Usey Wa Kulikishin

Pita watesha chiyul chapanay Yesu pa mutapu wa kupwish milong yikutwisha kwikal pakach pa akadivar. Chawiy, chimeken anch Pita ukimbin kwijik tupamp twinch tufanyidina kusal usu wa kulikishin.

Pita wipula anch: “Nsalejam, anch mwanamakwam mu ritiy udandamedin kwinrumbukin, ov, chifanyidin am kumulikishin tupamp twinch? Ov, tupamp sambwad?” Antakel amwing a chirelijon afundisha anch chifanyidin kulikishin tupamp tusatu. Chawiy, Pita watonga anch chikwikal cha usey nakash anch wamulikishin mukadivar nend “tupamp sambwad.”—Mateu 18:21.

Pakwez, chitongijok cha kuchind tupamp twakurumbukinangau kudi mukadivar ney chikwatijadinap ni malejan ma Yesu. Chawiy, Yesu wamuyula Pita anch: “Kinilondinap kudi ey anch ching tupamp sambwad; pakwez ching tupamp makum sambwad ni sambwad.” (Mateu 18:22) Chirumburikin anch kulikishin kukwetingap mupak. Chawiy komb, Pita kafanyinap kuchind uvud wa tupamp twafanyinay kumulikishin mwanamakwend.

Kupwa Yesu wamuleja Pita nau in kwilejend akwau chilakej chafanyina kuyibachik chakwel alikishinang akwau. Chidi chilakej cha kashalapol wakanganya kwimburij riy ra mwant wend. Mwant wakimba anch atushalapol end amufuta yikal. Kashalapol wa kusambish wading ni chikal chijim nakash cha atalent 10 000 [60 000 000 deniers] chafanyinay kufut. Chading chimukasikedin kufut chikal chinech chijim. Chawiy mwant wapana mbil chakwel amulandisha kashalapol winou ni mukajend pamwing ni anend chakwel afuta chikal chinech. Pa chisu chinicha, kashalapol winou wasa manungun mend kurutu kwa mwant winou ni wilemba anch: “Ngovilap, amboku, riy, nikez kukufut chikal chey chawonsu.”—Mateu 18:26.

Mwant wamwovila kashalapol winou riy ni ranaken kupwa wamulikishina chikal chend chijim. Pamulikishinay mwant kashalapol winou chikal chend, kashalapol winou waya kudi kashalapol mukwau wading ni chikal chend cha nfalang 100 ja deniers. Kashalapol winou walikishinau wamukwata kashalapol mukwau wading ni chikal chend mwi nshing ni wamwela anch: “Nfuta kamu chikal cham katat.” Pakwez, kashalapol winou ukweta chikal cha mukwau ni ndiy wasa manungun mend kurutu kwa kashalapol wezang kwadin, wilemba anch: “[Nshimpishilaku muchim] amboku, nikez kukufut chikal chey chawonsu.” (Mateu 18:28, 29) Pakwez, kashalapol walikishinau chikal kudi mwant kimburijap riy ra mwant wend. Kashalapol winou wamutwala mukwau ukweta chikal chikemp mu rukan djat ni pakezay kumufut chikal chend.

Kupwa, Yesu walonda anch atushalapol akwau amana chisal chinech chakad riy ni aya kumulejamu mwant wau, chawiy mwant winou wajimana nakash ni wamutazuka kashalapol winou wamulej anch: “Ey udi [kashalapol] muyimp! Am nakulikishina ey chikal chawonsu mulong ey wangilembila. Niyey, chad chifanyidin kumwovil mukwen kashalapol riy, mudi nakwovidila ey riy?” Mwant wajimana nakash mulong wa chisal chakad riy cha kashalapol winou, chawiy wamuteka mu rukan djat ni pakumufutay chikal chend. Kupwa Yesu walonda anch: “Mwamu kand mukez kukusalanyau kudi Tatukwam udia mwiur, anch muntu ni muntu wa pakach penen kamulikishidinap mwanamakwend mu ritiy nich muchim wend wawonsu, mulong wa yom yamurumbukinay.”—Mateu 18:32-35.

Dilejan dia usey mud ik ditufundishinau piur pa kulikishin! Nzamb ukat kutulikishin yikal yijim ya yitil yetu. Kurumbok kwawonsu kutusadiningau kudi akadivar netu in Kristu kukepin nakash anch twisikesh nich yitil tukata kusal. Pakwez, Yehova kakatap kutulikishin kapamp kamwing bwat, ukat kutulikishin tupamp tunan ni tunan. Ov, tukutwishap niyetu kuyilikishin akadivar netu tupamp tuvud, ap anch yom yatusalangau yitunenganeshin? Mudi mwafundishay Yesu mu Malejan Mend ma Usey ma pa Mukandu, Nzamb ‘ukutulikishin yikal yetu mudi mutukata niyetu kuyilikishin akwetu akata kutusal nayimp.’—Mateu 6:12.