Ndond Jetu ja Difukwil

IN KWIFUKWIL akin a Yehova ayitin kukumangan pamwing mulong wa kutambul mafundish ni kukasikeshijan umwing ni mukwau. (Heb. 10:23-25) Ndond ya kusambish ya difukwil ya in Isarel, antu atonday Nzamb, yading “dizang, mwinkand wa kukumangen.” (Kub. 39:32, 40) Kupwa, Salomon mwan wa David watunga chikumbu ap anch tempel mulong wa uyaj wa Nzamb. (1 Ant. 9:3) Kupwa kwa kumushesh tempel winou mu muvu wa 607 K.C.C., in Yuda akumanganang mu yikumbu yitazukinau anch sinagog mulong wa kumwifukwil Nzamb. Kupwa, tempel amutungurila ni wikala kand ndond ya difukwil diakin. Yesu walejanang mu masinagog ni mu tempel kand. (Luka 4:16; Yoh. 18:20) Yesu wasadinang kand yikumangan pa mukandu.—Mat. 5:1–7:29.

² Kupwa kwa rufu ra Yesu, in Kristu akumanganang pa jindond ja pibur ni ku yikumbu ya antu mulong wa kufundish Mifund ni kusanger urund pamwing nau in kwitiyij akwau. (Mid. 19:8, 9; Rom 16:3, 5; Kol. 4:15; Flm. 2) Yisu yimwing chading cha usey kudi in Kristu a kusambish kukumangen ku jindond ja ujindj mulong wa kuyiyep in kuyizengol. Chakin kamu, atushalapol ashinshamena a Nzamb a pasak ading ni maswir makin ma kukumangan mu jindond ja difukwil mulong ikala ‘afundishinau kudi Yehova.’—Isay 54:13.

³ Nlel unou kand, jindond ja pibur ni yikumbu ya antu ayisadidin mulong wa yikumangan ya win Kristu. Nakash yikumbu ya antu akat kuyisadin mulong wa yikumangan ya mudimu wa kulejan. In Kristu akata kupan yikumbu yau mulong wa yikumangan yiney ij anch chidi chisend chiwamp. Avud ij anch akat kutaninamu nakash mu spiritu anch apan yikumbu yau mu mutapu winou.

CHOT CHA WANT

⁴ Ndond ya kusambish ya yikumangan ya Atuman a Yehova yidi Chot cha Want. Yisu yivud, akat kulandang rupang mulong wa kutungamu Chot cha Want chisu ap kurijek chikumbu chikur mulong wa kuchisal chikala Chot cha Want. Mulong wa kulam nfalang ni kusadin nawamp jindond jinej, yikumangen yivud yikutwish kusadin Chot cha Want chimwing anch chitwishikin. Ndond jimwing, akutwish kufutin chikumbu mudi Chot cha Want. Mulong wa Yot ya Want yisu ap yikatau kurijek, chidi cha usey kuyipan kudi Yehova (inauguration). Pakwez, anch arijek yom kanang ku Chot cha Want chatungau kal, chidiap cha usey kuchipan kand kudiay Yehova.

⁵ Chot cha Want kafanyidinap kuchisal mu mutapu wa kushimokish antu akwau. Ap anch kutung kukutwish kushalijan kukwatijan ni ndond, chitongijok chidi mulong wa kusadilamu yikumangan. (Mid. 17:24) Kukwatijan ni mashakamin ma pol pen, yifanyidin kwikal ndond yiwamp ni yiwanyidina kusadin yikumangan ya win Kristu.

⁶ Yikumangen yawonsu ya Atuman a Yehova yikat kupan nfalang mulong wa kulam ni kurijek nawamp Chot cha Want chikatau kusadin yikumangan. Kakatap kufutish nfalang; ap kuyit antu nfalang. Mishet ya kutek yipan yidiaku mulong antu akumangena akutwish kupan nfalang jikutwisha kukwash mulong wa kulam ni kurijek nich Chot cha Want. Akat kupan kwa kwikatin ni muchim umwing.—2 Kor. 9:7.

⁷ Antu awonsu mu chikumangen akat kuman anch chidi chisend chiwamp kukwash ni nfalang ni kusal midimu yikwau kwa kwikatin mulong wa kulam ni kurijek nawamp Chot cha Want. Akat kutondang mukurump ap nkwash wa mudimu mulong wa kutakel mudimu winou. Yisu yivud, kurijek kwa Chot cha Want akat kukusal kudi chisak cha mudimu wa kulejan, chitakedilau kudi ntakel ap nkwash wa chisak cha mudimu wa kulejan. Chikala mukach ap pol, Chot cha Want chifanyidin kumutumbish Yehova ni dirijek diend.

