MUTU WA MULONG WA KWILEJ WA 8
MUMINY 130 Ikal Mwin Kulikishin
Mutapu ik Ukutwisha Kwimburij Dilikishin da Yehova
“Mudi mwakulikishinanyau en kudi [Yehova]. Niyen salany kand mwamu.”—KOL. 3:13.
MU WISWIMP
Mutu wa mulong winou ukwisambin yom tukutwisha kusal mulong wa kumulikishin muntu waturumbukidina.
1-2. (a) Chisu ik chikutwisha kutukasiken kulikishin? (b) Mutapu ik walikishinay Denise?
OV, CHIKUKASIKEDINING kuyilikishin antu akwau? Antu avud pakach petu chiyikasikedining kulikishin pakampwil anch muntu walond ap wasal yom yiyitapina ku muchim nakash. Pakwez, kud yom yimwing tukutwisha kusal mulong wa kulik kudandamen kumujimen muntu ni kwikal mwin kulikishin. Chilakej, shinshikin yom yamushikena nambaz Denise,a wamekesha kulikishin kwakin. Mu muvu wa 2017, Denise ni dijuku dend aya kutal Biro Mujim wa pa Mangand Mawonsu wa Atuman a Yehova wafungulau. Pading pachirikinau ku chikumbu, shofer umwing wenda nayimp ni weza wibub ku motak wend. Denise washadisha manang ku aksidan winou. Palankay, amuleja anch anend asupoka yitat yijim nakash ni anch nfumwend Brian wafa ku aksidan winou. Patongijokinay piur pa yom yiney, Denise walonda anch: “Niyova kamu nayimp nakash ni mutu wanrumbangana.” Kupwa, watesha anch shofer winou kasadinapamu ni kadingap ni kampuw. Chawiy Denise wamulembila Yehova mulong wa kwikal ni chisambu.
2 Shofer amukwata ni amusambisha mulong wa aksidan wasalay wamujipesha nfumwend. Anch dirumburish damufisha nich, afanyina kumutek mu rukan. Pakwez, dirumburish damuleja Denise anch mupak wa kumutek muntu winou mu rukan wimedin pa yom yikulonday ndiy. Denise walonda anch: “Natesha kamu mud muntu wantek kal mung pa chitat, mulong nad nifanyidin kulond piur pa yom yikash nakash yanshikena mu mwom wam.” Kupwa kwa mbing jikemp, Denise waya ku dirumburish mulong wa kulond kurutu kwa muntu waletisha kusansan nakash mu dijuku dend. Yom ik yalonday? Denise wamwita nzuj kumumekeshin ikundj winou ranaken.b Papwishay kulond, nzuj wasambisha kudil. Walonda anch: “Kudosh nida nzuj kwasut kal mivu 25, kand kal niteshangap chom mud natesha kal nlel. Kand kal niteshangap dijuku darumbukinangau dit chakwel amwanaken mwin kurumbuk. Kand kal niteshangap mazu ma rukat ni ma dilikishin mud minam.”
3. Yom ik yamukwasha Denise kulikishin?
3 Yom ik yamukwasha Denise kulikishin? Watongijokina pa dilikishin da Yehova. (Mike 7:18) Anch twamekesh kujikitish mulong wa dilikishin da Yehova, chinech chikutubachik kuyilikishin antu akwau.
4. Yehova ukatin anch tusal ik? (Efes 4:32)
4 Yehova ukatin anch tuyilikishin antu akwau mud mutapu mwatulikishinay ndiy kwa kwisotin. (Tang Efes 4:32.) Ukatin anch tuyilikishin antu atusadina nayimp. (Kus. 86:5; Luka 17:4) Mu mutu wa mulong winou, tukushinshikin yom yisatu yikutukwasha kulikishin chipandakena.
