Panany Rongoj Kudi Akweta Michim ya Runeng
1 Mu rusangu ra akaantu kandikal kwikala kuswir kwa kupan rongoj mudi kwinoku. Mu kulondul wintakel wa Mwant wetu, Yesu Kristu, niyetu tusadil usu wa “kuyok akweta michim ya runeng.”—Is. 61:1
2 Mutapu wa Kongoj: Mudimu wetu ufanyidin kwikal nich minsamb yiwanyidina, ni yikasikeshina chakwel kuyongoj antu. Anch twakepish nakash misamb pa yisal yiyimp ya mangand ni malejan ma makasu, uyakin wa Bibil ni richingej risangareshina ra kushilamu kukasikeshina kwa Nzamb yikwikal pa ndond pa kusambish mu minsamb. Chinech chirumburikinap anch chifanyidinap kwisambidin Harmagedon. Mudimu wetu udi wa kulejan “chisu chiwamp cha ranaken ra [Yehova] chikupandishay antwend, ni kuyifundakeshin akankuny nau,” ni “kumubabesh [muntu muyimp] chakwel ndiy akarumun yaku yend.” Pakwez, kubabesh piur pa Armagedon ni kulejan piur pa yibudikin ya kushesh kwend kurumburikinap kujindjik mutu wa mulong wa rusangu ruwamp ra Want wa Nzamb.—Is. 61:2; Ezek. 3:18; Mat. 24:14.
3 Ku Chis ni Chis: Chikasikenap kuyitan antu aziyina mulong wa mayej, rufu ra mukatish, mafef, ap kuburen nfalang. Mudi antu amwimburijina Kristu, ‘tuyovidil riy’ ni kuyibangin antu tusankena mu mudimu wa kulejan. (Luka 7:13; Rom. 12:15) Ap anch tufanyidin kutang verse umwing ap maad makwatijadina nich mulong, tufanyidin kwikal ‘ateshina swa,’ ni kumulikidil muntu alejana yitongijok yend. (Yak. 1:19) Kupwa kwa kutesh kapamp ka kusambish, tukutwish kupan rongoj.
4 Pitwisambina tukutwish kulond pa chisu chifanyidina anch: “Nisotin kwisambin ney mazu mamwing makasikeshina madia mu Bibil.” Chifanyidin kusadil kujingunin kuwamp mulong wa kulik kwitiyij yitongijok yawonsu yiyimp yikutwishay muntu kulond. Pakwez, rutong retu rifanyidin kwikal ra kukasikesh ni kongoj mu kusadil maverse mulong wa kukasikesh muchim. Pa chinech, ukutwishany kutal Comment raisonner à partir des écritures pa paj wa 117-121 mu mutu wa mulong (Encouragement) “Dikasikesh.” Ap ukutwish kumwinkish mwin chikumbu kopi umwing wa Trakt De l’aide pour les déprimés ni ukuchirikin mazu makasikeshina madia mwinomu.
5 Kimbany Yisu ya Kuyongoj Antu Akwau: Ov, wijany mutej, mbay wa mudimu, mbay wa shikol, ap yidi ya dijuku yiswiridina rongoj? Ov, mulong wak ukutwishap kusalany usu chakwel kuyendil antu inay ku yikumbu yau nich rutong ra kupan rongoj ridiokila mu Bibil. Mu kwijik anch aswiridin rongoj, ukutwishany kwirijek mulong wa mikadil yiney ya pakampwil. Pa chinech antu amwing akat kufundang mikand ap kutazuk ku telefon. Rukat rakin tukweta mulong wa mutej rikutubachik tumekesha yovil ya urund ni kupan rongoj riswiridinau ridia mu Bibil.—Luka 10:25-37.
6 Mwaning, atwinkishin mudimu wa kuyongoj antu adia mu chidil, kuyikasikesh michim yovila kuyip, ni kuyinkish ruchingej ra machuku mawamp ma kurutu. Rawiy rongoj riswiridinau antu adia mu mangand. Anch twalejan nich musangar piur pa yom yivud yiwamp yashilayimu Nzamb yikulet rongoj ni ruchingej kudi antu akweta muchim utok. Vurikany amboku chisu chawonsu kuswir kwa kuyok antu akweta michim ya runeng.