⁸ Anch mu chot mudi yikumangen yivud, amakurump a yikumangen yiney akutek Komite wa Kulam Chot cha Want, ukata kutakel midimu ya kulam chot ni rupang. Yisak ya amakurump yikat kutond mukurump umwing mulong wa kwikal ntakel. Mulong wa kusal mu kwovijan ni yisak ya amakurump, komite wa kulam Chot cha Want ukat kutakel mudimu wa kurijek ni kwikal ni kashinsh anch chot achilamin nawamp ni anch kudi yom ya kusal nich mudimu. Chinech chitin anch yikumangen yisala mu kwovijan.

⁹ Anch yikumangen yivud yisadidin Chot cha Want chimwing, afanyidin kwikal ni program wa asaa wa yikumangan wa kuswimpijan muvu ni muvu. Amakurump akusal program winou mu kwovijan ni mu rukat ra ukadivar. (Fil. 2:2-4; 1 Pita 3:8) Yikumangen yawonsu yifanyidin kukwat mipak pamwing piur pa mulong winou. Anch kalam wa munyingumuku wendin chikumangen chimwing pakach pa yikumangen yiney, yikumangen yikwau yikuswimp chisu cha kukumangan anch chidi cha usey kusal mwamu.

¹⁰ Chot cha Want akutwish kand kuchisadin mulong wa madiskur ma uruw ap ma chidil anch Komite wa Mudimu wa Chikumangen witiy. Amakurump inay akushinshikin mulong winou nawamp ni akukwat mupak kukwatijan ni mbil jipaninay biro wa mutiy.

¹¹ Antu akwitiyau anch asadina Chot cha Want mulong wa yom yiney afanyidin kwikal ni mwikadil wa win Kristu. Chifanyidinap kusal chom ap chimwing ku Chot cha Want chikutwisha kuyipwakesh akadivar nau anambaz a mu chikumangen ap kusaadikish dijin dia Yehova ap kuyipish mwikadil uwamp wa chikumangen. (Fil. 2:14, 15) Ku umutakel wa biro wa mutiy, Chot cha Want akutwish kand kuchisadin mulong wa yom yikwau ya mu spiritu, mudi Shikol ya Mudimu wa Want ap Shikol ya Mudimu wa Uchibol.

¹² Akadivar nau anambaz afanyidin kulimish chisu chawonsu Chot cha Want. Mutapu wetu wa kwileng ni wa kudjal ni mwikadil wetu uwamp ufanyidin kumekesh anch tudi in kumwifukwil Yehova. (Mul. 5:1; 1 Tim. 2:9, 10) Anch twasadin yiyul yiney, tumekeshin anch tusangaredin yikumangan yetu ya win Kristu.

¹³ Chidi cha usey nakash kulik kwikal ni kanrumbangesh chisu cha yikumangan. Anvaj afanyidin kushakam pamwing nau anau. Anvaj akweta an achidia akemp, afanyidin kushakam nau kwi ndond kukutwishau kulik kulet masok nakash, ni kukuyiswapela kubudik pol mulong wa kuyipup ap mulong wa kusal yom yikwau ya usey.

¹⁴ Akat kutond akadivar awanyishina yom yitinau mulong wa kwikal in kwakan ku yikumangan ku Chot cha Want. Afanyidin kwikal ni nkeu ni akweta rukat ni ija kujingunin yom nawamp. Yisend yau yitin kand kuyak antu asu ezina ku yikumangan ni kusal anch iyova nawamp, kuyikwash antu aswinkena chakwel atana jindond ja kushakam, kuchind uvud wa in kukumangan ni kutal anch madidish madi ma kwazuril ni rinkind usutin nawamp. Anch chidi cha usey, in kwakan akuyivurish anvaj anch afanyidin kuyilam anau nawamp chakwel kangal aya mau kurutu ap kupwa kwa yikumangan ap kukandam ku chimet. Mu mutapu uwamp ni wa matul, mwin kwakan ukutwish kumulej nvaj ukweta mwan uletina masok chakwel abudika nend pol mulong wa kulik kuyizuwol antu akumangena. Mudimu usadinau in kwakan ukat kukwash nakash chakwel antu awonsu asangera yikumangan. Chiding cha usey kusadin ankwash a mudimu mudi in kwakan, nakash akweta ukaliweny wa kupwish milong yikata kushikenang mu dijuku.—1 Tim. 3:12.

KUTUNG KWA YOT YA WANT

¹⁵ Mu mivu chitot ya kusambish, in Kristu amwing ading akwet yom yivud ya ku mujimbu kuyisutamu akwau, chawiy kambuy Paul wafunda anch: “Pa chisu chinech en ukwetanya yom yivud yikwashany akweta yom yikemp, chakwel dichuku dikwau niyau anch apit yom yivud, akez kukukwashany en anch wikalany nich yom yikemp. Chifanyidin kupan mu chilik chimwing.” (2 Kor. 8:14) Kupan “mu chilik chimwing” kwinoku kusadikin kand nlel. Nfalang jipaninau kudi yikumangen ya pa mangand mawonsu akat kujibomb pamwing mulong wa kutung ni kurijek Yot ya Want. Yipan ya kwikatil yipaninau kudi akadivar a pa mangand mawonsu akat kuyisanger nakash kudi dirijek ni kudi yikumangen yitanidinamu mu yipan yiney.

