Chirik Kudiay “Kafung, Ndiy Kand Kalam wa Mipim Yen”

Watwisha kwisambin piur pa chikokujol chimwing ap yivud yitwisambinang mu broshir winou? Anch mwawiy, udi mu dirijek diwamp. Atushalapol in ritiy avud a Nzamb—a chisu chafundau Bibil ap a nlel unou—arisha nich yikokujol ya chilik chimwing. Mudi kamu mwatambulau ukwash wa Yehova mulong wa kupwish yikokujol yiney, mwawiy muchitwishikina kand kudi ey.

Yehova ukwikal ku mutambu wey anch wamuchirik

IJIK anch Yehova ukwikal ku mutambu wey anch wamuchirik. Ukukukwash kurish nich yakamish, kupwish yovil yiyimp, ni kutan chisambu cha mu manangu ni mu muchim chidiokila kukwikal nich kom kishitwila. Chawiy lel ukutwish kand kwiyov ubachikinau kumusadil Yehova pamwing ni ambay in kumwifukwil. Mwikadil wey ukwikal chilik chimwing ni wa in Kristu a mu chitot cha kusambish cha mivu, afundinau kudi kambuy Pita anch: “En wadiany mudi amikoku ashadikina kal, pakwez katat Nzamb wakuchirishinany kal chakwel umulondulany Kafung, ndiy kand Kalam wa mipim yen.”—1 Pita 2:25.

Kumuchirikin Yehova chidi chakin kamu chom chipandakena kuwap ukutwisha kusal. Mulong wak? Ukusangaresh muchim wa Yehova. (Jinswir 27:11) Mudi muwija, Yehova ukwet yovil, chawiy lel yisal yetu yikutwish kumusangaresh ap bwat. Chakin kamu, Yehova kakatap kutushindil chakwel tumukata ap kumusadil. (Kuvurik Yijil 30:19, 20) Mwin kwilej Bibil umwing wafunda anch: “Chis cha muchim wetu chikwetap kwa kufungwil pol. Akutwish kuchifungul ching kusu mukach.” Kusutil ku kumwifukwil Yehova nich muchim wizwila sens nich rukat, tukutwish kutond kwazuril chis chinech. Anch twasal mwamu, tumwinkishin chipan cha usey nakash—kushinshaman kwetu—ni chikumuletin musangar ujim mu muchim wend. Chakin, kwikil chom ap chimwing tukutwisha kwisakej nich musangar tumeninga pa kumwifukwil Yehova mudi musotinay.—Midimu 20:35; Kujingunik 4:11.

Nambaz umwing mwin Kristu walika kal kusal mudimu wa kulejan amwakin nich musangar pachirikinay ku chikumangen

Chikwau kand, anch wachirik mu difukwil dia in Kristu, maswir mey ma muspiritu makez kuwanyin. (Mateu 5:3) Ov, mu mutapu ik? Antu avud pa mangad akat kwiyipul anch: ‘Mulong wak tudi pinap?’ Asotin nakash kwijik chakul ku chipul piur pa rutong ra mwom. Antu akwet maswir minam mulong Yehova wayitanga mwamu. Watutenchika chakwel tutana musangar mu kumusadil ndiy. Tukutwishap kwikal nich musangar ujim kupandakanamu musangar udiokila ku kwijik anch tumwifukwidil Yehova nich rukat.—Kuseng 63:1-5.

Ijik amboku anch Yehova usotin anch ey uchirika kudiay. Ov, mutapu ik ukutwisha kwikal nich kashinsh? Shinshikin anch: Alembila nakash pamurijekau nawap broshir winou. Akuletinay, pamwing ap kudi mukurump umwing mwin Kristu ap kudi mbay mukwau mukaritiy. Kupwa wikala ubachikinau chakwel umutanga ni kwakul ku uruu wend. Yiney yawonsu yimekeshin anch Yehova kakuvuramedinap. Chinyim ni chinech, ukukatishin ni ukupwitidin piswimp nend.—Yohan 6:44.

Tukutwish kutambul rongoj ridiokila ku kwijik anch Yehova kakatap kuyivuramenang atushalapol end ashadikina. Chawiy chamusangaresha nambaz Donna. Walonda anch: “Nasambisha pakemp pakemp kudiokal mwi njil ya uyakin, pakwez, yisu yivud nading nikutongijokin awinam pa Kuseng 139:23, 24, malondina anch: ‘Mpapata, A! Nzamb, wijik muchim wam. Mpaka, wijik yitongijok yam. Ntalamu bil anch mu am mudi chom chiyimp, ni wintakel mwi njil mwakad kushemunikang.’ Nadi nij anch nidiap wa mangand—kinadingap chakin kamu ku mutambu wa mangand—ni nadi nij anch niswiridin kwikal mu dirijek dia Yehova. Nasambisha kuman anch Yehova kandikal anlika; nading kusu nifanyidin kukimb mutap wa kuchirik kudiay. Nikwet musangar anch nasala mwamu!”

“Nasambisha kuman anch Yehova kandikal anlikika; nading kusu nifanyidin kukimb mutap wa kuchirik kudiay”

Madi malembil metu makashinsh anch ey niyey ukuman kand “musangar wa Yehova.” (Nehemiy 8:10) Ukezap ap pakemp kunenganan kumuchirikin Yehova.

Yakul ku Yipul Piur pa Kumuchirikin Yehova

OV, NIKUSAMBISHIN KWISU?

