Limish Chipan Cha Mwom

1. Nany watwinkisha mwom?

YEHOVA “udi Nzamb mwom.” (Jeremiy 10:10) Ndiy Sakatang wetu, ni ndiy watwinka mwom. Bibil ulondin anch: “Yey watanga yom yawonsu, ni yom yawonsu yidiaku yishich mulong wa rusot rey.” (Kujingunik 4:11) Mwaning, Yehova ukimbin twikala ni mwom. Mwom chidi chipan cha usey chidiokila kudi ndiy.—Tang Kuseng 36:9.

2. Mutapu ik tukutwisha kusal mulong wa kutwish mu mwom wetu?

² Yehova utwinkishin yom tukweta nich kuswir mudi yakudia ni mem chakwel tudandamena kwikal ni mwom. (Midimu 17:28) Pakwez kudioshaku yom yiney, ndiy ukimbin tusangera mwom. (Midimu 14:15-17) Chakwel tutwisha mu mwom, tuswiridin kuziyil ku yijil ya Nzamb.—Isay 48:17, 18.

MUTAPU WOVILAY NZAMB PIUR PA MWOM

3. Chom ik chasalay Yehova pamujipau Abel kudi Kain?

³ Bibil utufundishin anch mwom wetu ni wa antu akwau udi wa usey kudi Yehova. Chilakej, Kain—mwan wa Adam ni Ev—pamujimenay nakash mwanchend Abel, Yehova wamubabesha Kain anch ndiy ufanyidin kulik kujiman. Pakwez Kain kateshap, ni wapandakesha ujim kupwa “wamuturikin mwanchend Abel, chad wamujipa.” (Disambishil 4:3-8) Yehova wamupupa Kain mulong wamujipa Abel. (Disambishil 4:9-11) Chawiy ujim ni rukis yidi yom ya ubaj mulong yikutwish kutubachik twikala in chisum. Muntu wa mutapu winou kakutwishap kutambul mwom wa chikupu. (Tang 1 Yohan 3:15.) Chakwel tumusangaresha Yehova, tufanyidin kwilej kuyikat antu awonsu.—1 Yohan 3:11, 12.

4. Chijil ik chimwing cha Nzamb chayinkau in Isarel chitufundishina piur pa chipan cha mwom?

⁴ Kwinyim kwa tunan twa mivu, Yehova wamekesha anch wadinga ukwatin mwom nich usey papanay Yijil Dikum kudi Moses. Chimwing cha yijil yiney chading chilondin anch: “Kangal wajipan.” (Kuvurik Yijil 5:17) Anch muntu wamujip mukwau, niyend chading chifanyidin kumujip.

5. Mutapu ik wovilay Nzamb piur pa kudiosh madikaj?

⁵ Mutapu ik wovilay Nzamb piur pa kudiosh madikaj? Ap mwom wa mwan udia mwivum ukwet usey kudi Yehova. Mu Chijil chapanay Yehova kudi in Isarel, Yehova walonda anch ang muntu kanang wamubul mband ukweta madikaj, anch wafa ap madikaj madiokal, niyend afanyidin kumujip. (Tang Kubudik 21:22, 23; Kuseng 127:3.) Chinech chitufundishin anch chiyipin kudiosh madikaj.—Tal Mazu ma kwinsudiel 28.

6, 7. Mutapu ik tukutwisha kumekesh kudi Yehova anch tukwatin mwom wetu nich usey?

⁶ Mutapu ik tukutwisha kumekesh kudi Yehova anch mwom wetu ni wa akwetu ukwet usey? Kusutin ku kulik kusal chom chin chawonsu chikutwisha kushesh mwom wetu ap wa antu akwau. Chawiy tufanyidinap kuna ruwand ap damb, mulong yikat kutushesh ni yikutwish kutujip.

⁷ Nzamb watwinkisha mwom ni mujimbu, ni tufanyidin kuyisadin mu mutapu ukatinay. Chawiy tufanyidin kulam nawamp mujimbu wetu. Anch twalik kuulam nawamp, tukwikal ijondina ku mes ma Nzamb. (Rom 6:19; 12:1; 2 Korint 7:1) Tukutwishap kumwifukwil Yehova, watwinkisha mwom, anch twalik kukwat mwon nich usey. Ap anch chikasiken kulik yisal yiyimp, Yehova ukutukwash anch twasal usu wa kukwat mwom ni usey.