¹⁶ Kupwa kwa kushinshikin teritwar wa chikumangen, biro wa mutiy ukat kutondang yikumangen yikusadina yikumangan mu Yot ya Want yiney. Biro wa mutiy ukat kutond kand chisu ik ni kwisu kukutungau Chot cha Want chisu ni kurijek yot yatunginau kal yidia mu teritwar wa mutiy wau. Anch rikind mukash, kuzal kwa divu ap ruvul mukash washesh Yot ya Want, akat kutenchik yom mulong wa kuyirijek, ni anch kudi mutapu akutwish kurijek yikumbu ya akadivar.

¹⁷ Biro wa mutiy ukat kutakel ni kuyisadin akadivar mulong wa kuland rupang, kusal plan wa Chot cha Want, kutambul mikand ya mbur matad, kutung ni kulam chot. Mulong kudi maswir ma kutung Yot ya Want mu jingand jivud, kudi kand maswir ma in kwipan mulong wa kuyitung. In kulejan awonsu abatishinau kal ni awanyishina yom yitinau ni akatina kukwash mudimu winou ayikasikeshin kwizwish fomu ni kumupan ku Komite wa Mudimu wa Chikumangen chau. Ap in kulejan akad kal kutambul dibatish akutwish niyau kukwash mudimu wa kutung ap wa kurijek Chot chau cha Want.

YOT YA YITENTAM

¹⁸ In Kristu a kusambish akumanganang yisu yivud mu tuyisak tukemp tukemp. Pakwez, yisu yikwau akumanganang “antu avud.” (Mid. 11:26) Chilik chimwing, antu a Yehova nlel akat kukumangan avud mulong wa yitentam ya munyingumuku ni ya rejon. Yisu yimwing akat kufutin ndond mulong wa yikumangan yiney, pakwez anch kwikil ndond yiwanyididina akutwish kuland ndond ni kutungamu Chot cha Yitentam.

¹⁹ Yisu yimwing, akutwish kuland rupang ap kurijek ndond kanang ni kuyisadin mudi Chot cha Yitentam. Yisu yivud nakash, akat kuland rupang ni kutungamu chot chisu. Yot ya Yitentam yikwet kujimb kushalijan kukwatijan ni maswir ma pol pen. Biro wa mutiy ukat kukwat mupak wa kuland ndond ni kutung kupwa kwa kushinshikin nawamp yom yawonsu ni uvud wa nfalang jikusadinau.

²⁰ Mulong wa kujimb kwa ndond jinej ja kukumangen, biro wa mutiy ukat kutond akadivar adia mu mudimu wa chisu chawonsu mulong wa kulam ni kurijek Chot cha Yitentam. Akat kutenchik yom mu mutapu wa kwel anch minyingumuku yirijeka chisu chawonsu chot, kupwa kwa angond musamban ni kudandamen kuchilam nawamp. Chidi cha usey nakash kudi akadivar nau anambaz kwipan mulong wa kusal mudimu winou. Chawiy, ayikasikeshin yikumangen kukwash yitenchik yiney ni muchim umwing.—Kus. 110:3; Mal. 1:10.

²¹ Yisu yimwing, Chot cha Yitentam akutwish kand kuchisadin mulong wa yom yikwau ya uteokras, mudi mashikol ma Bibil ni yikumangan ya pakampwil mulong wa atulam a munyingumuku. Mudi kand Chot cha Want, Chot cha Yitentam yidi ndond yipaninau kudi Yehova mulong wa difukwil. Anch twezin kukumangan ku Chot cha Yitentam, mwikadil wetu, kudjal ni mutapu wetu wa kwileng ufanyidin kwikal wa kalimish, mudi mutukata kusal chisu tukumangena ku Chot cha Want mulong wa difukwil.

²² Mu machuku minam mansudiel, antu avud asu ezin mu dirijek dia Nzamb. Chinech chimekeshin anch Yehova uyukishin dirijek diend. (Isay 60:8, 10, 11, 22) Chawiy, tufanyidin kukwash yitenchik yiney mulong wa kuland ni kulam nawamp ndond jetu ja difukwil. Anch twasal mwamu, tumekeshin anch tusangaredin mudimu winou wa kutung mulong wa kukasikeshijan umwing ni mukwau pitumena anch dichuku dia Yehova dikat kusej piswimp.