Arijekinau Mulong wa Kusal Rusot ra Yehova

PAMANGAND mawonsu, padi yitenchik yivud ya marelijon, ya politik, ya kwisak ni yitadina milong ya antu yikweta mitapu yau ya kusal yom, yitongijok ni manangu kushalijan. Pakwez kudi dirijek dimwing kusu dishalijadina nich yitenchik yikwau. Dizu dia Nzamb dilejen patok anch dirijek dined didi dia Atuman a Yehova.

² Chidi cha musangar, mulong udi umwing wa antu ipanina ku dirijek dia Yehova. Wijikin kal chirumburikina rusot ra Nzamb ni katat urisadin. (Kus. 143:10; Rom 12:2) Udi kashalapol wa Nzamb usadina pamwing nau akadivar a pa mangand mawonsu asadina ni rukat. (2 Kor. 6:4; 1 Pita. 2:17; 5:9) Mudi mwakanau mu Dizu dia Nzamb, chinech chikuletidin yiyukish yivud ni musangar. (Jnsw. 10:22; Mar. 10:30) Kusutil ku kusal rusot ra Yehova nich kushinshaman, udi urijekinau mulong wa machuku ma kurutu ma chikupu, mapandakena kuwap.—1 Tim. 6:18, 19; 1 Yoh. 2:17.

³ Sakatang wetu Mujim ukwet dirijek dimwing dia pa mangand mawonsu ditakedinau mu mutapu wa uteokras. Chinech chirumburikin anch akat kuditakel kudi Yehova, udia Mutu piur pa yom yawonsu. Tukwet ruchingej rawonsu mwi ndiy. Ndiy Nkalansambu wetu, mwin Kulet Chijil, ni Mwant wetu. (Isay 33:22) Mulong udi Nzamb wakad kanvundangesh, watenchikin kal yom chakwel ‘tusala nend pamwing’ mu kusal rusot rend.—2 Kor. 6:1, 2.

⁴ Pasejina disudiel dia ditenchik dined dia yom piswimp, tukat kuya kurutu mu umutakel wa Mwant watondau, Kristu Yesu. (Isay 55:4; Kuj. 6:2; 11:15) Yesu wasambela kulejan anch in kwilejend akusal mudimu umwing ujim kupandakanamu wasalay ndiy amwinend padingay panap pansh mu mudimu wa kulejan. (Yoh. 14:12) Mazu minam mading makin mulong in kwilejend afanyina kulejan mu chirung chilemp, afanyina kuvulijan ni teritwar wau wa kulejen wafanyina kwikal mujim. Afanyina kulejan rusangu ruwamp ra Want djat ni kusudiedila mangand.—Mat. 24:14; 28:19, 20; Mid. 1:8.

⁵ Uprofet winou udandamedin kuwanyin mudi mulejenau muvu ni muvu mu Annuaire des Témoins de Jéhovah. Pakwez, mudi mwalonday kamu Yesu patok, mudimu wa kulejan rusangu ruwamp ukupwa pa chisu chatekay kal Yehova amwinend. Yijingidij yawonsu ya uprofet yidia mu Bibil yilejen anch dichuku dijim dikwatishena mwong dia Yehova diasej kal piswimp nakash.—Jowel 2:31; Sof. 1:14-18; 2:2, 3; 1 Pita 4:7.

⁶ Mulong tujingunin chidia rusot ra Nzamb mu machuku minam ma nsudiel, tufanyidin kusal usu nakash wa kusal yom yitinay Nzamb. Chinech chitin anch twijika nawamp mutapu usadina dirijek ni kusal nad mu kwovijan. Mutapu usadina dirijek wimedin pa mbil ja Bibil, yijil, yijidik, ni malejan madia mu Dizu dia Nzamb diapepilau.—Kus. 19:7-9.

⁷ Anch antu a Yehova aziyin ku umutakel winou wa Bibil, akushakam ni akusal pamwing mu chisambu ni mu uumwing. (Kus. 133:1; Isay 60:17; Rom 14:19) Chom ik chikata kukasikesh uumwing winou pakach pa akadivar netu a pa mangand mawonsu? Ridi rukat. Tudi abachikinau kudi rukat ni turidjadin. (Yoh. 13:34, 35; Kol. 3:14) Mu mutapu winou witiyinay Nzamb, tukat kudandamen kwend pamwing ni chikunku cha mwiur cha dirijek dia Yehova.

