Yakul ku yipul yen

◼ Ov chisend cha kukomb Chot cha Want chidi cha nany?

Chot cha Want chinangina ni chisangarishina chimekeshining usey wa uruu utukata kulejan. (Isikej 1 Pita 2:12.) Chawiy lel, chidi cha usey kuchilam chinangina ni chitok. Muntu ni muntu ukutwish kukwash mu kuchilam chitok. Tufanyidinap kutong anch mudimu winou udi kusu wa antu akemp kanang. Chisu chivud, kukomb akurijekining kulondulijan ni yirund ya Dilejan dia Buku, ntakel wa dilejan dia buku ap nkwash wend ukat kutakel mudimu. Mu yot mukumangedina yikumangen yivud, amakurump akurijek milong chakwel yikumangen yawonsu yisala mudimu winou wa kukomb.

Ov mutapu ik tukutwisha kukwat nich makas maad chisend chinech? Chifanyidin kukomb Chot cha Want kulondulijan ni program umwing wa chisu chawonsu. Chifanyidin kwikal ni yom ya mudimu ya kusadil ni mon ya kutokish nich. Akutwish kutek list wa midimu yifanyidina kusal ndond yikutwishau kuman antu akusala mudimu chakwel amana mwa kusadin. Kukutwish kwikal malist maad kushalijan, umwing wa kukomb kusu kupwa kwa kukumangan ni mukwau wa kukomb ndond jawonsu rubing ni rubing. Ntakel a dilejan dia buku ufanyidin kurijek program wa kukomb ndond jawonsu dichuku kanang ni chisu chimufanyidina muntu ni muntu. Chifanyidin kand kurijek chisu ni chisu pashiplom, yisalamb ni tumitond. Mikombil ni ndond ya kwimikin miotak ni jinking yifanyidin kwikal yitok. Muvu ni muvu, chifanyidin kutokish pol pa Chot, anch chitwishikin kurutu kamu kwa kusal Chivurish. Chinech chikutwish kand kuwejin kowish madidish ni rubumb, tapi, ni kutut maswin ma ku madidish.

Mwaning, etu awonsu tukutwish kuswapesh chisend chinech anch twasal usu wa kulik kudjibol mabazoka ap mapapel mukach ap pol pa chot. Tukutwish kutokish musalany kupwa kwa kuusadil, ni kuusha pakad buchafu mulong wa muntu mukwau ukweza. Kangal twayipish yom yitusadidina ap kuyibukon. Tutalany nawamp matapi makweta buchafu, yitwamu yayipina kal, ampomp akad kusutish mem nawamp, malamp mafila, ni yikwau yikwau, ni kumulejamu kapamp kamwing mukadivar utadila milong ya kulam kwa Chot cha Want.

Tusotany muntu ni muntu kusal mudimu wend. Chinech chikusal anch chikumbu cha difukwil chikala chisangarishina ni chitushalijadishina mud antu inangina amulimishina Yehova Nzamb.​—⁠1 Pit. 1:⁠16.