Adam ni Ev Amubwambwila Nzamb

Dichuku dimwing pashalay Ev amwinend, nnak wamwambambisha. Walonda anch: ‘Chid chakin anch Nzamb wakujidikinany kuda mabuj ma mitond yawonsu?’ Ev wakula anch: ‘Tukutwish kwetu kuda mabuj ma mitond yawonsu kudoshaku ching mutond umwing. Ang twada dibuj da ku mutond winou, tukufa.’ Nnak walonda anch: ‘Ukufanap kwen. Pakwez, anch wadan dibuj da ku mutond winou ukwikalan mud Nzamb.’ Ov winou wading uyakin? Bwat, mading makasu. Pakwez Ev wamwitiyija nnak. Ev waditala dibuj dined nakash, chawiy chadikatay nakash. Ev wada dibuj dined ni wamwinkisha nfumwend chikunku. Adam wading wij ang akufa anch amubwambwil Nzamb. Pakwez ndiy wada.

Kusut kwa dichuku dinida, Yehova wambamba nend Adam ni Ev. Wayipula anch mulong wak amubwambwilang. Ev wamufisha nich nnak, ni Adam wamufisha nich Ev. Mulong Adam ni Ev amubwambwila, Yehova wayopata mu chir cha Eden. Mulong wa kuyikangesh kuchirik mu chir, Yehova wateka angel ni mpak ya musamun ya mizwizu ya kasu ku chis.

Yehova walonda anch muntu wamudimbang Ev niyend chifanyidin kumupup. Kadingap chakin nnak wambamba ni Ev. Yehova katangap annak chakwel asambish kulond. Wading mwangel muyimp wasala anch nnak alonda. Wasala mwamu chakwel amudimb Ev. Mwangel winou amutazukining anch Satan Djabul. Kurutu oku, Yehova ukumushesh Satan ni kakuyidimbap kand antu chakwel asala yom yiyimp.