Mukand Udiokila ku Chisak Chitakedila

In Kulejan Akatish a Rusangu Ruwamp:

Dilau mud ik dia kwikal mu uumwing mu difukwil dia Nzamb wakin, Yehova! Mulong tudi ‘in kusal nend mudimu pamwing,’ inkishay mudimu utumbila ni ukata kupandish mwom wa kufundish ni kulejan rusangu ruwamp ra Want. (1 Kor. 3:9; Mat. 28:19, 20) Mulong wa kuwanyish mudimu winou pa mangand mawonsu mu chisambu ni mu uumwing, tufanyidin kwikal arijekinau nawamp.—1 Kor.14:40.

Buku winou ukukukwash chakwel wijika mutapu usadikina midimu mu chikumangen cha win Kristu nlel. Buku winou wisambidin midimu ni yisend yiukutwisha kwikal nich mu chikumangen. Anch ukwatin nich usey ni uwanyishin yisend yey, ukwikal ‘ukasikena mu ritiy.’—Mid. 16:4, 5; Gal. 6:5.

Chawiy lel, tukukasikeshin wileja nawamp buku winou. Shinshikin mitapu ukutwisha kusadin jinsangu jidiamu mu mashakamin mey. Chilakej, anch udi mwin kulejan wakad kal kutambul dibatish, yom ik ufanyidina kusal chakwel ushikena ku kutambul dibatish mudi Kaman wa Yehova? Chikwau kand, anch watambwil kal dibatish, yom ik ufanyidina kusal chakwel uya kurutu mu spiritu ni kutanduril mudimu wey mulong wa Yehova? (1 Tim. 4:15) Mutapu ik ukutwisha kukwash mulong wa kulet chisambu mu chikumangen? (2 Kor. 13:11) Kimb yakul ya yipul yiney mu buku winou.

Anch udi mukadivar watambwila kal dibatish, yom ik ufanyidina kusal chakwel uwanyisha yom yitinau mulong wa kusal mudi nkwash wa mudimu ni kurutu kwa machuku kusal mudi mukurump wa chikumangen? Mulong tunan twa antu asu ezin mu dirijek dia Nzamb, kudi maswir nakash ma akadivar awanyishina yitinau mulong wa kutakel. Buku winou ukukukwash chakwel wijik yom yitinau mulong wa “kuwanyish” mipak yiney ya mu spiritu.—1 Tim. 3:1.

Tulembil nakash chakwel buku winou akukwasha kwijik ndond yey mu ditenchik dia Yehova ni kuyikwat ndond yiney nich usey. Tukukatinany nakash en awonsu ni tudandamedin kulembil chakwel wikalany pakach pa antu akusangera kumwifukwil Yehova Tatukwetu wa mwiur chikupu.—Kus. 37:10, 11; Isay 65:21-25.