Atakamena Mulong Wa Chikumbu Cha Yehova!

“Kutakaman kwa chikumbu chey kukez kangidi am.”—YOH. 2:17.

1, 2. Chom ik chasalay Yesu ku tempel mu muvu wa 30 C.C., ni mulong wak?

TONGIN bil chom chinech. Tudi pa chisu cha Pasak, mu muvu wa 30 C.C. Yesu wadinga wasambishin kal mudimu wend pa divu, ni padinga pasutil kal angond musamban. Waya ku Yerusalem. Pashikay kwinikwa, Yesu wayitana “antu mu tempel akat kulandish angomb ni amikoku ni amayemb, ni in kuswimposh nfalang ashich” mu Rupang ra Akamichid. Wakwat kabam, wayopatin annam pol, ni in kulandish ayilondul. Yesu wamwangol nfalang ja in kuswimp ni wabumburol mes mau. Wayel antu adinga ni kulandish atwinkudimb akwata atwinkudimb au adiokala aya.—Yoh. 2:13-16.

² Yisal ya Yesu yimekeshin anch ndiy wadinga ukwatin tempel nich usey ujim. Ndiy walonda anch: “Kangal wachirumbany chikumbu cha Tatukwam kwikal chikumbu cha kwisakil.” Pamanau in kwilej a Yesu yom yiney, avurika mazu mafundau pasutil kal yitot ya mivu kudiay David mwin kufund kuseng anch: “Kutakaman kwa chikumbu chey kukez kangidi am.”—Yoh. 2:16, 17; Kus. 69:9.

3. (a) Kutakaman chom ik? (b) Chipul ik tukutwisha twiyipul ayinetu?

³ Kwadinga kubangin kwa Yesu, kutakaman kwend, mulong wa chikumbu cha Nzamb kwawiy kwamubachika asala mwamu. Kutakaman kudi “mushiku ni maku makash ma kusot kusal chom kanang.” Mu chitot chinech cha 21, in Kristu mamiliyon sambwad ni kusut amekeshin kutakaman mudi kwinoku mulong wa chikumbu cha Nzamb. Tukutwish twiyipul muntu ni muntu anch, ‘Mutapu ik nikutwisha kuvudish kutakaman kwam mulong wa chikumbu cha Yehova?’ Chakwel kutukwash twakula ku chipul chinech, el tushinshikinany bil chidia chikumbu cha Nzamb ilel. Kupwa tukushinshikin kand yilakej yidia mu Bibil ya amakundj akaritiy amekesha kutakaman kwau mulong wa chikumbu cha Nzamb. Yilakej yau ayifunda mulong wa “kutulej nich etu” ni yikutwish yatubachik twikala atakamena nakash.—Rome 15:4.

Chikumbu cha Nzamb cha Pasak ni cha Katat

4. Tempel watungay Salomon wadinga nich rutong ik?

⁴ Mu Isarel wa pasak, chikumbu cha Nzamb chadinga tempel wadinga mu Yerusalem. Chakin kamu, Yehova kashakamap mwinimwa ku mujimbu. Yehova walonda anch: “Diur didi ditand diam, ni mangand madi chipwan cha kwazuk mend mam. Anch mwamu, ov, chikumbu cha mutapu ik chiukwintungilanya chakwel nishakamamu?” (Isay 66:1) Ap mwamu, tempel watungau pa chirung cha winyikel wa Salomon wadinga ndond ya kusambish ya kumwifukwil Yehova, kwawiy kwadingau ni kumulembil.—1 Ant 8:27-30, NW.

5. Kwifukwil mu tempel wa Salomon kwadinga mwinzwizwimb wa ditenchik ik dia katat?

⁵ Ilel, chikumbu cha Yehova chidiap chikumbu chijim cha mayal chitunginau mu Yerusalem ap kwi ndond yindjing. Pakwez, chidi ditenchik ditukwashina kumushejin mu kumwifukwil pa mufulandal wa mulambu wa chakupesh cha Kristu. Atushalapol awonsu ashinshamena adia pansh a Nzamb, adi mu uumwing mu kumwifukwil Yehova mu tempel wa muspiritu.—Isay 60:4, 8, 13; Mid. 17:24; Heb. 8:5; 9:24.

