Mwant Wakusambish wa mu Isarel

Yehova wayinkisha in Isarel anzwij mulong wa kuyitakel, pakwez awiy akimba kwikal ni mwant. Amuleja Samwel anch: ‘Michid yawonsu yitunyingumukina yikwet ant. Niyetu tukimbin mwant.’ Samwel wamana anch chading chiyimp, chawiy wamulembila Yehova piur pa mulong winou. Yehova wamuleja anch: ‘Antu kakulikinap ey, yama ulikinau. Yileja anch akutwish kwikal ni mwant, pakwez mwant ukwit yom yivud yifanyidinau kusal.’ Ap mwamu, antu akula anch: ‘Tushichap nawamp. Tukimbin mwant!’

Yehova wamuleja Samwel anch muntu utazukinau anch Saul ukwikal mwant wau wa kusambish. Chisu chayay Saul kumutal Samwel ku Rama, Samwel wamuzizila Saul many mu mutu wend chakwel ikal mwant.

Kupwa, Samwel wayikumangeja in Isarel pamwing chakwel ayileja mwant wau musu. Pakwez katwishap kumutan Saul kwi ndond kampand. Wij mulong wak? Mulong wading ujingamin mu yom. Pamumanau Saul, amubudisha pol ni amwimika kurutu mukach mwa antu. Saul wading mulemp kusutamu antu awonsu, ni wading muwamp nakash. Samwel walonda anch: ‘Talany muntu watondinay Yehova.’ Antu atoya nich mazu piur anch: ‘Mwant ashakam mivu yivud!’

Kwinsambishin Mwant Saul wamuteshang Samwel ni wamuziyinang Yehova. Kupwa waswimpa. Chilakej, mwant kadingap ni mbil ya kupesh milambu. Dichuku dimwing, Samwel wamuleja Saul kumuchingel, pakwez Samwel walaba pa kushik. Chawiy Saul wakwata mupak wa kupesh mulambu amwinend. Samwel wasala ik? Wamuleja anch: ‘Ufanyidinap kumubwambwil Yehova.’ Ov, Saul wilejina chom kanang ku kurumbuk kwend?

Kupwa, payay Saul kurish nau in Amalek, Samwel wamuleja Saul anch kangal kushap muntu ap umwing. Pakwez Saul wakwata mupak wa kulik kumujip Mwant Agag. Yehova wamuleja Samwel anch: ‘Saul wanlik kal, ni kanteshinap kand am.’ Samwel wova ushon nakash, ni wamuleja Saul anch: ‘Mulong walik kal kumuziyin Yehova, Yehova ukutond mwant mukwau.’ Pachirikay Samwel, Saul wakwata ku ris ra nkandj wa Samwel ni nkandj wapuka. Chawiy Samwel wamwela Saul anch: ‘Yehova wakutambul kal want.’ Yehova ukuupan kud muntu ukukatay ni ukumuziyina.