Tulamany Ndond Yetu ya Difukwil Yinangina

1. Chot cha Want chisadidil rutong ik?

¹ Mu mangand mawonsu mudi yikumangen 94000 ni kusut ya Atuman’a Yehova. Yikumangen yivud yikat kukumangan mulong wa kwilej Baibel ni urund wa Ukristu ku Chot cha Want, chisadidina mud ndond ya usey ya pol petu ya difukwil dishitwila.

2. Ov mulong wak chidia cha usey nakash kulam Chot cha Want chinangina ni chimekena nawamp?

² Program wa Kukomb wa Chisu Chawonsu: Mudimu usadikina mulong wa kulam Chot cha Want chinangina udi chikunku cha usey cha mudimu wetu utumbila. Buku Organisés ulondil pa paj 61-62 anch: “Akadivar afanyidin kuman mud chisend chidiap kusu kukwash ku Chot cha Want nich nfalang pakwez kand kwipan mu mijikit ya kuchikomb, chimekana nawamp ni chinangina. Chot cha Want chifanyidin kwikal, pol ni mukach chimekeshina nawamp dirijek dia Yehova.” Chot cha Want chikatau kusadil tupamp tuvud rubing ni rubing, chiswiridin chisu ni chisu kuchikomb ni kuchilam nawamp. Chisu chawonsu in kwipan kudiokal ku yikumangen yikata kukumanganang mu Chot cha Want akat kusal midimu yiney. Mud muchadinga pa chirung cha Baibel, atushalapol a Yehova n’lel afanyidin kwikal nich mushiku mu “kutungiril ni kurijek” ndond yetu ya kwifukwil.​—⁠2 Jins. 34:​10, NW.

3. Mutapu ik utenchikinau kukomb kwa Chot cha Want, ni anany akutwisha kusadil chisend chinech?

³ Program wa kukomb rubing ni rubing Chot cha Want afanyidin kumulamik ku rubau ra kukatau kulamik yijikish. Yisak yawonsu ya dilejan dia buku yikutwish kukomb chot pa chambaken ni chambaken rubing ni rubing, kusutil ku kulondul list wa yom yifanyidina kusal. Antu awonsu akweta kuswir, akutwish kusal pamwing mu chisend cha kukomb Chot cha Want rubing ni rubing ni kuchilam chinangina ni chimekena nawamp. An afanyidin kusadil mu kukomb kwa chot mu umutakel wa anvaj, chawiy akuyifundish kumekesh musangar wau mulond wa chisend chinech. Pakampwil anch yikumangen yivud yikat kusadil Chot cha Want chawiy chimwing, kovijan kuwamp kudi kwa usey chakwel kubangin kwa mutambu winou ujim wa difukwil dietu anch kangal kwikil chisend cha antu akemp kusu.

4. Yom ik yifanyidina kusal chakwel chikumangen chijika ya kusal pa chisu chikombilau Chot cha Want?

⁴ List wa yom ya kusal chifanyidin kumulamik ku rubau, pakampwil ndond yilamidinau yom ya kukomb nich ni ya kusadil. List winou ufanyidin kurumburil midimu ya kusal pa rubing, pamwing nich kudiosh yishoshot, kudiosh wand wa ntandawaj, kukusul tupend ap kufungul yijikina mwa kusutin mem kwambatan nich yisadikina ku Chot cha Want, kukusul rufunfut ndond ya kutekin mikand, kwichil yishoshot, kukorop, ni kukusul makalash. Midimu yikwau yiswiridin kusadik chisu ni chisu, chilikej mud kupan many ku yom yin yawonsu ya mabay ni kukusul nawamp yitwamu ap yibamb, ntent-a-yis ni ntent-a-tupend, ni nshing ja kasu. Mon yawonsu yisadidilau mulong wa kukomb chifanyidin kuyilamin kulemp nau an ni chifanyidin kuyifund majin nawamp. Chifanyidin kuwejinap kand mu wiswimp yirumburil piur pa mutapu wa kuyisadil mon yikweta ulemb.

5. Kwikang kudi kwa usey ik, ni yom ik yiswirikedina kushinshikin chisu ni chisu? (Tal mushet pa paj wa 4.)

⁵ Kuchidij ku Chot cha Want kudi kwa usey nakash. (Kuv. 22:⁠8) Pa chinech, mushet udia pa paj wa 4 ujimbwil yom kanang yiswirikedina kushinshikin chisu ni chisu chakwel kangal kwez kwasadik chak. Yom yiney yifanyidin kuyitek mu chikumbu cha mwin kulam.