6. Ant ik a Yuda amekesha kutakaman kwau kukash mulong wa difukwil diakin?

⁶ Kupwa kwa kwaurik kwa Isarel mu muvu wa 997 K.C.C., ant 4 pa ant 19 ayikela mu Yuda, chikunku cha kurul, amekesha kutakaman kukash mulong wa difukwil diakin. Ant inay adinga: Asa, Yosafat, Hezekias nenday Yosias. Malejan ik majim mitukutwisha kwilejin ku yilakej yau?

Kusal Mudimu ni Muchim Umwing Kuletining Yiyukish

7, 8. (a) Yehova uyukishining mudimu wa mutapu ik? (b) Dilejan ik dia dibabesh tukutwisha kwilejin ku chilakej cha Mwant Asa?

⁷ Mu winyikel wa Mwant Asa, Yehova wayilangwisha aprofet chakwel atakela muchid Wend wadinga ushinshamena. Chilakej, Bibil utulejin anch Asa wadinga ni kumutesh profet Azaria, mwan ikundj wenday Oded. (Tang 2 Jinsangu 15:1-8.) Asa waleta uumwing kudiau in Yuda pamwing ni antu avud adinga ni kudiokal ku want wa Isarel, eza mulong wa kusal musambu ujim mu Yerusalem. Awonsu pamwing akwata mupak wa kumwifukwil Yehova nich kushinshaman. Tutangin anch: “Awiy achipa machip mau kudi [Yehova, NW] nich mazu ma piur, abarok[a] nakash, abula jimpuny ni misengu. In Yuda awonsu ova musangar nakash mulong wa kushilamu kwinoku kwashilaumu nich michim yau yawonsu. Amusuraba [Yehova, NW] nich rusot rau rawonsu, chad amutana. [Yehova, NW] wayinkisha chisambu ku mitambu yawonsu.” (2 Jins. 15:9-15) Chakin kamu, Yehova ukez kutuyukish niyetu chilik chimwing anch twamusadil ni muchim umwing.—Marko 12:30.

⁸ Cha ushon, Asa wova ujim pa chisu chamupupau kudiay Hanani, muruu wa Nzamb. (2 Jins. 16:7-10) Mutapu ik tusadilinga anch Yehova watwinkish chiyul kusutil kudiau amakurump in Kristu? Ov, tuteshining chiyul chau chengamidina pa Mifund ni kwipuk mupit wa kulam rukuny?

9. Yosafat nau in Yuda ova wom wa chom ik, ni chom ik chasalau?

⁹ Yosafat wayikela mudi mwant mu Yuda mu chitot cha dikum K.C.C. Ndiy ni in Yuda awonsu adinga ni wom wa amasalay a in Amon, in Mowab ni antu ashichinga ku mikandu ya mwingand ya Seyir adinga ovujadina. Ap anch wadinga wakamin, mwant wasala chom ik? Ndiy pamwing ni antwend, pamwing ni akajau ni anau, akumangana ku chikumbu cha Yehova mulong wa kulembil. (Tang 2 Jinsangu 20:3-6.) Kukwatijan nich mazu malonday Salomon kwisambishin pa chisu chashikijau tempel, Yosafat wamwilembila nakash Yehova anch: “A! Nzamb wetu, ov, ukutwishap kwey kuyirumburish? Mulong etu kitukwetap kand usu wa kwiman kurutu kwa chisak chijim mwamu chezila ni kurish ni yetwetu. Etu kitumenap kand cha kusal, pakwez mes metu matal kal ching kudi ey.” (2 Jins. 20:12, 13) Kupwa kwa Yosafat kulembil, mwinimwa “mukach mwa chisak chau,” mwiku utumbila wa Yehova wamubachika Yakaziel, mwin Levi, alonda mazu mongojina, mayikasikesha antu awonsu.—Tang 2 Jinsangu 20:14-17.

