‘Yivurikany Antu Akata Kukutakelany’

MAZU ma kambuy Paul madia mu Hebereu 13:7 akutwish kumakarumun kand anch: “Yivurikany antu akata kukuyikelany.” Kudiosh ku Pentekot wa mu muvu wa 33 C.C., atwimbuy ashinshamena a Nsalejetu Yesu Kristu awanyisha chisend chinech mudi chisak chitakedila mu kupan umutakel ku chikumangen chisu cha win Kristu. (Mid. 6:2-4) Kusambish mu muvu wa 49 C.C., chisak chitakedila chinech chadingap ching ni atwimbuy a Yesu. Pakwatau mupak piur pa kutwalan ku mukand, chisak chitakedila chading kand ni “atwimbuy a Yesu nau amakurump [a ku Yerusalem].” (Mid. 15:1, 2) Ading ni chisend cha kushinshikin milong yitadina in Kristu a ndond jawonsu. Atumanga mikand ni mbil, yawonsu yiney mulong wa kukasikesh yikumangen ni kusal usu chakwel in kwilej ashala mu uumwing mu yitongijok ni mu yisal. Yikumangen yaziyinang nich kwikepish ku wintakel wa chisak chitakedila, mudi yibudikin, atambula yiyukish ya Yehova ni adandamena kukul.—Mid. 8:1, 14, 15; 15:22-31; 16:4, 5; Heb. 13:17.

² Kupwa kwa rufu ra atwimbuy, kupumbwok kwasambisha. (2 Tes. 2:3-12) Mudi mwasambelay Yesu kulejan mu chilakej chend piur pa tidiku ni yinfananfan, mukach mwa tidiku (in Kristu azizidilau many) akunamu yinfananfan (in Kristu a makasu). Pasuta yitot ya mivu, alika anch yom yaad yiney yipama pamwing kushik ni chisu cha kwangul, ku ‘disudiel dia ditenchik dia yom.’ (Mat. 13:24-30, 36-43) Pa chisu chinicha, in Kristu azizidilau many adandamena muntu ni muntu kusanger dilau dia Yesu, pakwez kwadingap chisak chitakedila, njil yasadinay Yesu mulong wa kupan umutakel kudi in kwilejend panap pansh. (Mat. 28:20) Chad Yesu wasambela kulejan anch yom yafanyina kuswimp chisu cha kwangul.

³ ‘Nany chakin kamu kashalapol ushinshamena ni kubabal?’ Mu chipul chinech, Yesu Kristu wasambisha ni chilakej, ap chishimu cha mu “chijingidij” chapanay piur pa ‘disudiel dia ditenchik dia yom.’ (Mat. 24:3, 42-47) Yesu walejana anch kashalapol ushinshamena winou ufanyidin kusal usu wa kupan yakudia ya mu spiritu kudi antu a Nzamb pa “chisu chiwanyidina.” Mudi mwasadinay Yesu chisak cha amakundj— kulik muntu umwing—mulong wa kutakel mu mivu chitot ya kusambish, kashalapol ushinshamena usadidinay Yesu chisu cha disudiel dia ditenchik dia yom kadiap muntu umwing.

MUTAPU WA KUMUJINGUNIN ‘KASHALAPOL USHINSHAMENA NI KUBABAL’

⁴ Nany watekay Yesu mulong wa kuyidish in kwilejend? Chimeken patok anch wafanyina kusadin in Kristu azizidilau many adia pa divu. Bibil ulondin piur pau mudi “chisak cha in kupesh” atondau mulong wa ‘kurumburil yisalijok ya Nzamb, ndiy kamu wakutazukanya en kudiokal mu mididim, wandamany mu chitokish chend chiwamp.’ (1 Pita 2:9; Mal. 2:7; Kuj. 12:17) Ov, azizidilau many awonsu adia pa divu adi kashalapol ushinshamena? Bwat. Yesu pasalay chilay cha kupan yakudia kudi chisak cha amakundj 5000, pakad kuchind amband nau an, wapana kudi in kwilej, ni in kwilej apana yakudia kudi antu. (Mat. 14:19) Wayidisha antu avud kusutin antu akemp. Nlel unou, upanin kand yakudia ya mu spiritu mu mutapu winou.

⁵ Chawiy, ‘kashalapol wakin ni ubabela’ kadi kachisak kakemp ka akadivar azizidilau many asadina mudimu wa kurijek ni kupan yakudia ya mu spiritu pa chisu cha kwikalaku kwa Kristu. (Luka 12:42) Mu machuku minam mansudiel, akadivar azizidilau asadina chisak cha “kashalapol ushinshamena ni kubabal” asadin pamwing ku biro mujim wa pa mangand mawonsu. Nlel unou, akadivar azizidilau inay awiy asadina Chisak Chitakedila cha Atuman a Yehova.

