Ikalany “Atakamena Ku Midimu Yiwamp”!

“[Yesu] wipana amwinend mulong wetwetu chakwel ukutwish kutukwol ku tuyimp twawonsu, ni kutokish antu kwikal aend pa kampwil, atakamena ku midimu yiwamp.”—TITUS 2:14.

1. Yom ik yasadika mu tempel chisu chashikay Yesu kwinikwa mwi ngond wa Nisan 10, 33 C.C.?

TUDI mwi ngond wa Nisan 10, 33 C.C., machuku makemp kurutu kwa musambu wa Pasak usadika. Yisak yisangera ya in kwifukwil yidi mu rupangu ra tempel mu Yerusalem. Chom ik chikusadika pakushikay Yesu? In kufund asatu a Rusangu Ruwamp—Mateu, Marko ni Luka—awonsu imena ni mes mau kapamp ka kaad, padingay Yesu ni kuyopatin pol antu adingaku ni kulandish ni kuland. Wabumburila mes ma in kuswimp nfalang ni yitwamu ya in kulandish atwinkudimb. (Mat. 21:12; Marko 11:15; Luka 19:45) Kutakaman kwa Yesu kwakepap mulong ndiy wayopata kand padinga pasut kal mivu yisatu.—Yoh. 2:13-17.

2, 3. Mutapu ik twija anch kutakaman kwa Yesu kwapwilap kusu ching pa kutokish tempel?

² Rusangu ra Mateu rilejen anch kutakaman kwa Yesu pa chisu chinech kwadingap kwimena ching kusu pa kutokish tempel. Wayoka kand amputames ni ayilim eza kudiay ndiy kwinikwa. (Mat. 21:14) Rusangu ra Luka risambidin kand midimu yikwau yasalay Yesu. “[Yesu] wading ni kulejan pichuku pichcuku mu tempel.” (Luka 19:47; 20:1) Kutakaman kwa Yesu kwamekana patok mu mudimu wend wa kulejan patok.

³ Kurutu, kambuy Paul weza kumufundin Titus ni wamurumburila anch Yesu “wipana amwinend mulong wetwetu chakwel ukutwish kutukwol ku tuyimp twawonsu, ni kutokish antu kwikal aend pa kampwil, atakamena ku midimu yiwamp.” (Titus 2:14) Mu jinjil ik tukutwisha ilel unou twikal “atakamena ku midimu yiwamp”? Ni yilakej ya ant awamp a Yuda yikutwish yatukasikesh mutapu ik?

Atakamena mu Kukun Dizu ni mu Kulejan

4, 5. Mu jinjil ik mwimekeshinau ant anying a Yuda anch adinga atakamena ku midimu yiwamp?

⁴ Asa, Yehoshafat, Hezekias ni Yosias awonsu asala mudimu ujim wa kudiosh difukwil dia akish mu Yuda. Asa “wadiosha yintamb ya akish ni jindond ja piur, wapuchola manguj ma mayal, waumbwola akish awonsu.” (2 Jins. 14:3) Yehoshafat, wadinga utakamena mulong wa difukwil dia Yehova, “chad wadiosha kand kakwau jindond ja piur ja kwifukwil akish ni akish in a mu Yuda.”—2 Jins. 17:6; 19:3.a

⁵ Kupwa kwa machuku sambwad ma musambu wa Pasak wasalay Hezekias mu Yerusalem, “in Isarel awonsu ading kwinikwa aya mu misumb ya in Yuda, apumwon manguj, akatwola akish awonsu, asheshol jindond ja piur ja kwifukwil akish, ni yintamb. Ayidiosha djat mu Eferayim, ni mu Manase.” (2 Jins. 31:1) Nsand Yosias wikala mwant padingay ni mivu chinan. Rusangu rilondil anch: “Chawanyishay kal mivu chinan ya kuyikel kwend, ni pinipa wachading kwend nsangarum, wasambisha kumusurab Nzamb wa ngakiril wend Mwant David. Mu muvu wa dikum ni yaad wasambisha kudiosh mu Yuda ni mu Yerusalem jindond ja piur ja kwifukwil akish, ni kudiosh akish, ni yirumbidij ya kusong, ni yirumbidij ya utad.” (2 Jins. 34:3) Chawiy, ant awonsu anying adinga atakamena ku midimu yiwamp.