10. (a) Mutapu ik wasalay Yosafat ni mwant wa Yuda patambulau umutakel? (b) Mutapu ik tukutwisha kumekesh musangar mulong wa umutakel utwinkishinay Yehova ilel?

¹⁰ Mwaning, pa chisu chinicha, Yosafat ni mwant wa Yuda atambula umutakel wa Yehova kusutil kudiay Yakaziel. Ilel, tukat kutambul rongoj ni umutakel kusutil kudi chisak cha kashalapol ushinshamena ni kubabal. Chakin kamu, tusotil tusalang pamwing ni kuyilimish amakurump atondau kal, asadila mudimu ukash wa ukafung ni kulejan umutakel wa “kashalapol ushishamena ni kubabal.”—Mat. 24:45; 1 Tes. 5:12, 13.

11, 12. Dilejan ik tukutwisha kwilejin ku yom yamushikena Yosafat ni Yuda?

¹¹ Mudi chakumanganay Yosafat ni antwend pamwing mulong wa kwit umutakel wa Yehova, kangal niyetu tudiula kukumangan ku yikumangan ya chikumangen pamwing ni akadivar ni anambaz netu. Ap pa yisu yimwing twikal mu yikokujol yikash, ni tumenap cha kusal, el tulondulany chilakej chiwamp chashay Yosafat ni antu in Yuda chakwel tukarumukina kudiay Yehova mu malembil ni kumuchingejin nakash Ndiy. (Jinsw. 3:5, 6; Filip. 4:6, 7) Ap anch tudi ayinetu kusu, malembil metu kudiay Yehova matutekin mu uumwing ni “akadivar mu mangand mawonsu.”—1 Pita 5:9.

¹² Yosafat ni antwend alondula umutakel wa Nzamb wamwinkishau Yakaziel. Kwikala chibudikin ik? Awina njit ni achirika mu Yerusalem ni “musangar” ni “abula tudiad, ni yisaj, ni jimpuny.” (2 Jins. 20:27, 28) Niyetu tukat kulimish umutakel wa Yehova upaninay kusutil ku dirijek diend ni tukat kwinung mu kumushiman.

Tulamany Nawamp Jindond Jetu ja Kukumangen

13. Mudimu ik wasambishay Hezikias kwisambishil kwa winyikel wend?

¹³ Mwi ngond wa kusambish wa winyikel wend, Hezekias wamekesha kutakaman kwend mulong wa difukwil dia Yehova ku kwazuril ni kurijek tempel. Watenchika in kupesh ni in Levi chakwel atokisha chikumbu cha Nzamb. Mwamu mwasalau mu machuku 16. (Tang 2 Jinsangu 29:16-18.) Usu winou utuvurishin mutapu wa kusal mudimu wa kulam ni kurijek usadila anch jindond jetu ja kukumangen jikal mu mwikadil umwing ulejena kutakaman kwetu mulong wa difukwil dia Yehova. Ov, wateshap kal yom yamanau yilejena anch antu akat kusanger nakash kutakaman kwa akadivar ni anambaz asadila mudimu winou? Mwaning, usu wau ukat kumushiman nakash Yehova.

14, 15. Mudimu ik usadikina ilel umusangareshina Yehova? Let yilakej.

¹⁴ Mu musumb umwing kwindum kwa Angleterre, ikundj umwing wadinga ulikin mudimu wasotau kusal mulong wa kutunguril Chot cha Want chadinga chisulangena nend. Akadivar amwakula ni kalimish. Pamanau anch rubumbu radinga riyaurila ni mutej wau winou, radinga rifanyidin kurijek, amuleja anch akurijek rubumbu pakwez kakufutap ap diey. Asala mudimu ukash, ni atunguril chikunku chilemp cha rubumbu. Apwisha mulong winou nawamp ni mutej nau wakarumuna yitongijok. Katat ukat kulam Chot cha Want ni rupangu mwawonsu.