8. Yom ik tukutwisha kusal mulong wa kushinshikin nawamp anch tutekinap mwom wetu ap wa antu akwau mu ubaj?

⁸ Twilejin anch mwom chidi chipan chikweta usey. Yehova uchingejin anch tusala usu wawonsu chakwel kangal twatek mwom wetu ap mwom wa antu akwau mu ubaj. Tusadin mwamu kusutil mu mutapu twendishina motak wetu, moto, nking ap mashiny makwau. Tukwiyep ubaj ap masengan ma chisum. (Kuseng 11:5) Tusadin kand usu wetu wawonsu mulong wa kulam chikumbu chetu nawamp. Yehova wayileja in Isarel anch: “Anch wez wakatung chikumbu chisu, ukez kusutishaku jinkwatish kunyingumwish chikumbu chalalela piur, chakwel kiukwikalap nich mulong anch muntu waturik pa chikumbu, wafa.”—Kuvurik Yijil 22:8.

9. Mutapu ik tufanyidina kuyisadil annam?

⁹ Ap mutapu tukata kuyisadin annam udi wa usey kudi Yehova. Watwinka mbil ya kujip annam mulong wa yakudia ni mulong wa masun, ni watuleja kand kujip nnam anch watek mwom wetu mu ubaj. (Disambishil 3:21; 9:3; Kubudik 21:28) Pakwez tukutwishap kwikal nich chisum piur pa annam ap kuyijip mulong kusu wa masengan.—Jinswir 12:10.

LIMISH USEY WA MWOM

10. Mutapu ik twija anch mash marumburikin mwom?

¹⁰ Mash madi matumbila ku mes ma Yehova mulong mash marumburikin mwom. Kupwa kwa Kain kumujip Abel, Yehova wamuleja Kain anch: “Mash ma mwanchey michikanga pansh mamekanang kal kudi am.” (Disambishil 4:10) Mash ma Abel mamekesha mwom wend, ni Yehova wamupupa Kain mulong wamujipa Abel. Kupwa kwa Mabeb pa chirung cha Nowa, Yehova wamekesha kand anch mash marumburikin mwom. Yehova wamwinkisha Nowa ni dijuku diend mbil ya kudia mbij ja annam. Walonda anch: “Chom chawonsu chikata kwend chikweta mwom chikez kwikal yakudia yey. Mudi munakwinkisha kand mayij matalel, am nakwinkish kal kand yom yawonsu.” Pakwez, Yehova wajidika kudia chom chimwing: “Ching kusu kangal kwez kudia mbij jikweta mwom, charumburik anch mash mau.”—Disambishil 1:29; 9:3, 4.

11. Nzamb wayinkisha in Isarel chijil ik piur pa mash?

¹¹ Mivu piswimp ni 800 kupwa kwa Yehova kumujidik Nowa kudia mash, wayileja kand antu end anch: “Mwawonsu wa in Isarel, ap mweny ushicha pakach pau, wez wazomb wajip nnam umwing, ap kajil wakwitiyanyau kudia, ufanyidin kwichil mash ma nnam winou ni kumashidil pansh.” Kupwa walonda kand anch: “Kangal wez wadiany mash.” (In Levi 17:13, 14) Ni katat Yehova ukatin anch antu end amana mash mudi matumbila. Akutwish kudia mbij pakwez mash bwat. Anch ajip nnam mulong wa yakudia, afanyidin kwichil mash mend pansh.

12. Mutapu ik umeningau in Kristu mash?

¹² Mivu kanang kupwa kwa rufu ra Yesu, atwimbuy ni amakurump mu chikumangan cha in Kristu mu Yerusalem akwata mupak piur pa chikunku cha Chijil chayinkishau in Isarel chafanyinau in Kristu kusadin. (Tang Midimu 15:28, 29; 21:25.) Yehova wayikwasha kutesh anch mash mading makwet usey kudi ndiy ni afanyina kudandamen kumaman mudi matumbila. In Kristu a kusambish kafanyinap kudia mash ap kumana ap kudia mbij ja nnam wakad kukatul nawamp pa uminy. Anch asal mwamu, chadinga kamu chiyimp mudi kwifukwil akish ap kusal masandj. Kusambish pa chirung chinicha, in Kristu akin alika kudia mash ap kumana. Ov, chidi nchik nlel? Ni katat Yehova ukimbin tumana anch mash madi matumbila.

13. Mulong wak in Kristu kitiyiningap kuyitek mash?

¹³ Ov, chinech chirumburikin anch in Kristu afanyidin kulik kuyitek mash? Mwaning, chidi mwamu. Yehova utulejin kulik kudia mash ap kumana. Anch mwingang wakulej anch kuna mar makasu bwat, ukutwish kumapamp mu mujimbu wey? Bwat kamu! Chilik chimwing, chijil cha kulik kudia ap kuna mash niyach chirumburikin anch tufanyidinap kwitiy anch atuteka mash.—Tal Mazu ma kwinsudiel 29.