6. Mutapu ik utakedinau mudimu wa kulam Chot cha Want?

⁶ Kulam Chot cha Want: Chisak cha amakurump chikwet chisend chijim cha kwimanyin kulam kwa Chot cha Want. Chisu chivud, kuding kutond kwa mukurump umwing ap nkwash’a mudimu chakwel kwimanyin mudimu. Ukutenchik mutapu wa kusadil pichuku-pichuku Chot cha Want, kushinshikin anch chidi cha kukomb, chinangin ni anch yom ya kusal nich mudimu yidiaku yiwanyidin. Chidi cha usey kutal anch kwikil chom chawonsu chikutwisha kulet ubaj mukach ap pol pa Chot. Ang chikumangen chimwing ap yivud yisadidil chot chimwing, yisak ya amakurump yikutond komite chakwel kutenchik mulong wa kulam chot ni yom yach. Komite winou ukusadil mwishin mwa umutakel wa yisak ya amakurump.

7. (a) Chom ik chikata kusadik muvu ni muvu mulong wa kushinshikin anch Chot cha Want achilamin nawamp? (b) Milong ik yitina kuta muchim chisu ni chisu? (Tal mushet pa paj wa 5.)

⁷ Kushinshikin kwa piswimp nakash kwa Chot cha Want kukusadik kapamp kamwing pa muvu nich kusadil fomu CN-14, utenchikinau kud Biro wa Mutiy wa Rutung ra Yot ya Want. Amakurump akwet chisend cha kutenchik mulong wa kushinshikin nawamp yom yiswiridikina. Chitwishikin kuyit in kulejan kukwash mu mudimu uswirikedina kurijek ni kulam Chot cha Want. Antu awonsu afanyidin kudimuk chakwel kurijek tuyom tukemp-tukemp ni afanyidin kwikal aswapela kuta muchim pa yom yiswiridikina.

8. Chisu ik chifanyidinau amakurump kwisamb ni Biro wa Mutiy wa Rutung ra Yot ya Want piur pa milong ya kulam chot?

⁸ Anch amakurump aswiridin chiyul ap ukwash mulong wa kulam Chot cha Want, afanyidin kwijikish Biro wa Mutiy wa Rutung ra Yot ya Want. Chinech chikutwish kuwejin milong mud ya kulam jibumbu, kushinshikin yom yitadila musong wa chot, kupwish milong ya rutung ni kurijek milong ya kushingun mu chot.

9. Yik yifanyidina kusal anch kudi kuswir kwa kusinye mudimu ni muntu kanang?

⁹ Sadilany Nfalang ja Chikumangen Nich Manangu: Midimu yivud ya Chot cha Want ni rupangu akat kuyisal kud in kwipan kwa kwikatin. Usu wau wa kwipan udi kumekesh kuwamp kwa rukat ni ukwashin mutapu ujim kukepish nfalang ja kufutin. Ang chikal cha usey kwit sosait umwing kusal mudimu kanang, chilikej mud kujip atupwapu ap kudiosh yishoshot ap kupwit yiyimp yidia mu misalany, amakurump afanyidin kukimb mutapu ukutwishau kusadil nfalang jikemp mulong wa midimu yiney. Afanyidin kusal chinech cha kusambish kusutil ku kufund kachom kamwing-kamwing ka mudimu wa kusal ni/ap yom ya mudimu ya kusadil. Kopi umwing a kumupan kud antu akusala chakwel anch atwisha kutesh chilik chimwing piur pa yom yifanyidina. Kupwa kwa kutambul yom yifundinau kudiokal kwi ndond yiyitinau, amakurump akutwish kutond antu akutwisha kusal nawamp. Chifanyidin kulondul mutapu winou wa kusal ap anch mukadivar ndiy wipanina kusal mudimu ap kupan yom yiswiridikina ku usey kanang.

10. Chom ik chikusadika chakwel kwikal nich kashinsh anch nfalang ja chikumangen ajisadidin mutapu ufanyidina?

¹⁰ Amakurump akusal kand usu ufanyidina chakwel kwikal nich chot ni kwikal nich mukand wa kuyidiosh ku kuland chitad, kwi ndond kukata kusadik yom yiney. Anch yikumangen yivud yikat kusadil Chot cha Want chimwing, komite usadila ukulam yipau kushalijan ya nfalang ni kupan rapor wa kufund ku chisak ni chisak cha amakurump ngond ni ngond, chinech chikuyijikish amakurump chitongijok piur pa mutapu usadidilau nfalang. Amakurump akwet chisend cha mutapu uwamp wa kusadil nfalang ja chikumangen.