⁶ Kristu usadidin chisak chinech mulong wa kupalangesh jinsangu piur pa kuwanyin kwa uprofet wa Bibil ni kupan pa chisu chiwanyidina umutakel mulong wa kusadin mbil ja Bibil dichuku diawonsu. Yakudia ya mu spiritu yiney ayipanin kusutin yikumangen ya Atuman a Yehova (Isay 43:10; Gal. 6:16). Pasak, kashalapol wa kashinsh wading mwin kulam chikumbu. Chilik chimwing, kashalapol ushinshamena ni kubabal amwinka chisend cha kulam chikumbu cha ritiy. Chawiy lel, kashalapol ukat kulam ni kutakel kand yom ya ku mujimbu, mudimu wa kulejan, program wa yitentam, kutond atulam mulong wa kusal yom kushalijan mu dirijek ni kubudish mikand yimedina pa Bibil, yawonsu yiney mulong wa kutaninamu kwa “atushalapol end akwau.”—Mat. 24:45.

⁷ Chad anany adia “atushalapol end akwau?” Mu kulond kuswapela, adi antu awonsu adishinau. Kwinsambishil, atushalapol end akwau awonsu ading azizidilau many. Kupwa, atushalapol end akwau ikala chisak chijim cha “amikoku akwau.” (Yoh. 10:16) Yisak yaad yiney ayidishin yakudia ya mu spiritu yipaninau kudiay kashalapol ushinshamena.

⁸ Pa chisu cha mar makash, pakwezay Yesu mulong wa kurumburish mangand minam mayimp, ukumutek kashalapol piur pa “yom yend yawonsu.” (Mat. 24:46, 47) Awonsu asadina kashalapol ushinshamena akutambul difut dia mwiur. Pamwing nau atushal a antu 144000, akuyikel pamwing ni Kristu mwiur. Ap anch kukwikalap kashalapol ushinshamena ni kubabal panap pansh, Yehova ni Yesu akutakel antu adia mu Want wa Mesia kusutin antu atondau kusal mudi ‘anat.’—Kus. 45:16.

MULONG WAK TUFANYIDIN ‘KUYIVURIK ANTU AKATA KUTAKEL?’

⁹ Kudi mayingishin mavud masadina anch ‘tuyivurika antu akata kutakel’ ni kuyichingejin. Mulong wak kusal mwamu kudi kwa usey kudi etu? Kambuy Paul walonda anch: ‘Akat kukulamany mudi antu akupana kuchind, mulong asala mwamu nich musangar, pakad ushon, anch bwat chikukukwashanyap en.’ (Heb. 13:17) Chidi cha usey kudi etu kuziyin ni kwitiy umutakel udiokila kudi antu atakedila mulong adi in kutulam mulong wa diking ni uwamp wetu wa mu spiritu.

¹⁰ Mudi mulejenau mu 1 Korint 16:14, Paul walonda anch: ‘Yom yawonsu yiukusalanya, chifanyidin kuyisal ni rukat.’ Mipak yawonsu yikwatinau mulong wa antu a Nzamb yimedin pa mwikadil winou ujim wa rukat. Piur pa rukat, 1 Korint 13:4-8 ulondin anch: ‘Rukat rikat kushimpish muchim ni ruwapin. Rukat rikwetap mukau, rukat rikwibazangap ap kwishimek, rikusalangap yom mu mutapu uyimp, rukat rikatap kwitongin, rikwovangap ujim swa. Rukat rikumulaminangap muntu uyimp. Rukat rikatap kusangar mu uyimp, pakwez rikat kusanger mu uyakin. Rukat rikat kwitiy yom yawonsu, rikat kujijamen yom yawonsu. Rukat rushiching chikupu.’ Mulong mipak yawonsu yikwatinau mulong wa kutaninamu kwa atushalapol a Yehova yimedin pa rukat, tufanyidin kamu kwiyov anch tudi mu diking dia umutakel winou. Chikwau kand, chinech chimekeshin nawamp kamu rukat ra Yehova.

