Yesu Ukat Kumwok Muntu Wavadika Mputames

Yesu uchid ni katat mu Yerusalem pa dichuku dia Sabat. Padingay ukat kwend pamwing nau in kwilejend mu musumb, amumana mwin kwitol wavadika mputames. In kwilej amwipula Yesu anch: “Mulej, ov, mulong wak muntu winou [wavadika] mputames? Ov, chidi mulong wa yitil yend amwinend anch ya anvajend?”—Yohan 9:2.

In kwilej ading ij anch muntu winou kadingapaku kurutu avadika, chawiy atonga anch pamwingap muntu winou wasala chitil padingay mwinvumu mwa makwend. Yesu wakula anch: “Bwat, kichidiap mulong wa yitil yend ap ya anvajend. Ndiy udi mputames chakwel ukash wa Nzamb umeken mu mudimu ukusalay kud ndiy.” (Yohan 9:3) Chawiy, muntu winou ap anvajend kasalap chitil chasala anch ikala mputames. Pakwez chading mulong wa chibudikin cha chitil chasalay Adam, chawiy antu awonsu akata kuvadik adi akad kuwanyin, mudi mwadingay mputames winou. Pakwez Yesu wamana mutapu wa kumekesh usu wa Nzamb mu kumwok mputames winou, mudi mwasalay kand yisu yimwing payokay antu akwau ading ayedina.

Chawiy Yesu walonda nich kashinsh anch midimu yiney ufanyidin kuyisal swa swa. Ndiy walonda anch: “Pikuchidia muten, pawiy pitufanyidina kusal mudimu Wendendiy wantuma am. Uchuku ukat kwez, kwikil kand muntu ukutwisha kusal mudimu. Pinichidia am mu mangand, yam nikata kulet chimunyik kudi antu adia mu mangand.” (Yohan 9:4, 5) Chakin kamu, Yesu wading piswimp ni kufa, chawiy ku rufu kafanyinap kusal chom ap chimwing. Chawiy komb, ndiy wadinga chimunyik cha mangand.

Ov, Yesu wamwoka muntu winou ni anch mwawiy mutapu ik wasalay? Yesu wachila mat pansh kupwa wamasampa nich divu. Wapana mavu masampay pa mes ma mputames winou ni wamwela anch: “Yang wowala mu mes mu dijiy dia Silowe.” (Yohan 9:7) Muntu winou waya. Powalay ndiy wamana kapamp kamwing! Tong musangar wovay pamanay kapamp ka kusambish mu mwom wend!

Amutej nend ni antu akwau ading amwija muntu winou wading mputames ashimoka nakash. Awiy ipula anch: “Ov, kindiyap muntu winou wading ni kushakamang mulong wa kwit?” Antu amwing akula anch: “Ndiy kamu winou.” Pakwez antu akwau kitiyijap ni alonda anch: “Bwat, kindiyap, ufanaken kamu mudi ndiy.” Pakwez muntu amwinend wakula anch: “Oku yam kamu.”—Yohan 9:8, 9.

Chawiy amwipula anch: “Ov, mutapu ik wayerika kal mes?” Ndiy wayakula anch: “Muntu upidilau anch, Yesu wasampang divu nich mat, wampan pa mes, chad wangel anch: ‘Yang ku dijiy dia Silowe, ukwowal mu mes.’ Chawiy nayang, pinowalang mu mes, nasambish kuman.” Kupwa awiy amwipula kand anch: “Ov, muntu winou udi kwisu?” Ndiy wayakula anch: “Kinijap kwam.”—Yohan 9:10-12.

Antu inay amutwala muntu winou kudi Afaris chakwel niyawiy ijika mutapu ik washikenangay ku kuman. Muntu winou wayileja anch: “Ndiy wampanang divu dia kusamp pa mes, nowalang mu mes, chad katat nikat kuman.” Chamekana anch Afaris afanyina kusangar mulong muntu winou wayerikang. Pakwez Afaris amwing amufisha nich Yesu. Awiy alonda anch: “Muntu mwin kusal mwamu kadiokilap kudi Nzamb, mulong kalimishinap yijil ya dichuku dia [Sabat].” Pakwez antu akwau alonda anch: “Ov, muntu mukayitil ukutwish nchik kusal yilay mudi yiney?” (Yohan 9:15, 16) Chawiy kwading kwaurik pakach pau.

Mulong wa kupwitijan kwinoku, awiy aya kudi muntu wayerika ni amwipula anch: “Ov, chad ey utongilap nchik mulong wa muntu wakwokanga mes?” Wakula pakad kwidjidjek anch: “Ndiy udi [muprofet] wa Nzamb.”—Yohan 9:17.

In Yuda alika kwitiyij mazu minam. Awiy atonga anch kwading kwovijan pakach pa Yesu ni muntu winou chakwel ayidimba antu. Ashikena ku kulond anch chakwel apwisha mulong winou, chifanyidin kuyipul anvaj a muntu wino.