Yikwashany Amputames Chakwel Ileja Piur pa Yehova

1. Ov, mutapu ik wamekeshay Yesu ranaken kudi amputames?

¹ Machuku makemp kurutu kwa kufa kwa Yesu. Pading payilay mu ul wa Yeriko, amputames aad in kuswal asambisha kutazwok anch: “Mwant! twovilap, amboku, riy!” Ap anch Yesu wading utongidin piur pa mar makash mafanyina kumushiken, pakwez wimana, wayitazuka antu inay, kupwa wayoka. (Mat. 20:29-34) Ov, mutapu ik tukutwisha kwimburij ranaken ra Yesu pantaliken ni amputames?

2. Ov, mutapu ik tukutwisha kupan uman wa patok kudi amputames?

² Pan Ukwash: Anch wasankanijan ni mputames, pamwing ap mu mudimu wa kulejan wa patok, yijikisha amwiney ni muleja anch ukutwish kumukwash. Ap anch amputames amwing atambula ukwash, pakwez antu amwing akutwish kuman nayimp kapamp ka kusambish. Pakwez, urund wey wakin ni kusanger kwey kwa kashinsh kukutwish kumusangaresh mputames. Ijik anch kudi mitapu kushalijan ya wimputames ni chinech chikutwish kukukwash chakwel wijika mutapu ik ukutwisha kuyikwash. Kupwa kwa kumukwash, ukutwish pamwing ap kulond anch mudimu wey udi kand wa kulejan malejan ma Bibil. Mutangina maverse ma Bibil, mudi Kuseng 146:8 ap Isay 35:5, 6. Anch mputames winou ukutwish kutang rudim ra Braye, mwipula anch ukutwish kutambul mukand wa rudim ra Braye ukumukwash chakwel ileja yom yivud piur pa Bibil. Ukutwish kand kumukwash chakwel atambula kand ma band ma kutesh pa jw.org. Anch ordinater wend ukwet program wa kutang mikand, chiwapidil kubudish mitu ya milong pa jw.org pamwing ni mikand watambula pa internet.​—Tal mushet “Pituyikwashina Amputames . . .”

3. Ov, mutapu ik tukutwisha kuyikimb amputames adia mu teritwar wetu?

³ Yikimba Amputames: Tukutwish kuyitan yisu yivud amputames mu mudimu wa kulejan wa chikumbu ni chikumbu mulong amputames avud katwishiningap kwambamb kwol kwau ni angendj. Chawiy lel, chitining kamu kusal usu mulong wa “kuyikimb” antu inay mulong wa kuyilej rusangu ruwamp. (Mat. 10:11) Ov, ukweting mbay wa mudimu ap wa shikol udia mputames? Ikasikesha chakwel wambamba nend. Anch mu teritwar wey mudi shikol wa amputames, ukutwish kuyinkish mikand yimwing ya rudim ra Braye chakwel amateka mu bibiliyotek wau. Ov, wij muntu kanang ukweta mwanamakwend udia mputames? Ov, teritwar wey ukwet yirijek yitekinau mulong wa kuyikwash amputames ap yikumbu muyilamidinau amputames? Muleja mwanamakwend, mwin kuyak angendj, ap ntakel wend anch Atuman a Yehova asangaredining kuyikwash amputames ni kupan mikand ya rudim ra Braye ap ma band makwatau kal mulong wa kutesh. Murumburila piur pa kushilamu kwa Bibil kulejena anch Nzamb ukez piswimp ap kudiosh wimputames rawonsu. Ukutwish kand kumekesh video wakwata pa jw.org ukweta mutu wa mulong ulondina anch: “Sans elle, je serais perdu,” ulejen uman wa mputames watana ukwash kusutil kwikal nich Bibil wa rudim ra Braye. Anch wamulej rutong rimwendidina kwez kwey kumutal, chinech chikutwish kukukwash chakwel wisamba ni mputames umwing ni mukwau.

4. Ov, malejan ik tukutwisha kwilejin ku uman wapanay Janet?

⁴ Nambaz umwing udia mputames utazukinau anch Janet waya ku jindond jimwing jadingau ni kuyilam amputames. Ndiy wasambisha mambamb ni changadim umwing. Janet wamuleja anch “Yesu wayoka amputames mulong wa kumekesh yom yikezay kuyisadin amputames awonsu.” Atanga pamwing Kujingunik 21:3, 4, kupwa Janet warumburila piur pa kushilamu kwinoku kukeza kuwanyin kusutil ku Want wa Nzamb. Changadim wikuchika ni walonda anch: “Kandikal niteshap chitongijok chinech kudi mputames ap umwing. Antu avud akad kwikal amputames atongining anch muntu ukutwish kwikal mputames mulong wa chom chiyimp chasalau kudi angakend.” Janet wamutumina changadim winou buku Chom ik Chifundishinay Bibil pa internet, ni katat ukat kwilej nend Bibil pamwing tupamp twaad pa rubing.

5. Ap anch tukutwishap kuyok amputames mudi mwasalay Yesu, ov, yiyukish ik tukutwisha kwikal nich anch twasanger kuyikwash amputames?

⁵ Chakin kamu, tukutwishap kuyok amputames mudi mwasalay Yesu, pakwez tukutwish kuyikwash antu ikadishau amputames mu manangu kudi nzamb wa ditenchik dined dia yom, kuwejaku ni wimputames wa kumujimbu, chakwel akanganya kutesh uyakin wa Dizu dia Nzamb. (2 Kor. 4:4) Yesu wayoka antu inay aad adinga piswimp ni Yeriko mulong “wayovila riy.” (Mat. 20:34) Chilik chimwing anch twayisangaredin amputames, tukutwish kwikal ni chisend cha kuyikwash antu amwing chakwel ileja piur pa Yehova, ukeza kudiosh wimputames chikupu.