CHIKUNKU CHA MWIUR CHA DIRIJEK DIA YEHOVA

⁸ Muprofet Isay, Daniel, ni Ezekiel amana yishimushimu piur pa chikunku cha mwiur cha dirijek dia Yehova. (Isay, shapitre wa 6; Ezek., shapitre wa 1; Dan. 7:9, 10) Chawiy chimwing kand, kambuy Yohan wamana niyend chishimushimu cha yom yiney ya mwiur ni watuleja yom kanang mu mukand wa Kujingunik. Ndiy wamumana Yehova ushich pa ditand dia uyaj pamwing ni angel alondila anch: ‘Utumbila, utumbila, utumbila udi Yehova Nzamb, mwin Dikand diawonsu, ndiy wadingaku ni udiaku ni ukez kwikalaku.’ (Kuj. 4:8) Yohan wamumana kand “mwan a mukoku wiminy mukach mwa ditand,” Mwan a Mukoku wa Nzamb, Yesu Kristu.—Kuj. 5:6, 13, 14; Yoh. 1:29.

⁹ Chishimushimu chimumekeshina Yehova pashichay pa ditand chirumburikin anch ndiy udia Mutu wa dirijek dined. Piur pend ni piur pa ndond yend ya piur nakash, 1 Jinsangu 29:11, 12 ulondin anch: ‘A Yehova, kujimb, ni ukash, ni uyaj, ni kupandakan, ni kuwap, yawonsu yidi yeyey, mulong yawonsu yidia mwiur ni yidia pansh yidi yeyey. Want udi weyey, A Yehova, Ey udi piur pa yom yawonsu. Dipit ni uyaj yidi yeyey, yey uyikedila yawonsu; chikas chey chikwet ukash ni dikand, chikas chey chikat kujimbish, ni kukasikesh yom yawonsu.’

¹⁰ Mulong udi mwin kusal mudimu pamwing nend Yehova, Yesu Kristu ukwet ndond ya piur nakash mwiur ni amwinkisha kal ulabu upandakena. Chikwau kand, Nzamb ‘wateka yom yawonsu mwishin mwa yidjatil yend, ni wamuteka kwikal mutu piur pa yom yawonsu mulong wa chikumangen.’ (Efes 1:22) Kambuy Paul walonda piur pa Yesu anch: “Nzamb wamuzambula piur, ni kumwinkish dijin didia piur pa majin mawonsu, chakwel mu dijin dia Yesu manungin mawonsu mazengaminang, ni mwiur ni pansh ni kwishin kwa divu; ni chakwel jindim jawonsu jikwitiyij anch: Yesu Kristu ndiy Mwant, ku uyaj wa Nzamb Tatuku.” (Fil. 2:9-11, TMK) Chawiy lel, tufanyidin kuchingejin mu umutakel utentamina wa Yesu Kristu.

¹¹ Muprofet Daniel wamana mu chishimushimu Nshankur ukweta Mwom kudiokal pakur ushicha pa ditand Diend ni angel “kanan ka tunan akat kumusadil ndiy, ni tunan dikum tupamp dikum twa tunan ading iminy kurutu kwend.” (Dan. 7:10) Bibil wisambidin piur pa chisak chinech cha angel mudi ‘aspiritu mu mudimu utumbila wa Nzamb, atumay kuyisadil antu akuswana dipandish.’ (Heb. 1:14) Yitang ya mu spiritu yiney yawonsu ayitenchikin mu ‘jinkwas, akamaz, mant, ni mausu.’—Kol. 1:16.

¹² Anch twitekin chisu cha kushinshikin nawamp yom ya chikunku cha mwiur cha dirijek dia Yehova, tukutwish kutesh mutapu wiyovay Isay pamanay mu chishimushimu ‘Yehova ushich pa ditand dia want,’ ni ‘aserafin ading iminy piur pend.’ Isay walonda anch: ‘Riyind kudi am! Nidi mudi mufu, mulong am nidi mwin kwijond ku milamu yam, am nishich kand mukach mwa antu akweta milamu yijondila; mulong mes mam mamuman kal Mwant, Yehova wa yisak ya amasalay amwinend!’ Chakin kamu, Isay wova mwong ukash ni wikepisha nakash pateshay chidia dirijek dia Yehova. Chishimushimu chinech chikala nich usu ukash padiay ndiy ni chasala anch akula pakad kulab ku uruu wadiokala mwiur piur pa kusal mudimu wa pakampwil mulong wa dirumburish dia Yehova, Isay wakula anch: “Yam unou! Ntumany.”—Isay 6:1-5, 8.

