Chifanyidin Kulikishijadin Umwing Ni Mukwau
“Kwashijanany akasikena ni aziyila, anch muntu ukwet mulong ni mukwau chifanyidin kulikishijadin umwing ni mukwau.”—KOL. 3:13.
OV, MUTAPU IK UKUTWISHA KWAKUL?
Ov, mulong wak tufanyidin kusot kulikishin?
Mutapu ik waletay Yesu chilakej piur pa usey wa kulikishin?
Ov, yiyukish ik tukeza kutambul kusutil ku kulikishijadin umwing ni mukwau?
1, 2. Ov, mulong wak chiwapidil kushinshikin pa rusot rey ra kulikishin?
DIZU diafundau dia Yehova ditukwashin kwilej mutapu umenay chitil ni chikatay kusal anch twasal yitil. Dizu diend ditulejin kand yom yivud piur pa dilikishin. Mu mutu wa mulong wasutina, twashinshikidin pa mutapu wabachika mwikadil wa David ni wa Manase ku dilikishin dia Yehova. Muchim wau wa kukarumuk ni runeng rau pantaliken ni yom yasalau yayibachika chakwel akarumuka, ipuka yisal yau yiyimp, ni akarumuka chakin kamu. Kupwa, Yehova wayichirishina dilau diend.
2 Shinshikinany amboku dilikishin mu mutapu ukwau. Ov, mutapu ik wela kwiyov anch pakach pa antu ajipay padinga kand ap mwanamakwey umwing? Ov, wela kutwish kumulikishin Manase? Chidi chipul chimwing chikash chiufanyidina kwiyipul nlel unou mulong tudi mu mangand mayimp, ma chisum, ni ma choy. Katat, mulong wak mwin Kristu ufanyidin kukudish mwikadil wa kulikishin? Anch ey umen mar ma kuburen kutentam, ov, chom ik chikutwisha kuyikel yovil yey, kusal yisotilay Yehova anch usala, ni kusot kulikishin?
MULONG WAK TUFANYIDIN KWIKAL NI MUCHIM WA KULIKISHIN
3-5. (a) Ov, chilakej ik chasadilay Yesu mulong wa kuyikwash in kumutesh end chakwel atongina piur pa kuswir kwa kulikishin? (b) Ov, chom ik chalonday Yesu mu chilakej chafundau mu Mateu 18:21-35?
3 Rusot ra kuyilikishin antu atusadila uyimp—chikalap nchik yidi ya chikumangen cha win Kristu ap bwat—kudi kwa usey chakwel tulama urund wa chisambu nich yid ya dijuku, ni arund, ni ambay netu antu, ni Yehova. Mukand wa Nzamb ulejen anch kusot kuyilikishin antu akwau chikalap nchik mutapu atusadila uyimp chidi chom chitinau kudi in Kristu. Mulong wa kulejan usey wa kuyilikishin antu akwau, Yesu wasadila chilakej cha kashalapol wadinga nich chikal chayen.
4 Kashalapol wading ni chikal cha uvud wa nfalang jikutwishau kumufut muntu wa mudimu mu machuku 60 000 000; pakwez mwant wend walika kumufutish chikal chinech. Kupwa, kashalapol winou waya kudi mbay nend kashalapol wadinga ni chikal chend cha difut dia machuku 100 kusu. Muntu wadinga ni chikal chinech wamwita chakwel ashimpisha muchim, pakwez kashalapol winou walikishinau chikal chijim nakash, wamudjibula mbay nend kashalapol mu rukan. Mwikadil winou wamwovisha mwant wau ujim nakash. Mwant wamuleja anch: “Niyey, . . . chifanyidin kumwovil mukwen kashalapol riy, mudi nakwovidila ey riy. Mwant wajimana nakash, chad wamutwal kashalapol winou mu rukan, mulong wa kumulej kadimu djat ni pakufutilay chikal chawonsu.”—Mat. 18:21-34.
5 Ov, chom ik chalejanay Yesu mu chilakej chinech? Ndiy walonda anch: “Mwamu kand mukez kukusalanyau kudi Tatukwam udia mwiur, anch muntu ni muntu wa pakach penen kamulikishidinap mwanamakwend mu ritiy nich muchim wend wawonsu.” (Mat. 18:35) Dizu dia Yesu dioviken. Yitil twasadila pa chirung cha kuburen kuwanyin yimekeshin patok anch tukutwishap kuziyil ku yijil ya Nzamb. Chikwau kand, ndiy usotin kutulikishin etu ni kututokish. Chawiy lel, muntu mwawonsu usotina urund wa Yehova ufanyidin kulikishin uyimp wa antu akwau. Mudi mwalonday Yesu mu Malejan ma pa Mukandu anch: “Anch wayilikishinany akwen akusalanya nayimp, Tatukwen udia mwiur ukukulikishinany kand niyen. Pakwez anch en walikany kuyilikishin akwen, Tatukwen kakez kukulikishinanyap kuyip kuwasalanya.”—Mat. 6:14, 15.
