Yesu Wamutond kal Saul

Saul wading mwan a ngand wa mu Rom wavadikina mu ul wa Tarsis. Wading Mufaris wija Yijil nakash ya in Yuda, ni wading uyikisin in Kristu. Wayikwatang in Kristu amakundj nau amband mulong wa kuyitek mu rukan. Wimana kand ni watala mutapu wamwasau mwin kwilej Stefan mayal mulong wa kumujip.

Pakwez Saul kimenap ching pa kuyikwat in Kristu a mu Yerusalem. Wamwita mwin kupesh mujim chakwel amutuma mu musumb wa Damas mulong wa kuyikwat in Kristu adinga kwinikwa. Pashikay Saul piswimp ni musumb, milayilay ya chitokish yamunyingumuka ni wawa pansh. Watesha dizu dalond anch: ‘Saul, ov, mulong wak ey ukat kwinzengol am?’ Saul wamwipula anch: ‘Yey nany?’ Wamwakula anch: ‘Yam Yesu. Yang ku Damas, ni akukulej yom ufanyidina kusal.’ Pakad kulab, Saul wikala mput a mes, ni amulama ku chikas amutwal mu musumb.

Mu Damas, mwading mwin Kristu umwing ushinshamena dijin dend Ananias. Yesu wamuleja mu chishimushimu anch: ‘Yang ku chikumbu cha Yuda chida mu mukombil utazukinau anch Utentamina, ni mukimba Saul.’ Ananias walonda anch: ‘Nsalejam, nij yom yawonsu piur pa muntu winou! Ukat kuyitek in kwilej ey mu rukan!’ Pakwez Yesu wamuleja anch: ‘Yang umutal. Namutondin Saul mulong wa kulejan rusang ruwamp ku michid yivud.’

Chawiy Ananias wamutana Saul ni wamuleja anch: ‘Mwanamakwam Saul, Yesu wantum kal kuburil mes mey.’ Kapamp kamwing Saul wasambisha kand kuman. Wileja piur pa Yesu ni wikala mwin kwilej wend. Chamubatishau kal mud mwin Kristu, Saul wasambisha kulejan mu ma sinagog pamwing ni anamakwend in Kristu. Ukutwish kutong mutapu wovau in Yuda kuyip pamumanau Saul ukat kuyifundish antu piur pa Yesu? Alonda anch: ‘Kindiyap muntu wada kuyikwat in kwilej a Yesu?’

Saul wayileja antu ading ashicha mu Damas mu mivu yisatu. In Yuda amukisa Saul ni akwata mpung ya kumujip. Pakwez pijikau akadivar piur pa mpung yiney, amukwasha chakwel achina. Amuteka mu musans ni amushirishina pa dipan pol pa rubumbu ra musumb.

Pashikay Saul mu Yerusalem, wasala usu wa kutanijan nau akadivar ading kwinikwa. Pakwez amwova wom. Mwin kwilej utazukinau anch Barnabas wamutwala Saul kud atwimbuy ni kuyilej nich kashinsh anch Saul waswimpin kal. Saul wasambisha kulejan rusang ruwamp nich mushiku pamwing ni chikumangen cha mu Yerusalem. Kupwa, amutazuka anch Paul.