Kuyongoj Antu Afishina
1. Ov, mulong wak chifanyidin kuyongoj antu afishina?
1 Chisansening kumufish mukatish netu, pakampwil kudi antu akad ruchingej ra Want. (1 Tes. 4:13) Avud akat kwiyipul anch: ‘Antu afiling mulong wak? Kwisu kuyilingau? Nikez kumuman kand mukatish wam?’ Kwishin oku kudi yiyul yimwing ya kuyongoj nich antu tutanina mu mudimu adidina mulong wa mwanamakwau ap murund wafila.—Isay 61:2.
2. Anch mwin chikumbu watulej anch wafishin, ov tufanyidin kudandamen kumulej uman ulemp?
2 Ku Chis ni Chis: Mwin chikumbu ukutwish watulej anch wafishin muntu mu dijuku diau. Ov, umeken anch ukwet ushon? Ov, mu chikumbu mudi anamakwend akweta ushon? Chiwapidilap kupan uman ulemp pa chisu chinech. (Mul. 3:1, 7) Tukutwish pamwingap niyetu twamekesh kunenganan kwetu, chad tukutwish nich nkeu twamwinkish trakt, magazin, broshir ni kumwit dilikishin. Chad tukez kachirik kand pa chisu chifanyidina mulong wa kumwongoj nich Bibil.
3. Anch kudi mutapu, verse ik tukutwisha kumulej mwin chikumbu wafishang?
3 Pa yisu yimwing, tukutwish twajingunin anch tukulond yivud pitukweza kapamp ka kusambish. Ap anch kichawiyap chisu cha kulik yitongijok yiyimp, tukutwish kuyitangin yakushilamu yidia mu Bibil piur pa disanguk. (Yoh. 5:28, 29) Ap kand tukutwish twayilej yilondilay Bibil pa mwikadil wa afu. (Mul. 9:5, 10) Rusangu ridia mu Bibil risambidina disanguk rikutwish rayongoj. (Yoh. 11:39-44) Chom chikwau kand chifanyidina kushinshikin chidi mazu ma ruchingej mamulejau Yob ushinshamena kudiay Yehova. (Yob 14:14, 15) Kurutu kwa kutumbuk, tukutwish kumwinkish broshir Yik Yikata Kutushiken Pitukufanga?, Quand la mort frappe un être aimé, ap broshir mukwau ap trakt ufanyidina. Ap tukutwish twamushil buku Chifundishinay Bibil, pwitin manangu mend pa rusang ridia mu shapitre wa 6 ni kanijanany chisu chiukweza wisambinany rusangu riner chilemp.
4. Yisu ik kand yitukweta ya kwongojan?
4 Pa Yisu Yikwau: Anch kudi chidil ap anch chivurikish yisadikidin ku Chot cha Want, ov, kukwikal antu akad kwitiyij? Chifanyidin kand kuyinkish mikand yikutwisha kuyongoj. Ukutwish wayany kwendil ku yikumbu ya kulamin yital mulong kuyinkish mikand yifanyidina majuku mafishina. Pa yisu yimwing, yijikish ya yidil ayifundining mu majurnal yikat kufungul njil ja kufund mukand wa kuyongoj yid ya dijuku diafishang. Dichuku dimwing, patambulay mukand mwadinga matrakt mamwing, mufir ikundj umwing ni mwanend mband aya ku chikumbu cha mwin kulejan amwipul anch: “Yey wantuminang mukand ou? Mulong nisotil nijika yivud piur pa Bibil!” Ikundj winou ni mwanend mband itiyija kwilej Bibil ni asambisha kukumangan ku yikumangan.
5. Mulong wak tufanyidina kudimukin yisu ya kuyongoj antu afishang?
5 Mulej 7:2 ulondin anch: “Chiwapil kuya mu chikumbu cha chidil kupandakan mu chikumbu cha musambu.” Chisu chivud muntu wafishang uding tayad kutesh Dizu dia Nzamb pa ndond pa kutesh yom ya chamwamu. Etu awonsu tufanyidin kudimuk chakwel twijika yisu yiwanyidina kuyongoj antu anenganena mulong wa rufu ra mukatish.