6. Ov, mulong wak chiswapelap kulikishin?
6 Ukutwish kulond anch: ‘Minam madi kwau mazu mwovikena nawamp, maswapela kulond pa ndond pa kumasadil.’ Mulong yikatau kusal antu pakatau kuyirumbukin yambatening nich yovil yau. Muntu ukutwish kwov ujim, kwikal nich yovil ya kumurumbukin, rusot ra kutentam ap kuchirish uyimp. Pakwez, antu amwing amening anch kakutwishap dichuku ap dimwing kumulikishin muntu wayisadila uyimp. Anch wiyovil chilik chimwing, ov, mutapu ik ukutwisha kukudish mwikadil wa kulikishin witinau kudi Yehova?
SHISHIKIN YOVIL YEY
7, 8. Ov, chom ik chikutwisha kukukwash kwakul mu mutapu wa kulikishinijan anch akwovisha kuyip kudi chaku cha antu akwau?
7 Yovil pantaliken ni uyimp ukutwishau kutusadil yikutwish kwikal yikash. Shinshikin bil yasalay nsand umwing, mudi mulejenau piur pa ujim: “Dichuku dimwing . . . pinova ujim, nadiokala mu chikumbu ni kulond anch nikezap kuchirik kand. Dichuku diading diwamp, ni nasambisha kuya kulemp amwinam ni chinech chasala nitudisha ni kupwish ujim wam, ni kupwa kwa asa amwing nita dilikishin ni kwitudish.” Mudi mulejena chilakej chinech, kwitekin chisu mulong wa kwitudish ni kupipesh yom kukutwish kukukwash kwipuk kwakul mu mutapu uyimp ukutwisha kusal anch ushikena ku kwov runeng dichuku dikwau.—Kus. 4:4; Jinsw. 14:29; Jak. 1:19, 20.
8 Ov, chikwikal nchik anch yovil yiyimp yadandamen? Pakish kujingunin mulong wak unenganen. Ov, chidi mulong akusadila yom yiyimp, ap pakad kalimish? Ap chidi mulong wiyovil anch muntu mukwau wasala usu chakwel akwovisha kuyip? Ov, chisal chend chading chakin kamu chiyimp? Kushinshikin ni kutesh diyingish dia chisal chey kukukwashin kushinshikin piur pa chakul chiwamp ni chimedina pa Mukand wa Nzamb. (Tang Jinswir 15:28; 17:27.) Chitongijok chinech chikutwish kukukwash chakwel wikala utwishina ni kusot kuyilikishin akwau. Mu kulondul jinjil jinej, chikalap nchik yikokujol yikutwisha kwikalaku, utwishishin dizu dia Nzamb dishinshikina “yitongijok ni rusot ra mu muchim [wey]” ni dikutakela mu kwimburij mwikadil wa Nzamb wa kulikishinijan.—Heb. 4:12.
OV, UFANYIDIN KUTONGIN YOM MU MUTAPU WEY AMWINEY?
9, 10. (a) Ov, chom ik ukusala anch akusadil uyimp? (b) Ov, kwikal nich chitongijok chiwamp ni muchim wa kulikishin, yikutwish kuswimp nchik mutapu wey wa kuman yom mu mwom?
9 Mikadil yivud mu mwom yikat kuyibachikang antu asala uyimp. Piwendishina mwotak wey, chilakej, tong bil anch mwotak ukwau wadinga piswimp wez wachany mwotak wey. Ov, chom ik ukusala? Ov, watanga rusangu ra ujim wa mu balibal wasala anch muntu ova ujim ni kumulondul mwin kwendish mukwau. Pakwez, piudia mwin Kristu ukusotap chakin kamu kusal mwamu.
10 Chiwapidil mud ik kwikal nich chisu cha kushinshikin yom nawamp. Akusadila uyimp pamwing ap mulong yom yasadika mulong waburedin kutekaku manangu. Ap motak wa mwin kwendish mukwau ukutwish pamwing ap ufil. Pinap chimeken anch tukutwish kukepish ujim, kuziy, ni yovil yikwau yiyimp kusutil ku kutesh, kutong nawamp, ni kusot kulikishin. Mulej 7:9 ulondin anch: “Kangal wikal mwin kwov ujim swa, mulong ujim ukat kwikal mu muchim mwa chisup.” Kangal watongin yom mu mutapu wey amwiney. Yisu yivud, chikutwisha kumekan mudi uyimp usadilau kwa kwisotil udi chibudikin cha kuburen kuwanyin ap kuburen kwovijan. Ikal nich yitongijok yiwamp piur pa yisal ap mazu mayimp, ni ikal nich rusot ra kulikishin nich rukat. Ukez kwikal nich musangar anch watwish kusal mwamu.—Tang 1 Pita 4:8.