Muntu wayela kal ku mujimbu ukutwish kuchirikin pakemp pakemp chaku chend cha machuku mawonsu. Chilik chimwing, ukutwish kuchirish usu wey mudi mwin Kristu kusutil ku kupakish kudia yakudia ya muspiritu yikemp dichuku ni dichuku. Kangal watong anch ufanyidin kusal yom yawonsu kapamp kamwing. Pamwing ap ukutwish kusal minit yikemp mu kutang ap kutesh Bibil ukwatinau mu kaset, kwilej umwing wa mikand yetu, kukimb mu kapend ka web ka jw.org, ap kutal umwing wa maprogram malejenau pa tv.jw.org. Chikwau kand, kupakish kukumangan ku chikumangan cha chikumangen pichitwishikina. Kupandakamanu yawonsu, mulembila Yehova ni kumwit ukwash wend. “Letany yakamish yen yawonsu kudi ndiy, mulong ukat kukulamany.”—1 Pita 5:7.

Eeva walonda anch: “Kupwa kwamam kulik kusal mudimu wa kulejan mu difukwil diam, nasambisha kwov usany ap wa kulembil. Panikasikesha chakwel kulembil, mukurump umwing wa mu chikumangen cha pol petu weza kwintal. Wankwash chakwel nisangera anch Yehova kanvuramedinap. Mukurump winou wanyula anch nisambisha kutang Bibil pichuku pichuku. Panasala mwamu, nikala nich usu wa kusambishiril kuya ku yikumangan. Kupwa, nasambisha kand mudimu wa kulejan. Nikwet musangar anch Yehova kanvuramedinap.”

OV, CHIKUMANGEN CHIKWINGAK MUTAPU IK?

Ukutwish kwikal nich kashinsh anch yid ya chikumangen yikukwak nich musangar. Pa ndond pa kukulondol nayimp ap kukurumburish, akukumekeshin rukat rau ni kusal yawonsu yitwishikina chakwel kukukasikesh.—Hebereu 10:24, 25.

Javier walonda anch: “Nova usany wa kuchirik ku Chot cha Want. Niyipu piur pa mutapu ukezau arund nam kwiman. Umwing wa anambaz etu amapal wasala pasak mivu 30 pinipa, wanleja anch, ‘Wezaku Mwanam ku chikumbu!’ Chom chinech chanshika chakin kamu ku muchim. Nading chakin ku chikumbu.”

Marco walonda anch: “Naya ku Chot cha Want ni nashakama pa chitwamu cha nsudiel chakwel kangal muntu ap umwing amana. Pakwez, antu avud asambish kwinvurik kusutil ku dichuku dinakumangana nau panadinga mwanikanch. Angaka ni ambwikata nich rukat, ni nova chisambu chijim nakash. Chading mudi anch nachirika ku chikumbu.”

OV, MUTAPU IK UKWINKWASHAU KUDI AMAKURUMP?

Amakurup akukusend nich rukat. Akez kukujikitish mulong wa maswir mey ma kuchirish “rukat rey wadinga nich pakusambish.” (Kujingunik 2:4, NWT) Akez nich ranaken kukukwash kutenchik yilim yawonsu wasala, akusal mwamu nich “muchim wa kwitudish.” (Galatia 6:1; Jinswir 28:13) Amakurump akutwish kutenchik chakwel muntu umwing ileja ney, pamwing ap mu mikand mudi Sejany Piswimp Kudi Yehova ap “Ilamany Ayinen mu Rukat ra Nzamb.” Ikal nich kashinsh anch amakurump akukukasikesh ni kukukwash mwi njil yey yawonsu.—Isay 32:1, 2.

Victor ulondin anch: “Mu mivu chinan nalika kusal mudimu wa kulejan, amakurump adandamena kwingendil. Dichuku dimwing, mukurump umwing wanleja yipich yimwing yatukwatau pamwing. Yanvurisha yom yivud yiwamp ni nasambisha kutongijokin pa musangar nadinga nich panadinga ni kumusadil Yehova. Nich rukat amakurump ankwasha kuchirish kand chaku cham cha muspiritu.”

“Ukez Kukukasikeshany”

Buku wetu wa miminy, Muwangina Yehova, ukwet miminy yivud yisangareshina yikutwisha kwongoj ni kukukasikesh piusambishina kand mujikit wa mu spiritu. Chilakej, shinshikin bil, mazu ma muminy nimero 60. Wimedina pa mazu madia mu 1 Pita 5:10, ukweta mutu wa mulong ulondina anch “Ukez Kukukasikeshany.”

Kudi diyingish diakulejinay Nzamb uyakin

Amwinend ukutwadin ku chitokish.

Wamana mu muchim wey maswir wading nich

Witin usala yitentamina.

Yeya washilamu kusal rusot rend;

Ukukukwash ni ukudandamen.
Nzamb wapana Mwanend mukatish mulong wey;

Pa chinech, Ndiy usotin utwisha

Anch Katumap Mwanend mukatish panap pansh,

Chakin kamu ndiy ukukukasikesh.

Wij ritiy ni rukat rey ukweta;

Kakezap kukangany kuyilam antu.

(KWAKUL MWAS)

Nich mash ma Yesu akwitiyin kwikal mwan wa Nzamb.

Ukukukasikesh chakwel ujijaman.

Ukukutakel ey ni kukuking chisu chawonsu.

Ukukukasikesh chakwel ujijaman.

Mulong wa kutesh mazu matenchikinau ma muminy winou ni miminy yikwau ya Want, tal pafundinau anch MIKAND > MISIK.