¹⁵ Antu a Yehova asadil mudimu wa kutung pa mangand mawonsu. In kwipan asadil pamwing nau atushalapol a chisu chawonsu mu mudimu wa kutung Yot ya Want ni wa kutung Yot ya Yitentam ni yikumbu ya Bethel. Sam wileja mudimu wa kutek yamu ya kuletish chipepil, chirungul ni mashik. Ndiy pamwing ni mukajend, Ruth, aya mu jingand kushalijan ja Mwimputu ni mu Afrik mulong wa kukwash midimu ya kutung. Kwawonsu kwadingau ni kuya, adinga ni kusanger kulejan pamwing ni yikumangen ya kwinikwa. Sam ulejen chom chadinga ni kumubachik chakwel asala mu mudimu winou wa pa mangand mawonsu anch: “Diadinga dikasikesh dia antu akwau asadilinga ku Bethel mwi ngand yetu ni mwi ngand ja wingendj. Pa kuman kutakaman kwau ni musangar wau yawiy yadinga ni kwimbachik niyam nisala mwamu.”

Tuziyilany Malejan ma Nzamb

16, 17. Mudimu ik wa pakampwil usadilau antu a Nzamb nich kutakaman, ni kudi chibudikin ik?

¹⁶ Kuwejin pa kurijek tempel, Hezekias wachirisha kand musambu wa Pasak pa muvu walonday Yehova anch chifanyidin kuusal. (Tang 2 Jinsangu 30:1, 4, 5.) Hezekias ni antu adinga mu Yerusalem autazuka muchid wawonsu—ap in adinga ashiching mu chikunku cha winyikel wa kwindum—eza niyawiy akumangana. Aruu aya mwi ngand yawonsu mulong wa kutwal mikand ya diladikij.—2 Jins. 30:6-9.

¹⁷ Mu mivu ya katat, niyetu tukata kusal mudimu ufanikena nich. Tukat kusadil maladikij mamwing masangareshina nakash mulong wa kuyitazuk antu ashicha mu teritwar wetu eza tukumangana pamwing pa chisu cha kuvurik Yakudia ya Urel ya Mwant, mulong wa kuziyil kwi mbil ya Yesu. (Luka 22:19, 20) Tutambwiling malejan ku Yikumangan yetu ya Mudimu, tusadiling ni kutakaman mudimu winou. Mutapu ik ukatay Yehova kuyukish usu winou! Mu muvu wasutila ou, antu mamiliyon sambwad angana maladikij, ni antu 17790631 akumangana!

18. Mulong wak kutakaman mulong wa difukwil diakin kukwet usey kudi ey?

¹⁸ Alonda piur pa Hezekias anch: “Ndiy wamuchingejina Yehova Nzamb wa Isarel, chawiy kikwadingap pakach pa ant a in Yuda wa kufanikan nend, kurutu kwend ap kwinyim kwend. Mulong ndiy walamata kudiay Yehova; kalikap kumulondul; ndiy walama yijidik yend yamwinkishau kudiay Yehova kusutil kudiay Moses.” (2 Ant 18:5, 6, NW) Chikutwish chikal chilik chimwing ku mutambu wetu. Kutakaman kwetu mulong wa chikumbu cha Nzamb kukez kutukwash ‘kulamat kudiay Yehova’ nich ruchingej ra kutambul mwom wa chikupu.—Kuv. 30:16.

Twitiyijany Umutakel Pakad Manshindangen

19. Usu ik wa kutakaman usadilingau pa chirung cha Chivurish?

¹⁹ Payikelay Josias mudi mwant, niyend watenchika musambu wa Pasak, watenchika nawamp mulong wa musambu winou. (2 Ant 23:21-23, NW; 2 Jins. 35:1-19) Niyetu tukat kusal usu ukash chakwel twirijeka nawamp mulong wa yitentam ya distrik, ya munyingumuku ni ya pakampwil ya dichuku dimwing, pamwing kand ni Chivurikish. Akadivar mu jingand jimwing akat ni kutek mwom yau mu chak mulong wa kusot kukumangan pamwing pa kusot kuvurik rufu ra Kristu. Amakurump atakamena akat kushinshikin anch kwikil muntu ap umwing udia mu chikumangen udiwilau. Amapal ni ayibid akat kuyikwash chakwel ikalaku pa chinship chinech.