KANGAL WADIUL YOVIL YEY
5. Kukwatijan ni Jinswir 12:18, mutapu ik tukutwisha kwiyov anch muntu waturumbukin?
5 Anch muntu watulond ap watusal yom yiyimp, tukutwish kwiyov nayimp nakash, pakampwil anch muntu winou ud murund wa piswimp ap muntu wa mu dijuku detu. (Kus. 55:13-15) Yisu yimwing, kusansan tukutwisha kwov kukutwish kwikal mud mutapu tukata kwov anch atupamp mpak. (Tang Jinswir 12:18.) Tukutwish kupakish kudiul yovil yetu. Pakwez anch twasal mwamu tukutwish kwikal mud muntu wapampau kal mpak ni wayilikin pa mujimbu. Chilik chimwing, tukutwishap kuchingej anch yovil yetu yikupwa anch twayidiul.
6. Yom ik tukutwisha kusal anch muntu waturumbukin?
6 Anch muntu waturumbukin chom chakusambish tukutwisha kwov ja kusal chid kujiman. Bibil ulondin anch tukutwish kujiman. Pakwez, utubabeshin kand anch kangal twalik ujim utuyikel. (Kus. 4:5; Efes 4:26) Mulong wak? Mulong yovil yetu yikat kutubachik kusal chom kanang. Ni yisu yivud ujim ukuletangap yibudikin yiwamp. (Jak. 1:20) Vurik anch, tukutwish kujiman pakwez kulam ujim ud mupak ututadina.
Tukutwish kujiman pakwez kulam ujim ud mupak ututadina
7. Mutapu ik kand tukutwisha kwiyov anch muntu waturumbukin?
7 Anch atusadin mu mutapu uyimp, tukutwish kwov kusansan nakash. Chilakej, nambaz Ann ulondin anch: “Panading mwan mukemp, tatuku wamulika maku ni wamwata mband wasalang mudimu kwol kwetu. Niyova kamu anch andjibul kal. Pavalau mwan, niyova mud wasenda ndond yam. Napama ni kwiyov anch kankatinap.” Nambaz Georgette niyend urumburil mutapu wiyovay chisu chajinguninay anch nfumwend kadingap kamushinshamedina, ulondin anch: “Twading arund kudosh ku wanikanch wetu. Twasala mudimu wa uchibol pamwing! Nanenganana nakash.” Ni nambaz Naomi ndiy ulondin anch: “Nadingap nitongina anch dichuku dimwing nfumwam ukutwish kwinsal nayimp. Chawiy chisu chanlejay patok anch wading kutalang pornografi ni kwinjindjikin yom yiney, niyova nayimp nakash.”
8. (a) Mayingishin ik mamwing tukweta ma kuyilikishin antu akwau? (b) Yom ik tukata kutaninamu anch twayilikishin antu akwau? (Tal mushet “Yom ik Tufanyidina Kusal Anch Muntu Waturumbukin Chipandakena?”)
8 Tukutwishap kuyikangesh antu kutulond ap kutusal yom kanang, pakwez tukutwish kubabel yom tukutwisha etu kusal. Ni yisu yivud chom chiwamp tukutwisha kusal chid kulikishin. Mulong wak? Mulong tumukatin Yehova ni mulong ndiy ukatin anch twikal in kulikishin. Anch twadandamen kujiman ni twalik kulikishin, tukutwish kusal chom cha usup ni kwimesh ayinetu mar. (Jnsw. 14:17, 29, 30) Shinshikin chilakej cha nambaz Christine. Ulondin anch: “Anch nijimen, ap anch ansadin nayimp, musangar wam ukat kukep. Nikat kuda yom yakad kutung mujimbu. Nikulalangap nakash, ni chikat kwinkasiken kushinshikin yovil yam, ni chinech chikat kwikal ni yibudikin mu uruw wam ni mu urund wam nau antu akwau.”
9. Mulong wak tufanyidin kulik kulam ujim?
9 Ap anch muntu watusalang nayimp katwitinap dilikishin, tukutwish kukepish kusansan twovila. Mutapu ik? Georgette, twisambinang kwiur oku, ulondin anch: “chasenda chisu nakash, nasala usu wa kulik kumwovil muntu wading nfumwam ujim. Mud chibudikin, niyova kamu pee.” Anch twalik kulam ujim, tukat kusal anch rukuny rilik kuyipish muchim wetu. Tukat kwisadin kand ayinetu chom chiwamp—tukat kwimik kutongin pa yom yasadika ni kusanger kand mwom. (Jnsw. 11:17) Pakwez yom ik ukutwisha kusal anch utwishinap kulikishin?
