikesh dia nfund a kuseng anch: “Musurubany Nzamb ni ukash wend, sotany mpal yend machuku mawonsu wakad kulik. Vurikany yisalijok ya kushimok yasadilay, yilay yend.” (Kuseng 105:4, 5) Inge, musadilany Nzamb wakin, Yehova, ni mwifukwilany mudi musotilay.

Chibudikin ik chikwikalaku katat anch “[wa]musurubany Nzamb”? Kusutil ku malembil mey Nzamb ukez kukwinkish usu, ukez kutan kwongoj kusutil ku kubangin kwa rukat kwa ambay akin in Kristu, ni ukez kusangar kwilej Dizu dia Nzamb. Chikwau, mu machuku ma kurutu madia piswimp, ukez kuman ‘yisalijok yishimokishina ni yilay’ yikezay kusal Yehova chakwel utaninamu yiyukish ya chikupu ni mwaney wafisha.

[Kamushet kadia pa paj wa 5]

“Ez ni Mband Wafishina An End Aad”

Kehinde ni Bintu, ambay Atuman a Yehova atijadina a mu Nijeriya, an au aad afa ku motak wawa. Kudiosh pinipa, amana mar ma kusansan kukash mulong wa rufu riner. Ap mwamu, ruchingej rau mudiay Yehova rayikwasha, ni adandamena kuyilej amutej nau uruu wa ruchingej udia mu Bibil.

Antu akwau amana chadingau zoong ni usu wamekeshau Kehinde ni Bintu. Dichuku dimwing mband umwing utazukinau anch Ukoli wamwela umwing wa arund a Bintu anch: “Ez ni mband wafishina an end aad pa chisu chimwing pakwez udandamedin kulejan uruu wa Bibil. Nisotil nijika chom chimwinkishina usu wa kujijaman.” Pezay Bintu ku chikumbu cha mband winou, Ukoli wamwela anch: “Nisotil kwijik ov, mulong wak udandamedina kulejan piur pa Nzamb wajipina an ey. Nzamb wansenda mwan am mband umwing kusu. Kudiosh pinipa, nimusotilingap kand.” Bintu wasadila Bibil mulong wa kurumburil mulong wak ufilingau antu ni mulong utufanyidina kwikal nich ruchingej rakanshish anch antu afa kal akez kusanguk.—Midimu 24:15; Rom 5:12.

Kupwa, Ukoli walonda anch: “Am nitongining anch Nzamb ndiy uyijipininga antu. Katat nijik kal uyakin.” Wakwata mupak wa kwilej Bibil ni Atuman a Yehova chakwel ileja yivud piur pa yakushilamu ya Nzamb.

[Kamushet kadia pa paj wa 6]

‘Nisotil Kuyikwash, Pakwez Nijap Mutapu Ik Nikuyikwasha’

Povilingau ushon anvaj ni anamakwend a mwan muyej, arund nau akutwish kwiyakamish. Asotil kukwash dijuku pakwez akat kwiyakamish anch pamwing ap akutwish alond dizu ap kusal chom kanang chikutwisha kulet kand kusansan. Tukwet pinap yiyul yiyinkishinau antu akutwisha kutong anch, ‘Nisotil kuyikwash pakwez nijap mutapu ik nikuyikwasha.’

❖ Kangal wayichinany afishina anch mulong wijap cha kulond ap cha kusal. Kwikalaku kwey kukuyikasikesh. Ov, wijap cha kulond? Kwinan kwakin ni kuyilej anch “nikwet ushon” kukuyijikish anch uyibangidin. Ov, wakamin anch, ang wasambish kudil, ukuwejin pa ushon wau? Bibil ulondil anch: “Dilany nau akudila.” (Rom 12:15) Mansoj mey mamekeshin anch wovil niyey ushon, ni chikat kwongoj.

❖ Ikal wa kusambish. Ov, ukutwish wayisukinaku yakudia? Ov, ukutwish woyish malong mikisina? Ov, ukutwish waya kuyilandin yom? Kangal wayipul anch, “Ov, uswiridinany chom ik?” Ap anch walond nich uyakin wawonsu, mazu minam mayilejining anvaj afishina anch ukwet yivud ya kusal ni ukwetap chisu cha kuyikwash. Pakwez, yipula anch, “Chom ik nikutwisha kusal mulong wa kukukwashany katat?” ni kupwa sal yitinau. Pakwez ipuk kwandamin mu yom ya mwom wau ni mu tupalikany twau twa ujindj.

❖ Ipuk kulond anch, “Nij chiwovilany.” Muntu ni muntu witiyijining mutapu kushalijan pafilingay mukatish nend. Ap anch niyey wafishap kal mwan, wijap chakin kamu mutapu wovilau.

❖ Pa kusut chisu chilemp kurutu kwa kwel anch mwikadil uwamp uchirik mutapu udinga mu dijuku diau. Dandamen kuyikwash mudi muchitwishikina. Kwisambishin, kuding kubangin nakash dijuku difishina, pakwez aswiridin kuyikwash nakash kupandakanamu kusu machuku makemp ap mbing jikemp kupwa kwa kufish. Tang matu ku maswir mau mu kusut kwa mbing ni angond ezinaku.a

[Mazu madia kwishin kwa paj]

[Chipich chidia pa paj wa 7]

Jinsangu ja Bibil jilejen anch Yesu ukwet usu ni usotil kuyisangul antu