¹³ Kujingunin ni kusanger dirijek dia Yehova kukat kuyikasikesh antwend kwiyov mudi mwiyovay Isay. Mulong dirijek diyil kurutu, tusalany usu wa kwend nad pamwing. Nlel, tukat kwikasikesh kumekesh ruchingej retu mu dirijek dia Yehova.

DIRIJEK DIA YEHOVA DIYIL KAMU KURUTU

¹⁴ Mu shapitre wa 1 wa uprofet wa Ezekiel, amumekeshin Yehova mudi wendishin ditemb dijim dia mwiur. Ditemb dined dijim dimekeshin chikunku chakad kumekan cha dirijek dia Yehova. Ndiy ukandamin pa ditemb dined ni udiendishin kwa rukat ni udisadidin kukwatijan ni rusot rend.—Kus. 103:20.

¹⁵ Rufumbu ni rufumbu ra ditemb dined rading ni rufumbu rikwau mukach—nfumbu jawonsu jading ni kujimb kumwing ni jading jichikaken. Chinech chawiy chisadina anch ‘jinfumbu jikutwish kuya mitambu yawonsu yinying.’ (Ezek. 1:17) Jinfumbu jikutwish kuswimp njil kapamp kamwing. Pakwez, ditemb dined disadidinap adinad ap diburedinap mwin kudiendish ukweta manangu. Yehova kakatap kulik anch dirijek diend diya kwawonsu kudikatina kuya adinad. Ezekiel 1:20 ulondin anch: “Kwawonsu kwasotanga spiritu kuya, kwawiy kwayangang [nfumbu jinej].” Komb, Yehova ndiy ukata kutwal dirijek diend kwawonsu kukatinay spiritu wend anch diya. Chipul chitufanyidina kwiyipul chawiy ech, ‘Ov, nendin pamwing ni dirijek dined?’

¹⁶ Kwend pamwing ni dirijek dia Yehova kwitinap kwau ching kukumangan ku yikumangan ni kusal mudimu wa kulejan. Chakusambish, kwend pamwing ni dirijek kwitin kuya kurutu ni kukul mu spiritu. Kwitin kand ‘kujingunin chakin kamu yom ya usey nakash’ ni kudia yakudia yawonsu ya mu spiritu chisu yibudikina. (Fil. 1:10; 4:8, 9; Yoh. 17:3) Tufanyidin kuvurik kand anch, ndond yidia dirijek, kufanyidin kwikal kand umutakel uwamp ni kwovijan kuwamp. Chawiy lel tufanyidin kwijik mutapu wa kusadin nawamp yom ya mu spiritu ni ya ku mujimbu yitwinkishinay Yehova mulong wa kuwanyish mudimu wend. Pitudandamedina kwend pamwing ni ditemb dia mwiur dia Yehova, mwom wetu ukwatijadin nich uruu tukata kulejan.

¹⁷ Nich ukwash wa dirijek dia Yehova, etu awonsu tuyil kurutu mu kusal rusot ra Nzamb. Vurik anch Mwin kwendish ditemb dined dia mwiur udi Yehova. Chawiy lel, kwend pamwing ni ditemb kumekeshin anch tumulimishin ni tumuchingejidin Yehova, “diyal” dietu. (Kus. 18:31) Bibil ukanin anch: ‘Yehova amwinend ukupan usu kudi antwend. Yehova ukuyiyukish antwend ni chisambu.’ (Kus. 29:11) Mulong nlel unou tudi mu dirijek dia Yehova, tukat kutambul usu upaninay ni kwikal ni chisambu chikatay kuyiyukish nich antwend arijekinau. Inge, kwikil kwidjidjek ap pakemp pa mulong winou, tukudandamen kutambul yiyukish yivud mulong tusadin rusot ra Yehova nlel ni chikupu.