PANDAKAN YOVIL YEY
10. Mulong wak chitin chisu mulong wa kupandakan ujim wetu anch aturumbukin? (Tal kand yipich.)
10 Mutapu ik tukutwisha kupandakan yovil yetu anch atusal nayimp? Mutapu umwing tukutwisha kusal mwamu, ud wa kwishil chisu. Anch muntu watapangau nayimp amwok, chikumwit chisu chakwel ayerik. Chilik chimwing, chikutwish kutwit chisu chakwel tutwish kumulikishin muntu ni muchim wawonsu.—Mul. 3:3; 1 Pita 1:22.
Mud mukata kwit chisu chakwel chitat chiyerik, chitin kand chisu mulong wa kuyerik anch muntu waturumbukin (Tal paragraf wa 10)
11. Mutapu ik ukutwisha malembil kukukwash kwikal mwin kulikishin?
11 Mulembila Yehova chakwel akukwash kwikal mwin kulikishin.c Ann, twisambinang kwiur oku, urumburil mutapu wamukwasha malembil. Ulondin anch: “Namwita Yehova chakwel atulikishin etu awonsu mu dijuku mulong wa yom yiyimp twalonda ap twasala. Kupwa namufundina tatuku ni mukajend mukand, ni nayileja anch nayilikishin kal.” Ann ulondin anch chadingap chiswapela kusal mwamu. Pakwez ulondin kand anch: “Nachingeja anch, ang nimburij dilikishin da Yehova, chinech chikumubachik tatuku ni mukajend kwilej yom yivud piur ya Yehova.”
12. Mulong wak tufanyidin kumuchingejin Yehova pa ndond pa kuchingejin yovil yetu? (Jinswir 3:5, 6)
12 Muchingejina Yehova, kangal kuchingejin yovil yey. (Tang Jinswir 3:5, 6.) Yehova wijing chisu chawonsu yom yida yiwamp mulong wetwetu. (Isay 55:8, 9) Ni kakutwishap kutwit kusal chom chikutwisha kutusal nayimp. Chawiy, patukasikeshinay kulikishin, tufanyidin kwikal ni kashinsh anch kusal mwamu kud kamu kwa usey nakash kud etu. (Kus. 40:5; Isay 48:17, 18) Chikwau kand, anch twachingejin yovil yetu, tukutwishap kwetu kulikishin. (Jnsw. 14:12; Jer. 17:9) Naomi, twisambinang kwiur oku, ulondin anch: “Kwinsambishin, natongang anch nadingap kwam nifanyidina kumulikishin nfumwam mulong watalang pornografi. Novang wom anch ukutwish kand wanrumbukin ap anch ukutwish kuvuramen mutapu yansalang nayimp. Ni natongang anch Yehova wading winteshin kurumburik. Pakwez najingunina anch kwintesh kurumburik kud Yehova kurumburikinap anch witiyijin yovil yam. Wij mutapu niyovila ni anch chitin chisu mulong wa kuyerik, pakwez ukatin kand anch nikal mwin kulikishin.”d
KUDISH YOVIL YIWAMP
13. Kukwatijan ni Rom 12:18-21, yom ik tufanyidina kusal?
13 Anch twamulikishin muntu waturumbukinang nakash, tufanyidin kusal yom yivud kusutamu kwau kukwat mupak wa kulik kand kulond piur pa yom yasadika. Anch muntu waturumbukinang ud mukadivar ap nambaz, chitongijok chetu chifanyidin kwikal cha kusal chisambu. (Mat. 5:23, 24) Pa ndond pa kwov ujim, tukutwish kutond kumekesh ranaken ni kulikishin. (Tang Rom 12:18-21; 1 Pita 3:9) Yom ik yikutwisha kutukwash kusal mwamu?