‘KULANGWISH KWEN KWA CHISAMBU KUKUCHIRIKINANY AYINEN’
11. Yakul ya antu ku rusangu ruwamp yifanyidin kulangwish yakul ik kudi etu pitudia in kulejan Want?
11 Mutapu ik ukutwisha kulam kushimpish muchim kwey anch muntu kanang wakuswingish piulejena mu mudimu wa chingand? Payitumay Yesu in kulejan 70, ndiy wayileja anch afanyidin kuyitongin chisambu chikumbu ni chikumbu chadingau ni kwendil. Yesu ulejen anch: “Anch mu chikumbu chinicha mudi muntu uchingejina chisambu, kulangwish kwen kwa chisambu kukez kumuyukish. Anch mwamwamu, kulangwish kwen kwa chisambu kukuchirikinany ayinen.” (Luka 10:1, 5, 6) Tusangaredin pakatau kwitiyij antu mu mudimu wetu wa kulejan, chawiy lel chikutwishau kutaninamu mu uruu tukata kulejan. Pakwez, yisu yimwing chakul chiding cha chisambu. Chikwikal nchik? Yesu walonda anch chisambu tusotina mulong wa mwin chikumbu chifanyidin kushal niyetwetu. Chisu chawonsu, tufanyidin kutwish kubudik ku chis ni chis nich chisambu mu michim yetu, chikalap nchik mutapu ukatau antu kutwak. Anch tukat kwakul ku masaal nich ujim, tukutwishap kulam chisambu chetu.
12. Kwambatan nich mazu ma Paul madia mu Efes 4:31, 32, mutapu ik tufanyidina kusal?
12 Sal usu wa kulam chisambu chey mu mikadil yawonsu, chidiap ching kusu mu mudimu wa win Kristu. Chawiy lel, kusot kuyilikishin antu akwau kurumburikinap anch ufanyidin kwitiyij yisal yau yiyimp ni kupipesh uyimp wa yisal yiney. Chikwau kand, kulikishin kurumburikin kwipuk kulam rukuny mulong wa uyimp kanang ni kulam chisambu chey amwiney. Mu kwikal nich yitongijok yiyimp ni kutongin pa uyimp wayisalau, antu amwing asala anch yisal ya antu akwau yiyikangesha kwikal nich musangar. Kangal walikidil chakwel yitongijok yiney yikuyikela. Vurik anch ukutwishap kwikal nich musangar anch wakudish rukuny. Pakwez ikal mwin kulikishin!—Tang Efes 4:31, 32.
SAL YOM MU MUTAPU UMUSANGARESHINA YEHOVA
13. (a) Ov, mutapu ik ukutwishay mwin Kristu ‘kumukwatish usany’ mukankuny nend? (b) Ov, chakul chitudishina ku masaal chikutwish kwikal nich chibudikin ik?
13 Kukutwish kwikal yisu ukutwisha kuman anch ukutwish kumukwash muntu kanang wa kusadila uyimp chakwel aziyila yany ya win Kristu. Kambuy Paul wafunda anch: “Anch mukankuny ney wovil nzal, ey mwinkisha yakudia, anch ndiy wovil impu, ey mwinkisha yakuna. Mulong anch wasal mwamu, wamukwatish kal usany nakash. Kangal witiy kuyip kukupandakan usu. Pakwez chifanyidin ey kusal yom yiwamp mulong wa kupandakan kuyip.” (Rom 12:20, 21) Kusutil ku ranaken rey pakatau ku kusaal, ukutwish kuninetish ap mwikadil ukash ni kulet uwamp kudiau antu. Kusutil ku kumekesh chovu, riy—ap ranaken—kudi muntu wasala uyimp, ukutwish kumukwash chakwel ilejan uyakin udia mu Bibil. Chikala mutapu ik, chakul chitudishina chikez kumwinkish muntu chisu cha kutongijokin pa chaku chey chiwamp.—1 Pita 2:12; 3:16.
