Yehova Wamukinga Josafat

Josafat mwant wa mu Yuda wabumwona yintamb ya Baal ni akish adinga mwi ngand yiniya. Ndiy wakata anch antu ijika yijil ya Yehova. Chawiy, wayituma ant ni in Levi a mu Yuda chakwel ayifundisha antu yijil ya Yehova.

Michid yadinga piswimp yova wom wa kuyirishikish in Yuda mulong ading ij anch Yehova wading uyilamin antu end. Chawiy, amutwadina Mwant Josafat yipan. Pakwez, in Mowab, in Amon ni antu adokala mwi ngand ya Seyir eza kuyirishikish in Yuda. Josafat wading wij anch ukwet kuswir kwa ukwash wa Yehova. Wading ni amakundj, amband ni an eza pamwing mu Yerusalem. Josafat walembila kurutu kwa antu inay awonsu anch: ‘Pakad ukwash wey Yehova, tukutwishap kuwin. Tulejaku amboku yom tufanyidina kusal.’

Yehova wakula ku malembil mau anch: ‘Kangal wovany wom. Nikukukwashany. Imanany kwen, lamany jindond, ukumanany mutapu nikukupandishanya.’ Mutapu ik wayipandishay Yehova?

Pikwacha, Josafat watonda in kuwang ni wayileja kwend kurutu kwa amasalay. Abudika pol pa Yerusalem ni anyingumuka pa Tekowa ndond ya kurishin njit.

Padingau ni kuwang mas ya kumutumbish nich Yehova nich dizu da piur, Yehova wayirishina antu end. Yehova wateka kanrumbangesh pakach pa in Amon ni in Mowab, asambisha kujipijan umwing ni mukwau ni kwikil muntu ap umwing wapanda. Pakwez, Yehova wayikinga antu end in Yuda, amasalay ni in kupesh. Antu awonsu adinga mu misumb ya piswimp atesha piur pa yom yasalay Yehova ni ijika anch Yehova udandamedin kuyiking antu end. Mutapu ik Yehova mwayipandishay antu end? Wayipandisha mu mitapu yivud. Kadingap nich kuswir kwa ukwash wa antu chakwel ayipandisha.