Kusansan Kukash ni kwa Chikupu

MU MIVU ya katat, mwin kukimbijol umwing wasota kwilej chovilingau antu afishap kal akatish nau chikalap nchik kusut kwa mivu. Watuma yipul kudi anvaj kanang afisha anau pasutil kal mivu yivud. Anvaj awonsu kakulap. Tatuku umwing Vladimir, wafisha mwanend pasutil kal mivu yitan, warumburila anch ni katat woviling kuswan nakash pa kulond piur pa mwanend.a

Ushon winou wa chisu chilemp uyikwatining anvaj avud afisha kal. Pasutil kal mivu dikum mwan wa William wa mivu 18 wawila mu mem wafa. William wafunda anch: “Nichovil kuswan djat ni ilel unou, ni mu mwom wam wawonsu nikwov kuswan kwinoku.” Pasutil kal mivu yitan mwan wa Lucy wayela pakad kuchingejin ni wafa, Lucy wafunda anch: “Mu machuku mavud, nadinga ni kutong anch, ‘Nitiyijinap.’ Niyova mudi nilatin chilat chimwing chiyimp ni nadinga ni kusot nilanka. Kupwa kwa chisu kanang nasambisha kwitiyij anch chadinga chakin, anch kakwezap kand ku chikumbu. Mwanam wafil pasutil kal mivu yitan, pakwez pa kusut kwa chisu, pinidinga pa amwinam, nikat kudilang mulong wa mwanam.”

Ov, mulong wak anvaj mudi Vladimir, William, ni Lucy, oviling kuswan nakash ku muchim ni kwakad kupwang? Tushinshikinany katat mayingishin kanang.

Ov, Mulong wak Kudia Runeng Mwamu?

Anch mwan wavadik mu dijuku, anvaj ading ni yovil yimwing yakad kwikal mu urund ap umwing pakach pa antu. Kumusend kusu mwanau, kumutal palelay, ap kumuman pasipinay kukat kuyovish musangar ni mazang nakash. Anvaj in rukat, ayikatining anau. Akat kuyifumb chakwel ikala nich chaku chiwamp ni kalimish. (1 Tesalonik 2:7, 11) Anch an apam kwambatan nich usu winou, anvaj oviling musangar nakash ni kusambish kuyichingejin nakash.

Anvaj in kubangin asadining mudimu ukash mulong wa kuyidish anau. Akutwish chisu ni chisu kutek nfalang ap mapit makwau mulong wa kutwish kuyikwash anau kusal majuku mau pa chisu chau. (2 Korint 12:14) Kusadin kwinoku kukash kwa yovil, chisu, usu, ni nfalang kukweting diloz dimwing kusu—anvaj akat kuyilil anau ikala aom chidiap mulong wa kufa. Chad anch mwan wafa, mudimu wa kumulil wiman kal, ni kuchingejin kwa anvaj kwajiy kal. Rukat ridimukina ra anvaj mulong wa mwan rakatuk ngwa, arimikin nich mumb wakad kutwish kudiosh wa rufu. Ndond yadingay mwanau ikundj ap mband mu michim yau yashal kal ya wash. Anvaj akwov runeng rikash rakad kutwish kupwa swa.

Bibil ulondil anch anvaj afishina kal oviling kuswan nakash ni kwa chisu chilemp ku michim. Parumburilay chamushikena nshakur Yakob pateshay anch Josef amujipin kal, Bibil ulondil anch: ‘Yakob wapola maswin mend, wadjal ansak mwi mbund ni wamudila mwanend machuku mavud. Anend amakundj ni anend amband awonsu atumbuka aya ni kumwongoj tatukwau. Pakwez Yakob walika kwongoj kwau, walond anch: “Bwat, nikuya kamu kudi mwanam kwi ndond ya afu ni kudil kwam.”’ Kwinyim kwa mivu yivud, Yakob wadinga ni kumudil mwanend, watonginangay anch wafa kal. (Disambishil 37:34, 35; 42:36-38) Chilakej chikwau chidia mu Bibil chidi cha Naomi mband mwin kushinshaman wamana mutapu wafau anend amakundj aad. Ushon ukash wamukwata, wasota kuswimp dijin diend kangal dikala kand anch Naomi, dirumburikina anch “Musangar wam,” dikala Mara, dirumburikina anch “Kusansan.”—Rut 1:3-5, 20, 21, Les Saintes Écritures — Traduction du monde nouveau, note.

Pakwez, Bibil uyil kulemp kusut pa kwijik kusu kuswan kwovilingau anvaj. Ulejen kand mutapu upaninay Yehova usu kudi antu anenganena. Mu mutu wa mulong wambakedinap, tukushinshikin jinjil jimwing mukatay Nzamb kuyongojin antu adidila.

[Mazu madia kwishin kwa paj]