20. (a) Chom ik chasadikaku pa winyikel wa Mwant Yosias, ni chom ik chasalay? (b) Dilejan ik tusotina kwilejinaku?

²⁰ Pasalau mudimu wa kutunguril watenchikay Mwant Yosias, Hilikiya Mwin Kupesh wa pa Mutu “wamanamu Mukand wa Yijil ya [ Yehova, NW] yamwinkishau Moses.” (Tang 2 Jinsangu 34:14-18.) Kwasadika chom ik? Kapamp kamwing, mwant wapula yidjal yend mulong wova kuswan ni wapana mbil kudi amakundj amwing aya akamwipula Yehova. Kusutil kudiay muprofet mband Hilida, Nzamb waleta uruu umwing wadinga ufishina nich yisal yimwing ya chirelijon yadinga yisadikina mu Yuda. Chikwau, usu uwamp wa Yosias wa kusot kudiosh yisal ya kwifukwil akish wamekana, ni Yehova wamwitiyija chikalap nchik mar mabwakau makushikena pa muchid wawonsu. (2 Jins. 34:19-28) Chom ik tukutwisha kwilejinaku? Chakin, rusot retu ridi kamu mudi radingay nich Yosias. Tusotil kuziyil ku umutakel wa Yehova pakad manshindangen, kuta muchim pa chilakej cha dibabesh dia yom yashikenaku anch twalik kupumbuk ni kuburen ritiy kwandama mu difukwil dietu. Ni tukutwish twikal nich ruchingej anch Yehova ukez kwitiyij kutakaman kwetu mulong wa difukwil diakin, mudi mwasalay nenday Yosias.

21, 22. (a) Ov, mulong wak tufanyidina kumekesh kutakaman kwetu mulong wa chikumbu cha Yehova? (b) Chom ik tukeza kwilej mu mutu wa mulong ukwambakedinap ou?

²¹ Ant inay anying a Yuda—Asa, Yosafat, Hezekias ni Yosias—atushila yilakej yiwamp chakwel niyetu twikal atakamena mulong wa chikumbu ni difukwil dia Nzamb. Kutakaman kwetu kufanyidin kutubachika tumuchingejina Yehova ni twipana nakash mu difukwil diend. Chidi cha manangu anch twaziyil ku malejan ma Nzamb ni chitwadil ku musangar anch twitiyij umutakel wa rukat ni dipup tukutwisha kutambul kudiau amakurump adia mu chikumangen.

²² Mutu wa mulong wambakedinap ou ukupwitin manangu metu pa kutakaman mu mudimu wa chingand ni ukez kuyinkish ansand dikasikesh chakwel amusadila Tatukwetu mwin rukat nich kutakaman. Tukez kushinshikin kand mutapu tukutwisha twiyep usu umwing uyimp wa Satan. Anch twatesh nich kutakaman yivurish yiney yawonsu yidiokila kudiay Yehova, tukez kulondul chilakej cha Yesu Mwan wa Yehova, mulong alonda piur pend anch: “Kudandiken kwa chikumbu chey kukat kwingidia.”—Kus. 69:9; 119:111, 129; 1 Pita 2:21.

Ov, Uchivurikin?

• Yehova ukat kuyukish mudimu wa mutapu ik ni mulong wak?

• Mutapu ik tukutwisha kumekesh kumuchingejin kwetu Yehova?

• Kutakaman kukutwish kwatubachik mutapu ik chakwel tuziyila malejan ma Nzamb?

[Chipich chidia pa paj wa 15]

Mutapu ik wamekeshau Asa, Yosafat, Hezekias nenday Yosias kutakaman mulong wa chikumbu cha Yehova?