Mushejina Nzamb Piswimp

“Nzamb wa Kwongoj Kwawonsu”

2 Korint 1:3, 4

YOM yivud yisadikina mu mwom—mar, kurumbukin, kwov anch udi amwiney—yikutwish yalet ushon, ap kuburen ruchingej. Pa yisu mudi yiney ukutwish wasambish kutong anch: ‘Nany ukutwisha kwinkwash?’ Mazu ma kambuy Paul madia mu 2 Korint 1:3, 4 misambidin musul umwing ujim wa rongoj—Yehova Nzamb.

Mu verse wa 3, amutazukinamu Nzamb anch: “Tatuku wa riy.” Mazu minam marumburikin ik? Dizu dia Grek diakarumunau anch “riy” dikutwish diarumburik yovil ya riy twovilinga mulong wa antu amena mar.a Referens umwing wisambidina piur pa Bibil ulondil anch dizu dined akutwish adikarumun anch “yovil ya riy” ap anch “kubangin nakash.” “Riy” ra Nzamb rikat kumubachik asala. Kwijik untu winou wa Nzamb kukat kutushikij tumushejina piswimp, ov, kimwawiyap?

Paul umwisambidin kand Yehova mudi “Nzamb wa kwongoj kwawonsu.” Payom pinap Paul usadidil dizu disambidina kand “chitongijok cha kumwongoj muntu udia mu mar ap mu runeng ni chitongijok cha kupan ukwash ni dikasikesh.” Buku Interpreter’s Bible urumburil anch: “Tukumwongoj muntu umena mar anch twamukasikesh chakwel ajijamena mar mend.”

Ukutwish wipul anch: ‘Ov, mutapu ik ukatay Nzamb kutwongoj ni kutwinkish dikasikesh dia kujijamen mar metu?’ Ndiy ukat kusalang mwamu pakampwil kusutil ku Dizu diend, Bibil, ni kusutil ku chipan chend cha malembil. Paul utulejin anch nich rukat Nzamb utwinkishin Dizu Diend chakwel “tukutambul ruchingej mu kudandamen ni mu kwongoj kwa mukand wa Nzamb.” Chikwau, kusutil ku malembil madiokila ku muchim, tukushiken ku kwikal nich “chisambu cha Nzamb chisutila ronganyin rawonsu.”—Rome 15:4; Filipoi 4:7.

Mu chilik ik chikatay Yehova kuyongoj antu end? Paul ulondil anch Nzamb “ukat kutwongoj mu mar metu mawonsu.” (2 Korint 1:4) Chikalap nchik ukash wa chipwichik, runeng, ap mar makutwisha kututan, Nzamb ukutwish watwinkish dikasikesh ni usu chakwel tuyijijamena. Ov, chom chinech chikasikeshinap?

Rongoj riletinay Nzamb rikatap kumupwil ching win wongojinau. Paul udandamedin nich kulond anch Nzamb ukat kutwongoj chakwel ni “etu tukutwish kuyongoj ni yau adia mu mar nich kwongoj kwatwongojau nich etu kudi Nzamb.” Anch atwongoj mu mar metu, atukwashin chakwel ni yetu tuyovila riy antu akwau ni chakwel tushikena mu chilik cha kuyikwash antu adia mu maswir.

Chidiay “Nzamb wa kwongoj kwawonsu,” Yehova kakatap ching anch kuyipwish kamu bwi milong yetu kapamp kamwing. Pakwez, tukwet kashinsh ka chom chinech: Anch twakarumukin kudiay ndiy chakwel atwongoja, ndiy ukutwish kutwinkish usu wa kura nich runeng ap mar mawonsu makutwisha kututan mu mwom. Chakin kamu Nzamb winou muka riy ndiy tufanyidina twifukwila ni kumushiman.

[Mazu madia kwishin kwa paj]