11. Chom ik chifanyidina kusal anch kwikal kuswir kwa kutungiril?

¹¹ Kulam ni Kurijek kwa Chisu ni Chisu: Ang komite usadila waman anch kudi chom chijim chiswiridikina kwambatan nich kusadil kwa Chot cha Want ap kulam, komite ukwijikish mulong winou ku yisak ya amakurump mulong wa umutakel. Ang kwikal kukwat mupak anch kulam ap kutungiril kuswiridikin ap anch ukwash winou ukez kudiokal ku yikumangen yikwau yakad kusadinang Chot cha Want chinech, amakurump a kwijikish ku Biro wa Mutiy wa Rutung ra Yot ya Want. Akadivar inay awanyishinau, ni ija yom yivud akupan yiyul yifanyidina ni kuta muchim mu kwimanyin mudimu. Ang kwit nfalang jivud, chikez kwikal cha manangu kwijik uvud wa nfalang uswiridikina ni kurijek chiyul cha kwitiyin kwa chikumangen.​—⁠Tal Mudimu Wetu wa Want wa Kafumpul-Mashind 1994 mu Mushet wa Yakul ku Yipul Yen.

12. Mutapu ik tukutwisha kumekesh kusanger kwetu mulong wa dilau dia kukumangan mu Chot cha Want?

¹² Tukat kusanger dilau dietu mud ik dia kukumangan pamwing mu Chot cha Want! Kitukezap kusot kudiul yikumangan yetu ap kuyiman mud yom ya chamwamu. Antu awonsu akutwish kupan ukwash ku kupandakan kwa ditenchik dined mulong wa dikasikesh dietu kusutil ku kusadil pamwing mu kulam Chot chetu cha Want. Chinech chikat kutumbish difukwil diakin ni kushiman dijin dia Yehova. El tukwatany mupak wa kulam ndond yetu ya kwifukwil yinangina.

[Caption on page 1]

[Study Questions]

[Caption on page 5]

Kulam Chikumbu ni Yom

◻ Pol: Ov musong udi, wa kushingun, pench, tupend, ni chijingidij cha kwijikish nich Chot cha Want yimeken nawamp?

◻ Pansh: Ov divu didi dia kuband nawamp? Ov tubway, rupang, ni ndond mwa kwimikin motak (ap jinking) yidi mu mwikadil uwamp?

◻ Mukach: Ov ntent-a-tupend ni a yis, yitwamu, ni yibamb, nshing ja nzembu, kushingun kwa jibumbu ni nkil mwa kulamin mikand yimeken nawamp?

◻ Yom ya kusadil: Ov kasu, yijimbish mazu ni ya kupep nich rinkind yisadil nawamp?

◻ Misalany: Ov yinangin ni yikat kusal nawamp?

◻ Madosiye ma chikumangen: Ov ukwetany mu madosiye men makuru makopi ma mikand yijikena kud mbur-matad ya rupangu (I.E. Mukand wa Kwifundish kud mbur-matad, Kufutin Chikumbu, Mukand wa Kulandish Chikumbu)? Kwi ndond yiswiridikina, mafomu ma kulik kuland chitad mulong wa rupang madi ma kwizwish nawamp muvu ni muvu?

[Caption on page 4]

[Picture on page 4]

List wa Yom ya Kwikang Nich

◻ Ya kujim nich kasu yifanyidin kwikal pa ndond yikutwishau kushik antu awonsu swa ni kurijek muvu ni muvu.

◻ Yis ni yikandamin yifanyidin kwijikan nawamp, chitokish cha kasu chiwamp, ni yiswapela kuyitan, ni yom kwikamen ya kukwatin chisu chendila antu yifanyidin kwikal yikash.

◻ Jinkil ni misalany yifanyidin kwikal yinangina, jakad kanvundangesh, ni mwakad yom yikutwisha kwak kasu swa kapamp kamwing ni yishoshot.

◻ Musong ni miyeng mwa kudjil mem chifanyidin kuyishinshikin ni kuyikusol chisu ni chisu.

◻ Tubway ni ndond mwa kwimikin motak [ap nking] mufanyidin kwikal chitokish cha kasu ni kudioshamu chom chawonsu chisidina ap cha kuwishan.

◻ Yitenchik ya nzembu ni ya kupep rinkind chifanyidin kuyishinshikin chisu ni chisu ni kuyirijek.

◻ Mapan min mawonsu chifanyidin kumajik swa mulong wa kwipuk milong ya kutalal kwa divu.

◻ Chikumbu cha mwin kulam chifanyidin kwikal chisu chawonsu chinangina, chakad kanvundangesh ni yishoshot, ni yom yikutwisha kwak swa kasu.

◻ Chot chifanyidin kwikal cha kupat ni kafur anch mwikil muntu ap umwing.