14, 15. Mulong wak chidi cha usey kudi in Kristu kulimish mwom ni kumuziyin Yehova?

¹⁴ Chikwikal nchik anch mwingang watulej anch tukufa anch alik kututek mash? Muntu ni muntu ufanyidin kukwat mupak wa kuziyil ku chijil cha Nzamb piur pa mash. Mulong in Kristu akat kulimish mash madia chipan cha Nzamb cha mwom, akat kukimb mitapu yikwau ya kwiyokish chakwel alama mwom yau; chawiy kakatap kwitiy kuyitek mash.

¹⁵ Tusadin usu wawonsu mulong wa kwikal ni ukash wa mujimbu, pakwez mulong mwom udi wa usey ku mes ma Nzamb, tukwitiyap kututek mash. Chidi cha usey nakash kumuziyin Yehova pa ndond ya kumubwambwil nich chitongijok cha kulepish mwom wetu. Yesu walonda anch: “Muntu mwawonsu usotila kwipandish amwinend ukez kufa, pakwez muntu mwawonsu ukufa mulong wa [kwilondul] am ukez kwipandish.” (Mateu 16:25) Tukatin kumuziyin Yehova mulong tumukatin. Wij yom yidia yiwamp mulong wetwetu ni mulong tumen anch mwom ukwet usey ni utumbil mudi muumenay Yehova.—Hebereu 11:6.

16. Mulong wak atushalapol a Nzamb akat kumuziyin?

¹⁶ Atushalapol ashinshamena a Nzamb akwatin kal mupak wa kuziyil ku chijil chend piur pa mash. Kakatap kudia ap kuna mash, ni kakwitiyap mash mulong wa diyingishin dia umwingang.a Pakwez, akwitiy mutapu ukwau wa kwok mulong wa kupandish mwom wau. Akwet kashinsh anch Sakatang wa mwom ni mash wij chidia chiwamp nakash mulong wawawiy. Ov, witiyijin anch Yehova wij yom yidia yiwamp nakash mulong weyey?

KUSADIN KWA MASH KWITIYAY YEHOVA

17. Wisu wading mutapu umwing wa kusadil mash wayilejau in Isarel kudi Yehova?

¹⁷ Mu Chijil chapanay Nzamb kudi Moses, Yehova wayileja in Isarel anch: “Mwom wa mujimbu ushiching mu mash, ni mash minam mawiy nakwinkishanya en pa chintamb, mulong wa kuchakwish [ap, kwit dilikishin] nich mipim yen. Mash mawiy makata kuchakwish.” (In Levi 17:11) Padingau in Isarel kusal yitil, atwishanga kwit dilikishin kudi Yehova kusutin ku chakupesh cha nnam ni kumwit mwin kupesh mulong wa kwichil mash makemp pa chintamb mu tempel. Winou wading mutapu umwing wayilejay Yehova in Isarel kusadil mash.

18. Chakupesh cha Yesu chitwinkishin chom ik?

¹⁸ Pezay Yesu pa divu, waswinkesha chijil cha kupesh nnam papanay mwom wend, ap mash, mulong wa dilikishin dia yitil yetu. (Mateu 20:28; Hebereu 10:1) Mwom wa Yesu wading ni usey nakash chawiy lel kupwa kwa Yehova kumuvumbul Yesu mulong wa kuya mwiur, Yehova wayinkisha antu awonsu mutapu wa kushakam chikupu.—Yohan 3:16; Hebereu 9:11, 12; 1 Pita 1:18, 19.

19. Yom ik tufanyidina kusal mulong wa ‘kwitokish ku mash ma antu awonsu’?

¹⁹ Tumujikitishin Yehova mulong wa chipan chend chipandakena kuwap cha mwom! Ni tukatin kuyilej antu anch, anch akwet ritiy mu Yesu, akutwish kushakam chikupu. Mulong tuyikatin antu, tusadin yom yawonsu tukutwisha kusal chakwel tuyifundisha mutapu wa kupandish mwom yau. (Ezekiel 3:17-21) Chawiy lel, mudi kambuy Paul, tukutwish kulond anch: “Nitokishin kal mu mash ma antu awonsu. Mulong kinovap wom wa [kukulejan] en chiyul cha Nzamb chawonsu.” (Midimu 20:26, 27) Mwaning, tumekeshin anch tulimishin nakash mwom ni mash pitukata kuyilej antu akwau piur pa Yehova ni mutapu udia mwom wa usey kudi ndiy.