6. Mulong wak tukutwisha kufanikesh mudimu wetu ni makampany masalau ant in Yuda ashinshamena?

⁶ Ilel kand, tusadil mudimu ujim wa kuyikwash antu akwau chakwel adiokala ku malejan ma relijon wa makasu, pamwing ni ku yisal ya difukwil dia akish. Mudimu wetu wa kulejan ku chikumbu ni chikumbu ututwishishining kuyitan antu a mitapu yawonsu. (1 Tim. 2:4) Changadim umwing wa mu Aziy uvurikin mutapu wadingay makwend ni kwifukwil kurutu kwa atupwany avud mu chikumbu chau. Ndiy wadinga ni kutong anch atupwany awonsu kakutwishap ikal antimesh a Nzamb wakin, chawiy chadingay ni kulembil chisu ni chisu chakwel amwijika Nzamb chidiay chakin kamu. Chisu chamwakulay muntu wakokala kwolikwend, wamana Atuman aad adinga tayad mulong wa kumukwash ileja dijin dia Nzamb wakin, Yehova. Ni wova musangar ujim mudi ik pilejay uyakin piur pa akish! Katat umekeshin kutakaman kwend nakash kusutil ku mudimu wa chingand, mu kuyikwash antu akwau muspiritu.—Kus. 83:18; 115:4-8; 1 Yoh. 5:21.

7. Chom ik tukutwisha kusal chakwel tuyimburija alej anyingumuka ngand pa chirung cha Yehoshafat?

⁷ Pituyilinga ni kulejan ku chikumbu ni chikumbu, mutapu ik tukutwisha kulejan mu teritwar wetu mwawonsu? Cha musangar, mu mivu yend yisatu ya kusambish mu winyikel wend, Yehoshafat wayituma an a ant atan, In Levi chidivu ni in kupesh aad. Wayileja aya mu misumb yawonsu mulong wa kuyilej antu yijil ya Yehova. Mudimu wau winou wikala nich yibudikin yiwamp mulong antu a michid adinga ayombilamu asambisha kumwov Yehova wom. (Tang 2 Jinsangu 17:9, 10.) Kusutil ku kusutirikamu kand ku yikumbu pa yisu ni machuku kushalijan, tukutwish pamwingap twisamb ni chid ni chid cha ku chikumbu ni chikumbu.

8. Mutapu ik tukutwisha kutanduril mutapu wetu wa kulejan?

⁸ Atushalapol avud a mu chirung cha katat ading tayad kudiokal kwolikwau chakwel aya ku jindond kuswiridinau nakash Atuman atakamena. Ov, ukutwish wasal mwamu? Amwing adia pakach petu akad kutwish kushemunikin kwindjing akutwish asal usu wa kuyilej antu adia mu teritwar mushichau akata kulond rudim rindjing. Mulong wa kushalijan kwa michid ya antu adingay ni kutan mu teritwar wend, Ron ukweta mivu 81 wileja kulangwishan mu jindim 32! Watanijana dichuku dimwing ni ambay atijadina a mu Afrik mu balibal ni wayilangwisha mu rudim rau ra chivadik, Yoruba. Awiy amwipula Ron anch wayap kal mu Afrik. Payakulay anch bwat, awiy amwipula anch mutapu ik lel wijikinay rudim rau. Chom chinech chashikija ku kuyilej uman uwamp. Itiyija kapamp kamwing magazet mamwing ni amwinkisha adres wau, niyend wamutuma adres winou ku chikumangen chadinga piswimp ni kushichingau ambay inay, ni awiy asanger kwilej Bibil.

9. Ov, mulong wak chidi cha usey anch tutanga kamu mu Bibil mu mudimu wetu? Let chilakej.

⁹ Alej aya mwi ngand yawonsu kulondulijan nich mbil ya Yehoshafat adinga ni “Mukand wa Yijil ya [Yehova, NW].” Tusadil usu mu mangand mawonsu mulong wa kuyilej antu Dizu dia Nzamb, Bibil. Tusadil usu wa kuyilej antu akwau mazu makin ma Bibil, mitulejeninga mu mudimu wetu. Mwin chikumbu umwing wamuleja Linda, Kaman, anch ulamin nfumwend muyej. Mwin chikumbu winana anch: “Nijap anch chom ik namusadila Nzamb chakwel ansala mwamu.” Linda wamwakula anch: “Nikutwish nakulej chom chimwing?” Chad wamutangina mazu madia mu Yakob 1:13 ni wawejinaku anch: “Mar mawonsu mitumena ni mamenau akatish netu kimadiap dipup dia Nzamb.” Mwin chikumbu pateshay mwamu, wamubwikat Linda. Linda ulondil anch: “Natwisha kumwongoj kusutil ku Bibil. Pa yisu yimwing, maverse mitukata kutang mu Bibil mawiy madinga maswirikedinay mwin chikumbu mulong kandikal amateshap dichuku ap dimwing.” Mambamb minam mayishikija ku kusambish kwilej Bibil ni mband winou.