¹¹ Mudi mu mivu chitot ya kusambish, antu asadinay Yehova mulong wa kutakel antwend ading antu akad kuwanyin. Pakwez, Yehova wasadina pasak antu akad kuwanyin mulong wa kuwanyish rusot rend. Nowa wasala waat ni walejana mulong wa kwez kwa disheshik diafanyina kushiken machuku minima. (Dis. 6:13, 14, 22; 2 Pita 2:5) Amutonda Moses mulong wa kuyibudish antu a Yehova mu Idjibit. (Kub. 3:10) Nzamb wayipepila antu akad kuwanyina mulong wa kufund Bibil. (2 Tim. 3:16; 2 Pita 1:21) Mulong Yehova ukat kusadin nlel antu akad kuwanyin mulong wa kutakel mudimu wa kulejan ni kwikadish antu in kwilej, chinech chikatap kuziyish kashinsh mu dirijek dia Nzamb. Chawiy, chinech chitukasikeshin mulong twij anch pakad ukwash wa Yehova, dirijek dikutwishap kusal yawonsu yisadikina nlel. Chikalap nchik mar ni milong yikwau yikash, kashalapol ushinshamena umekeshin anch spiritu wa Nzamb ukat kumutakel. Nlel, chikunku chimekena cha dirijek dia Yehova chikwet yiyukish yivud. Chawiy tufanyidin kupan ukwash ku dirijek dined ni kudichingejin.

MUTAPU WA KUMEKESH RUCHINGEJ RETU KU DIRIJEK

¹² Antu awonsu akweta yisend mu chikumangen amekeshin ruchingej rau pa kwitiyin kwa kwikatin yisend ni kuyisal nich kushinshaman. (Mid. 20:28) Mulong tudi in kulejan a Want, twipanin nich mushiku mu mudimu wa kulejan ku chikumbu ni chikumbu, kuyichirikin antu ni kutakel malejan ma Bibil. (Mat. 24:14; 28:19, 20) Mulong wa kutaninamu kamu mu yakudia ya mu spiritu yipaninau kudi kashalapol ushinshamena ni kubabal, tukat kwirijek ni kukumangan ku yikumangan ya win Kristu ni ku yitentam. Tukat kutaninamu nakash mu kukasikeshijan umwing ni mukwau anch twamanijan nau akadivar ni anambaz netu ku yikumangan yiney ya win Kristu.—Heb. 10:24, 25.

¹³ Anch twapan ukwash ku dirijek ni yipan ya ku mujimbu, tukat kumekesh anch tudichingejidin. (Jnsw. 3:9, 10) Pitukata kuman anch akadivar ni anambaz netu adi mu maswir, tukat kuyikwash pakad kulab. (Gal. 6:10; 1 Tim. 6:18) Tukat kusal mwamu mu rukat ra ukadivar, mulong wa kumekesh kudi Yehova ni ku dirijek dined anch tukat kusanger ranaken ritumekeshidinau.—Yoh. 13:35.

¹⁴ Tukat kumekesh kand anch tuchingejidin dirijek pitukata kwitiy mipak yikwatinau kudi dirijek. Chinech chitin kand kulondul ni kwikepish ku umutakel uletinau kudi antu atakedina, mudi atulam a minyingumuku ni amakurump a chikumangen. Akadivar inay adi pakach pa ‘antu akata kutakel,’ niyawiy tufanyidin kuyiziyil. (Heb. 13:7, 17) Ap anch tuteshinap nawamp mulong wak akwatin mipak kanang, twij anch kuyikwash kukutuletin yiyukish machuku ma kurutu. Mudi yibudikin, Yehova ukutuyukish mulong wa kuziyin ku Dizu diend ni ku dirijek diend. Mwamu tumekeshin kuziyin kwetu kudi Mwant, Yesu Kristu.

¹⁵ Mwaning, tukwet mayingishin mavud ma kumuchingejin kashalapol ushinshamena ni kubabal. Satan, nzamb wa ditenchik dined dia yom, usadin yawonsu mulong wa kuyipish dijin dia Yehova ni dirijek diend. (2 Kor. 4:4) Kangal wawil amboku mu mipit yiyimp ya Satan! (2 Kor. 2:11) Wij nawamp anch “chisu chend chashal kal chikemp” kurutu kwa kumudjibwil mu dibuku, ni usadin usu wawonsu mulong wa kupumbul antu avud a Yehova chakwel ayidiosha ku mutambu wa Nzamb. (Kuj. 12:12) Pakwez, mulong Satan usadin usu nakash mulong wa kupumbul antu, el amboku tusejany piswimp ni Yehova. Tumuchingejinany amboku Yehova ni njil yisadidinay mulong wa kuyitakel antu end nlel. Kusal mwamu kukulet uumwing wa ukadivar.