14. Chikalap nchik uyimp watusadilay muntu kanang, ov mulong wak tufanyidin kwipuk kulam rukuny?
14 Mu mashakamin mamwing, chitwishikinap kwikal mu urund ni antu amwing. Ap antu adinga mu chikumangen kupwa asala chitil, alik kukarumuk ni ayopat. Anch muntu winou wakusala uyimp, chikutwish kukasikan kumulikishin, ap anch wakarumuk, mulong yitat yatapay mu yovil yikutwish kulab chakwel yipwa. Mu mikadil yiney, ukutwish kudandamen kumwit Yehova chakwel akukwasha ukudisha spiritu wa kulikishin pantaliken ni mukayitil wakarumuka. Kupwa, mutapu ik ukutwisha kwijik yidia mu muchim wa muntu mukwau? Yehova wij amwinend. Ndiy ukat kushinshikin yovil ya mu muchim wa muntu ni ukat kushimpish muchim pantaliken ni antu ayimp. (Kus. 7:9; Jinsw. 17:3) Chawiy lel Mukand wa Nzamb ulejen anch: “Anch muntu wakusalany yon yiyimp, niyen kangal wamusadilany yom yiyimp. Pakishany kusal yom yikumanau antu awonsu anch, yidi yiwamp. Salany nich usu wen wawonsu mulong wa kushakam nich chisambu nau antu awonsu. Arund nam, kangal wafundakeshany, pakwez itiyany Nzamb kwikal mwin kufundakesh. Mudi mufundilau mu Mukand wa Nzamb anch: ‘Yam [Yehova] nikeza kufundakesh, yam nikeza kulejan kadimu kudi antu akata kuyimesh akwau mar.’” (Rom 12:17-19) Ov, ukutwish kumufish nich muntu mukwau mu kutentam? Bwat. (Mat. 7:1, 2) Pakwez ukutwish kwikal nich ruchingej anch kutentam kudi mu makas mwa Nzamb.
15. Ov, chom ik tufanyidina kuyisadil antu ayimp yikutwisha kwikal ni usu pa mwikadil wetu kudi awiy?
15 Anch waman anch akusadila uyimp, ni kuman anch chikasiken kumulikishin mwin kukusadil uyimp witina dilikishin, chiwapidil kwijik anch muntu wakurumbukina ni ndiy umen mar ma uyimp. Ndiy umen ni ndiy mar ma yibudikin ya kuburen kuwanyin twaswana. (Rom 3:23) Yehova ukat kuyovil riy antu akad kuwanyin. Chawiy lel, chiwapidil kulembil mulong wa muntu watusadila uyimp. Chitwishikinap kumwovil ujim muntu tutekina mu malembil metu. Ni tufanyidin kwipuk kulam rukuny ap pantaliken ni antu atumeshina mar mudi mwalonday Yesu patok anch: “Yikatany akankuny nen, yilembidilany akata kukuzengolany en.”—Mat. 5:44.
16, 17. Ov, mutapu ik tukutwisha kwakul anch amakurump atongin anch mukayitil wakarumukin, ni mulong wak?
16 Kwambatan nich rusot ra Yehova, amakurump in Kristu ayinkisha chisend cha kukatul milong ya muntu usadila uyimp mu chikumangen. Akadivar ina kakwetap chovu chawonsu mudi Nzamb, pakwez rutong rau ridi ra kusal anch mipak yau yambatana nich umutakel utambwilau mu Dizu dia Nzamb mwishin mwa spiritu utumbila. Chawiy lel, mupak ukatau kukwat mu mulong kampand kupwa kwa kukimb ukwash wa Yehova mu malembil ukez kumekesh chitongijok chend.—Mat. 18:18.
17 Pinap padi milong ya kushinshaman. Ov, ukez kulikishin ni kumekesh rukat rey pantaliken ni antu amenau anch akarumuk kal? (2 Kor. 2:5-8) Chinech chiswapelap, anch akusadila uyimp ap anch udi mwanamakwend a muntu wasadilau uyimp. Pakwez, mu kutek ruchingej rey mudi Yehova ni mu mutapu wend wa kupwish milong kusutil ku chikumangen, ukez kusal yom nich manangu. Ukez kumekesh anch ukat kulikishin chakin kamu.—Jinsw. 3:5, 6.
18. Ov, yiyukish ik ukutwisha kutaninamu mu kulikishin?
18 In kwilej ukash wa manangu itiyijin yiyukish yidiokila ku kwikal mwin kulikishin. Kudiosh yovil yikash ni ya chamwamu yikata kulet mayej, kukat kukasikesh urund uwamp ni usangareshina. Chishalijadin ni yikata kumushiken wakat kusot kulikishin—mayej, kupwa kwa urund, wom, ni kuburen kwambamb. Pakwez, chiyukish cha usey nakash cha kwikal usotina kulikishin chidi kwikal mu urund uwamp ni Tatukwetu wa mwiur, Yehova.—Tang Kolosay 3:12-14.
[Chipich chidia pa paj wa 29]
Ov, chom ik cha usey chisambinau mu chishimu chasadilay Yesu?
[Chipich chidia pa paj wa 32]
Kusot kulikishin chidi chom chitinau kudi in Kristu