Ansand Atakamena mu Mudimu

10. Mutapu ik wadingay Yosias chilakej chiwamp kudiau ansand ilel in Kristu?

¹⁰ Anch twachirikin ku chilakej cha Yosias, tukuman anch walondula difukwil diakin padingay uchidi nsand ni padingay ni mivu 20 pawiy pasalay mudimu ujim wa kudiosh difukwil dia akish. (Tang 2 Jinsangu 34:1-3.) Ansand avud ilel amekeshin mu mutapu umwing kutakaman kwau mu mudimu wa Want.

11-13. Malejan ik mitukutwisha kwilejin kusutil kudi ansand a katat amusadidila Yehova nich kutakaman?

¹¹ Hannah, udinga mu Angleterre, wadinga ni mivu 13 pasambishay kwilej rudim ra Français ku shikol, pateshay anch asal kal chirund cha Français mu musumb wa piswimp ni kwolikwau. Tatukwend witiyija kumutwalang ku yikumangan yikusalau kwinikwa. Katat ukwet mivu 18, Hannah ulejen nich kutakaman mu Français ni udi chibol wa rawonsu. Ov, ukutwish niyey wilej rudim rindjing chakwel ukwasha antu akwau ileja piur pa Yehova?

¹² Rachel wasangera nakash pamanay video ulondila anch: Poursuivez des objectifs qui honorent Dieu. Parumburilay piur pa yom yadingay ni kutongijokin pasambishay kumusadil Yehova mu muvu wa 1995, ndiy ulondil anch: “Nadinga ni kutongin anch uyakin wikadil kal iwam.” Kupwa walonda kand anch: “Panatala dram winou, najingunina anch nadinga nichidi kwisambishil kwin kamu mu kusut kwa mivu. Nifanyidin kura tutaku mulong wa uyakin ni kuta muchim nakash pa mudimu wam ni dilejan diam.” Katat Rachel wajingunin kal anch umusadidil Yehova nich kutakaman nakash. Yom ik yamanay mudi chibudikin? “Urund wam ni Yehova wakula nakash. Malembil mam madi ma usey nakash, ni kwilej kwamu kudi kukurikina ni kusangareshina, ni jinsangu jidia mu Bibil jidi katat jakin kudi am. Mudi chibudikin, nisangaredin nakash mudimu ni nitanin mazang makin pinimena mutapu mazu ma Yehova mayikasikeshin antu akwau.”

¹³ Luke udi nsand mukwau wakasikeshau kudi dram ulondila anch, Les jeunes s’interrogent... Que vais-je faire de ma vie ? Kupwa kwa kutal dram winou, Luke wafunda anch: “Niyova anch nifanyidin nishinshikina mwom wam.” Ndiy ulondil anch: “Pasak, nadinga bil ni chibachikin cha kusot diking dia nfalang kusutil ku kwilej shikol yijim ni kupwa lel nitala milong ya muspiritu. Chibachikin chinech chikatap kutwalan kurutu muspiritu; pakwez chikat kumuchirish muntu kwinyim.” En akadivar ansand ni anambaz ayangadim, ov, mulong wak ulikinany kushinshikin anch ukutwishany wasadilany yiwilejinany ku shikol mulong wa kutanduril mudimu wen mudi mwasalay Hannah? Ni mulong wak ulikinany kumwimburij Rachel chakwel ulondulany nich kutakaman jintong jimutumbishina chakin kamu Nzamb? Londulany chilakej cha Luke, ipukany yak yikadila mipit kudi ansand avud.

Atakamena Kutesh Yiyul

14. Yehova witiyijin difukwil dia mutapu ik, ni mulong wak udi mulong ukasikena ilel?

¹⁴ Antu a Yehova afanyidin kwishitul anch asotin ang difukwil diau aditiyija. Isay uyudil anch: “Chakin, diokalany mu Babilon, en awonsu ukata kusendany yichid ya mu Chikumbu cha [Yehova, NW]. Diokalany wakad kupukun ku chom chitakanena, ishitwishany ayinen kwikal antu atumbila.” (Isay 52:11) Mivu yivud kushik ni pa chisu chafunday Isay mazu minam, Asa Mwant muwamp wasala mudimu ukash mulong wa kudiosh masandj mu Yuda. (Tang 1 Ant 15:11-13, NW.) Ni kupwa kwa kusut kwa yitot ya mivu, kambuy Paul niyend wamuleja Titus anch Yesu wipana amwinend mulong wa kuyitokish in kwilejend ni kuyikadish “aend pa kampwil, atakamena ku midimu yiwamp.” (Titus 2:14) Chikutwish chikal chikasikena mu mangand manam mijondila—pakampwil ku mutambu wa ansand—kwikal ishitwila ku milong ya masandj. Chilakej, atushalapol awonsu a Nzamb, ansand ni amapal kumwing, afanyidin kura tutaku chakwel ikola ku kwijond nich pornografi ulejenau pa matabulo ma kulejen jinsangu, ku ma Televizion, mu mafilim, ni pakampwil pa Internet.

