Likishijadinany

CHANY CHA BIBIL: “Likishijadinany anch kudi muntu ukweta mulong ni mukwau; mudi Mwant chakulikishilanyay en ni yen salany kand mwamu.”—kolosay 3:13.

Chirumburikin ik? Mu Bibil, afanikeshin chitil ni dibaz ni kulikishin akufanikeshin ni kulikishin dibaz.[2] (Luka 11:4) Buku umwing ulondin anch mu mifund ya Grek, dizu dikarumwinau anch “kulikishin” dirumburikin “kulik dibaz, ni kulik kwadin dibaz.” Mwamu, anch twatond kumulikishin muntu watusalang nayimp, tufanyidinap kuchingejin chom chikwau chikutwishay kutusadin muntu waturumbukinang. Rusot retu ra kulikishin rirumburikinap anch tukatin yom ap tupipejin yom yiyimp yatusadingau. Pakwez, tusotin kwetu kulik kumulamin rukuny, ap anch tukwet mayingishin ma kwikal nend “mulong.”

Chidi cha ukwash nlel? Mulong tudi antu akad kuwanyin, tukat kusal yitil. (Rom 3:23) Tumekeshin anch tukwet manangu anch twayilikishin antu akwau, mulong nlel ni diamashik tukwikal niyetu nich kuswir kwa kutulikishin kudi antu akwau. Chikwau kand, anch twatond kulikishin, tukutaninamu ayinetu. Mutapu ik mwamu?

Anch twalam ujim ni twamulamina muntu rukuny—ni twalik kumulikishin muntu—twisadin nayimp ayinetu. Yovil yiney yiyimp yikutwish kushesh musangar, kutujip ni kutumesh mar. Yikutwish kand kutuletin mayej makash. Rapor umwing wa Journal of the American College of Cardiology, wa Docter Yoichi Chida ni mulej wa Pisikoloji Andrew Steptoe alonda anch: “Kujingunin kwa katat kumekeshin kukwatijan kudia pakach pa ujim ni rukuny nich mayej ma rudung.”

Ku mutambu ukwau, shinshikin yiukutaninamu anch walikishin. Anch twayilikishin antu akwau, tukat kuchidij uumwing ni chisambu, mwamu tukwikal mu urund uwamp. Cha usey nakash, tumekeshin anch tumwimburijin Nzamb, ukata kuyilikishin akayitil itina dilikishin ni uchingejina anch niyetu tusala mwamu.—Marko 11:25; Efes 4:32; 5:1.