14. Tufanyidin kusal usu wa kusal yom ik, ni mulong wak?
14 Tufanyidin kusal usu wa kumuman muntu mud mutapu umumenau kud Yehova. Yehova ukat kushinshikin pa mikadil yiwamp yikwetay muntu. (2 Jsng. 16:9; Kus. 130:3) Anch twachigej anch antu ikal ni mikadil yiyimp, tukuyikimb ni kuyitan. Chikwikal kand mwamu anch twakimb mikadil yiwamp. Anch twashinshikin pa mikadil yiwamp yikwetau antu akwau, chikutwish kutuswapel kuyilikishin. Chilakej, Mukadivar Jarrod ulondin anch: “Chikat kwinswapel kuyilikishin akadivar anch nilikej kurumbuk kwau ni yom yivud yiwamp nikatining piur pau.”
15. Mulong wak chid cha usey kumulejamu muntu anch twamulikishidin?
15 Chom chikwau cha usey tufanyidina kusal chid kumulej muntu waturumbukidina anch twamulikishidin. Mulong wak? Naomi twisambinang kwiur oku ulondin anch: “Nfumwam wangipula anch, ‘ov, wanlikishidin kal?’ Chisu nalonda anch, ‘nakulikishin kal,’ najikidina. Najingunina anch namulikishinap kamu ni muchim wawonsu. Pa chisu chinicha, natwisha chad kumulej mazu minam maad, ‘nakulikishin kal.’ Chisu namulikishina, nfumwam wabudisha mansoj. Nashimwoka nakash chisu namana mutapu wiyovay pee ni chisambu nikala nich. Kudosh kamu pinipa, nasambisha kand kumuchingejin ni twikala kand arund awamp nakash.”
16. Yom ik wileja kal piur pa dilikishin?
16 Yehova ukatin anch twikal in kulikishin. (Kol. 3:13) Ap mwamu, chikutwish kutukasiken kuyilikishin antu akwau. Pakwez tukutwish kusal mwamu anch twalik kudiul yovil yetu ni kusal usu wa kulik kulam ujim. Mwamu tukutwish kukudish yitongijok yiwamp.—Tal mushet “Yom Yisatu Tufanyidina Kusal Mulong wa Kuyilikishin Antu Akwau.”
SHINSHINKIN PA YIYUKISH YIDOKILA KU KULIKISHIN
17. Mulong wak dilikishin did da usey?
17 Tukwet mayingishin mavud makwikal in kulikishin. Tushinshikinanyaku mamwing pakach pa mayingishin minam. Da kusambish, tukat kumwimburij ni kumusangaresh Tatukwetu mwin riy, Yehova. (Luka 6:36) Da kaad, tukat kumekesh kujikitish mulong wa dilikishin da Yehova. (Mat. 6:12) Ni da kasatu, tukat kwikal ni ukash wa mujimbu uwamp ni kwikal mu urund uwamp ni antu akwau.
18-19. Yom ik yikutwisha kushiken anch twikal in kulikishin?
18 Anch twayilikishin akwetu, tukutwish kutaninamu yiyukish twakad kuchingejin. Chilakej, shinshikin yom yamushikena Denise, twisambinang kwinsambishin. Ap anch pa chisu chinicha kadingap kija, ikundj wasadikisha aksidan wakimba kwijip kupwa kwa kusal aksidan winou. Pakwez, dilikishin da Denise damubachika ikundj winou kusambish kwilej Bibil nau Atuman a Yehova.
19 Tukutwish kuman mud chikasiken nakash kuyilikishin antu akwau. Pakwez tukutwish kutaninamu nakash anch twasal mwamu. (Mat. 5:7) Chawiy, el etu awonsu tusalany usu wa kwimburij dilikishin da Yehova.
MUMINY 125 Ayuk Kwau Akweta Riy!
a Majin mamwing amaswimpin.
b Mu yishiken mud yiney, mwin Kristu mwawonsu ufanyidin kwikwatinap amwinend mupak piur pa yom yifanyidinay kusal.
c Tal mavideo ma miminy yetu ya orijinal pa jw.org “Pardonnons-nous les uns aux autres,” “Aide-moi à pardonner,” ni “L’amitié retrouvée.”
d Ap anch kutal pornografi chid chitil ni mwikadil uletishining kusansan ku muchim, Bibil kamwinkishinap mbay wa uruw warumbukinangau mbil ya kujip uruw.