15. Chom ik chikutwisha kutukwash kukudish rukis ra yom yiyimp?

¹⁵ Kutakaman kwetu pa kutesh yiyul ya Nzamb kukutwish kwatukwash tukudisha rukis ra yom yiyimp. (Kus. 97:10; Rome 12:9) Tufanyidin kukis pornografi chakwel “tukolika ku usu wend,” mudi mwalonday mwin Kristu umwing. Muntu uswiridin kusadil usu chakwel alamuna tuyom tulamatina ku ema. Chawiy chimwing, chitining usu nakash chakwel kujijamen chipwichik cha usu cha pornografi. Chad anch muntu watesh ubaj udiaku ku pornografi kukutwish kwamukwash akukisa nakash. Mukadivar umwing wasala usu nakash chakwel alika chaku chend cha kutalang tupend twa pornografi pa Internet. Wateka ordinater mu kapalikany mwadingau yid yivud ya dijuku diend. Pasalay mwamu, watwisha nakash kwishitwish ni kutakaman ku midimu yiwamp. Wakwata mupak ukwau. Mulong wadinga ni kusadil Internet mu mudimu wend, wakwata mupak wa kwandam pa Internet ching anch mukajend udiaku.

Usey wa Mashakamin Mawamp

16, 17. Mwikadil wetu uwamp wa Ukristu, ukutwish wikal nich usu ik padi antu atutadila? Let chilakej.

¹⁶ Mwikadil wa manangu uwamp mudi ik udingau nich ansand ni ayangadim adia mu mudimu wa Yehova, ni chikwet usu ik padi antu ayimena! (Tang 1 Pita 2:12.) Muntu umwing waya ni kutal Bethel wa mu Londres, waswimpa yitongijok yend piur pa Atuman a Yehova pasutishay dichuku dia kabuj mu kurijek mashin ma kuchap nich kwinikwa. Mukajend, wadinga ni kwilej Bibil ni Kaman umwing wa pol pau, wamana anch nfumwend waswimp kal manangu mend. Pakusambish, kadingap ni kusot anch Atuman eza kuyendil ku chikumbu chend. Pakwez wakarumuna yitongijok yend kupwa kwa kusal mudimu winou ku Bethel, ni wasangera nakash mulong wa mutapu wa kalimish wamusadilau. Ndiy walonda anch kwikil muntu ap umwing walonda dizu diyimp. Awonsu adinga ishimpishina, ni mwikadil wadinga wa chisambu. Washimoka pa kuman anch akadivar ansand ni ayangadim adinga asadil nich kutakaman pakad kuchingejin difut, asadila chisu chau cha kwikatin ni usu wau mulong wa kukwash kutwal kurutu rusangu ruwamp.

¹⁷ Mutapu umwing kand, akadivar ni anambaz asadila midimu ya ku mujimbu mulong wa kuwanyish yisakin ya majuku mau asadiling midimu yau ni muchim umwing. (Kol. 3:23, 24) Chom chinech chiletining diking ku mudimu, mulong amakurump a midimu akat kusanger kwipan kwau ni kakatap kuyilikishaku aya kwindjing.

18. Ov, mutapu ik tukutwisha kwikal “atakamena ku midimu yiwamp”?

¹⁸ Kumuchingejin kwetu Yehova, kuziyil kwetu ku malejan mend, ni kulam kwetu nawamp jindond jetu ja kukumangen yidi yimwing ya mitapu mu tukata kumekeshin kutakaman kwetu mulong wa difukwil dia Yehova. Chikwau, tusotil tusala nakash mu mudimu wa kulejan Want ni wa kuyikadish in kwilej. Twikala nsand ap ipal, kusutil ku kulamat kwetu ku malejan mishitwila piur pa difukwil diend, tukez kwangul yibudikin yivud yiwamp. Ni akez kudandamen kutwijik anch tudi antu “atakamena ku midimu yiwamp.”—Titus 2:14.

[Mazu madia kwishin kwa paj]

Chom ik wilejina kal ku yilakej yidia mu Bibil ni ya katat piur pa

• mutapu wa kumekesh kutakaman ku kukun dizu ni ku kulejan?

• mutapu ukutwishau ansand in Kristu kwikal “atakamena ku midimu yiwamp”?

• kukolik ku yaku yijondila?

[Chipich chidia pa paj wa 18]

Ov, ukat kusadil Bibil chisu chawonsu mu mudimu wey wa chingand?

[Chipich chidia pa paj wa 20]

Kwilej kulond rudim rindjing piuchidia ku shikol kukutwish kwakukwash kutanduril mudimu wey